Jueces 11:1-40
11 Jefté katka kayot Galaad uan katka se soldado akin semi kuali tateuiaya. Inan katka se siuat akin monamakaya iniuan takamej uan itat monotsaya Galaad.
2 Sayoj ke isiuauj Galaad no kinpiak konemej. Keman yejuan moskaltijkej, kitokakej* Jefté uan kiluijkej: “Amo timitsmakaskej nion se tal tein iaxka topaj porin tiikoneuj okse siuat”.
3 Yejua ika Jefté kincholuij* iikniuan uan mokaltalito ompa Tob. Uan iuan yajkej seki takamej akin amo kipiayaj tekit.
4 Seki tonalmej satepan, ammonitas peuak kinteuiaj israelitas.
5 Keman akin taixyekanayaj Galaad kiitakej nejon, yajkej kikuitoj Jefté ompa Tob.
6 Keman ajsikej kiluijkej: “Tiknekij tejua xikinixyekana soldados para tikinteuiskej ammonitas”.
7 Sayoj ke Jefté kinnankilij akin taixyekanayaj* Galaad: “Namejuan semi nanechtauelitakej uan nanechtokakej* de ichan nopaj. Uan axkan ke nantajyouijtokej nankinekijya maj namechpaleui”.
8 Uan yejuan kiluijkej Jefté: “Kemaj, tiknekij xitechpaleui maj tikinteuikan ammonitas. Komo titechpaleuia, timitsixtaliskej tejua xikinixyekana nochin akin nemij Galaad”.
9 Uan Jefté kiniluij: “Nias namouan nikinteuitiuj ammonitas porin namejuan nankinekij maj niouj. Uan komo Jehová nechpaleuia maj nikintani, nejua namechixyekanas”.
10 Uan akin taixyekanayaj Galaad kiluijkej Jefté: “Jehová techkaktok. Maj yejua techtatsakuilti komo amo tikchiuaj tein tikijtoj”.
11 Uan Jefté yajki iniuan, uan israelitas kiixtalijkej maj kinixyekana soldados uan maj no kinixyekana nochin israelitas. Uan ompa Mizpá, Jefté oksepa kijtoj tein motenkaujka iniuan akin taixyekanayaj Galaad. Oksepa kijtoj para maj Jehová uan nochin israelitas kikakikan.
12 Jefté tanauatij maj kiitatij inintekiuaj ammonitas uan maj kiluikan: “¿Toni nimitschiuilij para titateuikiuj nikan kampa ninemi?”.
13 Uan inintekiuaj ammonitas kiniluij akin kiitatoj: “Nimitsteuiko porin israelitas nechtalkuilijkej keman kiskej de Egipto. Mokuilijkej tal tein peua ueyiat* Arnón uan tein tami hasta ueyiat Jaboc. Nejin tal no monamiki iuan ueyiat Jordán. Xinechkepili uan amo nimitsteuisok”.
14 Sayoj ke Jefté oksepa kintitanik seki takamej maj kiitatij inintekiuaj ammonitas.
15 Yejuan kiluijkej:
“Yejua nejin tein kijtoua Jefté: ‘Israelitas amo kintalkuilijkej moabitas nion ammonitas.
16 Keman israelitas kiskej de Egipto, nejnenkej taluakyan hasta mar Rojo uan ajsikej Cadés.
17 Uan israelitas kintitankej seki takamej maj kiitatij akin taixyekanaya Edom uan maj kiluikan: “Timitstataujtiaj xitechkaua maj tipanokan motalpankopa”. Sayoj ke akin taixyekanaya Edom amo kinkauak maj panokan. Uan akin taixyekanaya Moab amo no kinkauak maj panokan. Yejua ika israelitas mokaujkej ompa Cadés.
18 Keman nejnenkej taluakyan kitayoualuijkej* inintal edomitas uan inintal moabitas. Panokej tanakastan de inintal moabitas kampa kisa tonaltsin uan kitalijkej ininkaltsitsin* tanakastan den ueyiat* Arnón. Amo panokej kampa yetoya inintal moabitas porin inintal tamia hasta ueyiat Arnón.
19 ”’ Satepan israelitas kintitankej seki takamej maj kiitatij Sehón inintekiuaj amorreos akin nemia Hesbón. Yejuan kiluijkej: “Timitstataujtiaj xitechkaua maj tipanokan motalpankopa para tiajsiskej kampa tiouij”.
