Juan 11:1-57
11 Itech xolal Betania nemia se takat akin monotsaya Lázaro uan yejua mokokouaya. Uan iikniuan, María uan Marta, no ompa nemiaj.
2 Nejin María, iikniuj Lázaro, yejua akin kimetstekilij toTekotsin aceite tein kualtsin ajuiyak uan kimetsuajuatsak ika itson.
3 Yejua ika iikniuan tatitankej maj kiluitij Jesús: “ToTekotsin, xikita, motasojikniuj mokokoua”.
4 Sayoj ke, keman Jesús kikakik, kijtoj: “Nejin kokolis* amo kimiktis, ta kichiuas maj moueyitali Dios uan maj iKoneuj Dios no moueyitali”.
5 Jesús kintasojtaya Marta, María uan Lázaro.
6 Sayoj ke, keman kimatik ke Lázaro mokokouaya, mokauak ome tonalok kampa yetoya.
7 Uan kiniluij imomachtijkauan: “Maj oksepa tiakan Judea”.
8 Sayoj ke imomachtijkauan kiluijkej: “Tamachtijkej,* ayamo uejkaua akin nemij Judea kinekiaj mitstetemaskej,* ¿uan tiknemilijtok oksepa ompa tias?”.
9 Jesús kinnankilij: “Itech se tonal, 12 horas tanestok, ¿melauj? Akin nejnemi tonayan, amo teyi ika mometsteloua* porin tanex kikaua maj tachia.
10 Sayoj ke akin nejnemi keman tayouayan, mometsteloua porin amo teyi kitauilia”.*
11 Keman kitamiijtoj nejin, no kijtoj: “Totasojikniuj Lázaro kochik, sayoj ke nejua niouj ompa nikijxititi”.*
12 Yejua ika imomachtijkauan kiluijkej: “ToTekotsin, komo kochtok, nenkentis”.
13 Tein melauj, Jesús kijtosnekia ke Lázaro momikilijkaya. Sayoj ke yejuan kinemiliayaj ke kijtosnekia ke kochtoya, moseuijtoya.
14 Uan Jesús kinyekiluij: “Lázaro momikilijya,
15 uan niyolpaki maj amo ompa nietoni, porin tein nikchiuati namechpaleuis xitaneltokakan. Tiouij kampa yetok”.
16 Yejua ika Tomás, akin kiluiayaj Cuate,* kiniluij okseki imomachtijkauan Jesús: “Tejuan maj no tiakan uan maj iuan timikikan”.
17 Keman Jesús ajsik, kimatik ke Lázaro kiuikayaya naui tonal itech miketekoch.
18 Betania amo uejka yetoya de Jerusalén, kemej eyi mil metro.*
19 Miakej judíos ualajkaj kinitakoj Marta uan María para kinyolseuiskej porin ininikniuj momikilijka.
20 Keman Marta kimatik ke Jesús ualajtoya, kinamikito; sayoj ke María mokauak kalijtik.
21 Uan Marta kiluij Jesús: “NoTekotsin, komo nikan tietoskia, noknitsin amo momikiliskia.
22 Maski ijkon, nikyekmati ke nochi tein tiktajtanis Dios, yejua mitsmakas”.
23 Jesús kiluij: “Mokniuj oksepa nemiti”.*
24 Marta kinankilij: “Nejua nikmati ke oksepa nemis* keman mikemej oksepa nemiskej, satepan keman ejkos tonal”.
25 Jesús kiluij: “Nejua nikchiua maj mikemej oksepa nemikan uan nejua nikinpaleuia maj miakej kisentokakan nemikan. Akin nouan takuaujtamatis, maski momikilis, oksepa nemis;
26 uan akin yoltok uan nouan takuaujtamatis amo keman momikilis. ¿Tikneltoka nejin?”.
27 Yejua kiluij: “Kemaj noTekotsin, nejua nikneltoka ke tejua tiCristo, iKoneuj Dios, akin monekia ualas nikan taltikpak”.
28 Keman kitamiijtoj nejin, kinotsato iikniuj, María uan kiichtakailuij: “Tamachtijkej nikan yetokya uan mitsnotsa”.
29 Nimantsin keman María kikakik nejin, moketsak uan kiitato.
30 Jesús ayamo kalakia itech xolal, ta kisentokaya ompa kampa Marta kinamikito.
31 Keman judíos akin kiyolseuijtoyaj María ompa kalijtik kiitakej ke moketstikisak uan yajki, kitojtokakej porin kinemilijkej ke yaya chokati kampa yetoya miketekoch.
32 Keman María ajsik kampa yetoya Jesús uan kiitak, motankuaketsak iixpan uan kiluij: “NoTekotsin, komo nikan tietoskia, noknitsin amo momikiliskia”.
