Jueces 10:1-18
10 Satepan ke Abimélec mikik, Dios kiixtalij Tolá maj mochiua ininjuez israelitas para maj kinmakixti. Tolá katka iokichpil Pua, iueyitat katka Dodó uan pouia iniuan ichankauan Isacar. Nemia kampa tepeyoj, itech ueyi xolal Samir tein yetok kampa kintaxejxelouilijkaj ichankauan Efraín.
2 Tolá katka ininjuez israelitas 23 xiujmej. Satepan mikik uan kitokkej ompa Samir.
3 Satepan Dios kiixtalij Jaír akin ualeuaya Galaad maj mochiua ininjuez israelitas. Uan yejua kinixyekanak 22 xiujmej.
4 Jaír kinpiak 30 ikoneuan. Sejse ikoneuj iaxka katka se ueyi xolal uan no kipiayaj sejse burro. Hasta axkan nejon 30 uejueyi xolalmej moixmatij kemej Havot-Jaír uan pouij ompa Galaad.
5 Jaír mikik uan kitokkej itech ueyi xolal Camón.
6 Uan israelitas oksepa kichiujkej tein Jehová amo kiyolpaktia. Uan peuak kinueyichiuaj tatadiosmej* tein moixmatij kemej Baal uan Astoret. No peuak kinueyichiuaj inintatadiosuan akin nemiaj Aram,* Sidón uan Moab. No kinueyichiuayaj inintatadiosuan ammonitas uan filisteos. Kiixnamikkej Jehová uan amo kiueyichiujkejok.
7 Yejua ika, Jehová semi kualanik iniuan israelitas uan kikauak maj filisteos uan ammonitas kinteltekitiltianij.
8 Nejon xiuit semi kintajyouiltijkej israelitas akin nemiaj Galaad. Uan kisentokakej kintajyouiltijkej 18 xiujmej. Yejuan nemiaj kampa achto nemiaj amorreos, oksekopa den ueyiat Jordán.
9 Uan no, ammonitas kipanauiayaj ueyiat Jordán para kinteuiskej ichankauan Judá, Benjamín uan Efraín. Yejua ika, israelitas semi tajyouiayaj.
10 Uan kitataujtijkej Jehová maj kinpaleui. Yejuan kiluiayaj: “Tikchiujkej tein semi amo kuali porin timitsixnamikkej uan tikinueyichiujkej Baales”.
11 Sayoj ke Jehová kiniluij israelitas: “Nejua namechpaleuij keman namechtajyouiltijkej egipcios, amorreos, ammonitas uan filisteos.
12 No namechpaleuij keman namechtajyouiltijkej sidonios, amalequitas uan madianitas. Keman nanechtataujtiayaj maj namechpaleui, nejua namechmakixtiaya.
13 Sayoj ke, kemej nanechixnamikkej uan nankinueyichiujkej tatadiosmej,* amo sepaok namechmakixtis.
14 Xikiniluikan tatadiosmej maj namechpaleuikan, ta nankiixtalijkej yejuan nankinueyichiuaskej; maj yejuan namechpaleuikan keman nantajyouijtoskej”.
15 Sayoj ke israelitas kiluijkej Jehová: “Tikchiujkej tein semi amo kuali. Xitechtatsakuilti kemej tikitas ke kuali yetok. Sayoj ke timitstataujtiaj xitechmakixti maski sayoj axkan”.
16 Uan kinixpolojkej tatadiosmej* uan oksepa peuak kiueyichiuaj Jehová. Yejua ika, Dios semi kiniknelij israelitas uan amo taxikojok. Yejua amo kinekiaok kiitas maj tajyouikan.
17 Satepan ammonitas mosentilijkej ompa Galaad para kinteuiskej israelitas. Uan israelitas no mosentilijkej ompa Mizpá.
18 Israelitas akin nemiaj Galaad uan akin kinixyekanayaj moiluiayaj: “¿Akoni techixyekanas keman timoteuiskej iniuan ammonitas? Akin techixyekanas maj no kinixyekana nochin akin nemij Galaad”.
