Hechos 28:1-31
28 Keman tinochin tiajsikej atenoj, tikmatkej ke nejon tal monotsaya Malta.
2 Uan akin nemiaj itech nejon tal katkaj semi kualtakamej touan. Taxotaltijkej* uan kuali techselijkej tinochin porin kioujtoya uan taseseyaya.
3 Sayoj ke, keman Pablo kisentilij seki koujtsitsin tein uakik uan kitikotamotak, ualkisak se kouat uan mopiloto imako Pablo.
4 Keman akin ompa nemiaj kiitakej kouat pilkatok imako, peujkej moiluiaj: “Nejin takat xa se temiktijkej. Uan maski momakixtij itech ueyiat, amo uelis kisentokas nemisok porin kitatsakuiltijkej”.*
5 Sayoj ke Pablo momatsetseloj uan kouat uetsito itech tit,* uan amo teyi kipanok.
6 Yejuan kichixtoyaj* maj tamiposauaya* oso maj miktiuetsi. Sayoj ke kemej uejkauak mochixtoyaj uan amo teyi kipanouaya, motanemililpatakej uan peujkej kijtouaj ke katka se dios.
7 Ompaka nemia se takat akin monotsaya Publio. Yejua katka tekiuaj uan kipiaya miak talmej. Yejua kuali techselij uan ika miak pakilis techmakak kani timokauaskej eyi tonal.
8 Sayoj ke itat Publio uetstoya porin kikuik totonik* uan semi kikokouaya ipox,* yejua ika Pablo kalakik kampa yejua yetoya, kichiuak se netataujtil uan kitalij imauan itech uan pajtik.
9 Satepan, oksekin akin mokokouayaj itech nejon tal peuak youij kiitatij uan kinpajtij.
10 No techtasojkamatilijkej uan techtayokolijkej miak taman, uan keman yaya tikisatijya itech barco techmakakej nochi tein techpolouaya.
11 Ompa timokaujkej eyi metsti uan tiajkej itech se barco tein taixpampa kipiaya se inintaixkopin iKoneuan Zeus. Nejon barco ualeuaya Alejandría uan mokaujka itech nejon tal itech tonalmej keman taseseya.
12 Tiajsitoj Siracusa uan ompa timokaujkej eyi tonal.
13 Ompa tikisteujkej uan tiajsikej Regio. Mostika peuak se chikauak ejekat tein ualeuaya tanikopa* uan uiptika uelik tiajsikej Puteoli.
14 Ompa tikinajsikej tokniuan uan techtataujtijkej maj iniuan timokauakan chikome tonal. Satepan tiajkej Roma.
15 Keman tokniuan akin kayomej Roma kimatkej ke ompa tiayaj, technamikikoj hasta kampa motanotsa Plaza del Mercado de Apio uan Tres tabernas. Keman Pablo kinitak, kitasojkamatilij Dios uan semi moyolchikauak.
16 Keman tiajsikej Roma, Pablo kikaujkej maj iselti kalyeto uan maj se soldado kipixtinemi.
17 Sayoj ke, eyi tonal satepan kinnotsak judíos akin okachi ueyichiuanimej. Uan keman nochin mosentilijkej, kiniluij: “Nokniuan, nejua amo nikixnamikik toxolal nion tein touejkaujtatuan technextilijkej, maski ijkon nechtemaktijkej ininmako romanos ompa Jerusalén.
18 Keman nechtatsintokijkej, yejuan kinekkej nechkajkauaskej porin kiitakej ke amo nechnamikia maj nechmiktikan.
19 Kemej judíos amo kinekiaj maj nechkajkauakan, nikitak ke monekia nitajtanis maj nechuikakan iuan Tekiuaj,* sayoj ke amo porin nikpiaya tein ika nikinteluiliskia nojudíosikniuan.
20 Yejua ika nitajtanik namechitas uan nitajtos namouan. Nikneki xikmatikan ke nikuika nejin cadena porin nikteixmatiltia tein israelitas kichixtokej”.*
21 Uan yejuan kiluijkej: “Amo akin de Judea moka ualtajkuilouani uan nion semej tokniuan akin ompa ualeuani moka technojnotsani nion mitsijijtouani.
22 Sayoj ke tikitaj ke kuali yetok tikakiskej tein tiknemilia, porin tikmatij ke noyampa* amo kuali ika tajtouaj nejin yankuik taneltokalis”.
23 Yejua ika, yejuan kiixejekojkej mosentiliskej se tonal iuan, uan okachi miakej yajkej kampa yejua mokaujtoya. Uan desde kualkan hasta tiotak kinnojnotsak uan kuali* kinixmatiltij iTaixyekanalis Dios, uan ika iTanauatil Moisés uan tein kijkuilojkej Tanauatianij* kitemoj kichiuas maj taneltokakan iuan Jesús.
24 Sekin kineltokakej tein kijtouaya uan oksekin amo.
25 Uan kemej amo moyektenkauayaj, peuak youij. Pablo sayoj kijtoj nejin:
“Takaj yejua ika Dios ika ichikaualis kinnojnotsak namouejkaujtatuan itechkopa tanauatijkej Isaías
26 uan kijtoj: ‘Xiouj itech nejin xolal uan xikijto: “Namejuan nantakakiskej, sayoj ke amo keman nankiajsikamatiskej. Nantachiaskej, sayoj ke amo keman nankiitaskej teisa.
27 Porin akin nemij itech nejin xolal semi yoltakuauayakej. Monakastsakkej para amo keman takakiskej, uan ijkopkej para amo keman tachiaskej nion kiajsikamatiskej toni moneki kichiuaskej nion mokepaskej iuan Dios uan maj nejua nikinpajti”’.
28 Yejua ika, xikmatikan ke nejin tein Dios ika temakixtia no kinixmatiltijtokej akin amo judíos. Yejuan kemaj kikakiskej”.
29 *
30 Uan yejua mokauak ome xiuit itech kali tein taneujtoya ika renta. Kuali kinseliaya nochin akin kikalpanouayaj,
31 uan amo mouia kinixmatiltis iTaixyekanalis Dios uan ika kinmachtis toTekotsin Jesucristo, uan amo teyi kitsakuiliaya.
Tajtolmelaualismej
^ Oso “Tichiujkej”.
^ Nikan mokuik tajtol griego Díkē, tein xa kijtosneki tiotsin siuat akin tetatsakuiltia.
^ Oso “tekol”.
^ Oso “kichatoyaj”.
^ Oso “tamititika”, “tamitemi”.
^ Oso “totoniaya”.
^ Oso “kipiaya disentería”.
^ Oso “ataujkopa”, “tauakalkopa”.
^ Itech griego, “César”.
^ Oso “kichatokej”.
^ Oso “nouian”.
^ Oso “ajsitok”.
^ Xikonita tanauatijkej.
^ Nejin versículo moajsi itech seki Biblias, sayoj ke itech miak uejkauj amatajkuilolmej itech tajtol griego amo yetok.