33 Keman Jesús kiitak ke yejua chokatoya uan no judíos akin iuan yayaj, semi moueyiyoltayokoltij uan yoltajyouij.
34 Kintajtanij:* “¿Kani nankitalijkej?”. Yejuan kinankilijkej: “ToTekotsin, xikitaki”.
35 Jesús ixayojtemok.
36 Keman kiitakej, judíos peujkej kijtouaj: “¡Xikitakan, semi kitasojtaya!”.
37 Sayoj ke sekin kijtouayaj: “Komo nejin takat kiixpajtij akin amo tachiaya, ¿amo ueliskia no kichiuas maj Lázaro amo momikiliani?”.
38 Jesús oksepa moyoltayokoltij uan yajki kampa yetoya miketekoch. Tein melauj katka se tepekoyok, uan tentsaktoya ika se tet.
39 Jesús kijtoj: “Xikajchiuakan tet”. Sayoj ke Marta, iikniuj Lázaro, kiluij: “NoTekotsin, xa tsojyakya porin naui tonalya momikilij”.
40 Jesús kiluij: “¿Amo nimitsiluij ke komo titaneltokaya ueliskia tikitas iueyi chikaualis Dios?”.
41 Yejua ika kiajchiujkej tet. Uan Jesús moixajokuik uan kijtoj: “NoTajtsin, nimitstasojkamatilia porin tinechkaki.
42 Nejua nikmati ke tejua nochipa tinechkaki, sayoj ke nikijtoua porin nikan yetokej miakej, para maj kineltokakan ke tejua tinechualtitanik”.
43 Keman kitamiijtoj nejin, chikauak kijtoj: “¡Lázaro, xiualkisa!”.
44 Akin momikilijkaya, ualkisak. Metsilpitoya, mailpitoya* uan ixpiktoya ika seki tasal. Jesús kiniluij: “Xiktojtomakan uan xikauakan maj youi”.
45 Yejua ika, keman kiitakej tein Jesús kichiuak, miakej judíos akin ualajkaj kikalpanokoj María, itech takuaujtamatkej.
46 Sayoj ke sekin kiniluitoj fariseos tein Jesús kichiujka.
47 Yejua ika uejueyi tiopixkamej uan fariseos, kinsentilijkej Uejueyi Tamelauanij* uan kijtojkej: “¿Toni tikchiuatij? Porin nejin takat kichiua miak milagros.
48 Komo tikauaj maj ijkon kisentoka, nochin itech takuaujtamatiskej uan romanos ualaskej uan techkuiliskej totemplo uan toaltepeuj”.
49 Sayoj ke se takat akin monotsaya Caifás yetoya iniuan. Yejua katka tayekankatiopixkat nejon xiuit, uan kiniluij: “Namejuan amo teyi nankiajsikamatij.
50 Amo nankiajsikamatij ke okachi kuali maj miki sayoj se takat para kinpaleuis nochin uan amo maj kiixpolokan nochi altepet”.
51 Sayoj ke nejin amo kijtoj porin yejua ijkon kinemilij, ta kemej katka tayekankatiopixkat nejon xiuit, Dios kichiuak maj kijto ke Jesús mikiskia para kinpaleuis judíos.
52 Uan amo sayoj judíos, ta no para kinsentilis ikoneuan Dios akin moyaujtoyaj.*
53 Yejua ika, nejon tonal peujkej kiixejekouaj keniuj kimiktiskej.
54 Yejua ika Jesús amo nentinemiaok ininixpan judíos uan yajki itech se tal tein amo uejka yetoya den taluakyan, itech se ueyi xolal tein monotsa Efraín, uan ompa mokauak iniuan imomachtijkauan.
55 Amo uejkaua judíos yaya kichiuatij iluit tein monotsa Pascua, uan miakej akin nemiaj itech tataman xolaltsitsin pankiskej Jerusalén para mochipauaskej ijkon kemej kijtoua iTanauatil Moisés.
56 Yejuan peujkej kiixtemouaj Jesús. Keman yetoyaj itech templo moiluiayaj: “¿Toni nankinemiliaj? ¿Amo ualas iluitikiuj?”.
57 Sayoj ke uejueyi tiopixkamej uan fariseos tanauatijkaj ke komo aksa* kimatia kani yetoya Jesús, maj kiniluianij para ueliskia kikitskiskej.
Tajtolmelaualismej
^ Oso “kokoxkayot”.
^ Itech griego, “Rabí”.
^ Oso “mitstepoxoniskej”, “mitsmojmotaskej ika tet”.
^ Oso “motepotamia”.
^ Oso “tanex amo itech yetok”.
^ Oso “niktachialtiti”, “nikixpetaniti”.
^ Oso “Dídimo”.
^ Itech griego, “kemej 15 estadios”. Itamachiuj se estadio katka 185 metros.
^ Itech griego, “moajokuiti”.
^ Itech griego, “moajokuis”.
^ Oso “Kintajtoltij”.
^ Oso “Metstsikaujtoya, matsikaujtoya”.
^ Oso “xintoyaj”.
^ Oso “akin”, “akaj”.