20 Sayoj ke Sehón amo kineltokak ke israelitas sayoj ompaka panoskiaj, yejua ika amo kinkauak maj panokan, ta kinsentilij isoldados uan yajkej Jáhaz. Ompa kitalijkej ininkaltsitsin uan kinteuijkej israelitas.
21 Keman Jehová ininDios israelitas kiitak nejon, kinpaleuij israelitas maj kitanikan tekiuaj Sehón uan nochin isoldados. Israelitas kintankej nochin amorreos uan kintalkuilijkej.
22 Ijkon mokuilijkej inintal amorreos tein peuaya desde ueyiat Arnón uan tamia hasta ueyiat* Jaboc. Oksekopa peuaya taluakyan uan tamia hasta ueyiat Jordán.
23 ”’Jehová ininDios israelitas kintalkuilij amorreos para kinmakas israelitas. ¿Keyej axkan tikneki tikinkuilis tein Dios kinmakak?
24 ¿Xe amo timokauilia nochi tein modios Kemós mitsmaka? Tejuan ijkon tikchiuaj, timokauiliaj nochin talmej tein toDios Jehová techmaka.
25 Balac ikoneuj Zipor amo keman motajtolteuij iniuan israelitas para maj kikepilikan tal tein achto katka iaxka. Komo yejua amo kichiuak uan okachi ueyichiujkej katka, ¿keyej tejua tikneki* tikintalkuilis?
26 Israelitas 300 xiujmejya neminij Hesbón uan Aroer uan itech xolaltsitsin tein ompa pouij. No neminij itech nochi uejueyi xolalmej tein yetokej tatenoj den ueyiat* Arnón. ¿Keyej hasta yekintsin nantateuijtokej para maj tamechkepilikan nejin talmej?
27 Nejua amo teyi nimitschiuiliani para xinechteuiki. Maj Jehová akin sayoj yejua Juez, kiyektali* kuejmol tein kipiaj israelitas uan ammonitas’”.
28 Sayoj ke inintekiuaj ammonitas amo kikakik tein Jefté kijtoj.
29 Jehová kimakak Jefté ichikaualis. Uan yejua kipanauij Galaad uan tal tein ininaxka katka ichankauan Manasés uan ajsik Mizpé tein poui Galaad. Uan desde Mizpé kisteuak para kinteuitiuj ammonitas.
30 Uan Jefté kiluij* Jehová: “Komo tinechpaleuia maj nikintani ammonitas,
31 nimotenkaua ke keman nikintanis uan nimokepas nochan, nimitsmaktilis akin yekinika nechnamikikiuj. Nimitsmaktilis tejua Jehová kemej yeskia nimitschichinouiliskia se tapial”.*
32 Jefté kinteuito ammonitas uan Jehová kipaleuij maj kintani.
33 Yejua kinmiktijtiajki desde Aroer hasta Minit uan ajsik hasta Abel-Keramim. Semi miakej kinmiktij uan moinaxkatilij 20 uejueyi xolalmej. Ijkon israelitas kintankej ammonitas.
34 Keman Jefté mokepak ichan ompa Mizpá, isiuapil kinamikito. Yejua mijtotijtiaya uan kitejtelojtiaya* se tambortsin.* Amo kinpiaya okseki ikoneuan ta ipa sayoj setsin isiuapil.
35 Keman Jefté kiitak isiuapil, kitsayanak itasal* uan kiluij: “Nokonetsin, fiero nikmachilia porin amo nouan tietosok uan amo nimitsitasok. Nimotenkauak iuan Jehová ke nikchiuaskia teisa uan amo ueliok nimotenkepa”.
36 Sayoj ke isiuapil kiluij: “Paj, komo timotenkauak iuan Jehová ke tinechtemaktiskia, xikchiua tein tikiluij porin Jehová mitspaleuij xikintani ammonitas”.
37 Uan no kiluij: “Xinechkaua maj niouj ome metsti kampa tepeyoj. Nias nichokatiuj iniuan okseki siuapipil* porin amo keman nimonamiktis”.
38 Jefté kiluij: “Kemaj, xiouj”. Kikauak maj youi ome metsti kampa tepeyoj. Uan yejua chokato iniuan okseki siuapipil porin amo keman monamiktiskia.
39 Isiuapil Jefté mokepak ichan keman panok ome metsti uan Jefté kichiuak tein kijtojka. Siuapil amo keman motekak iuan se takat. Uan israelitas peujkej kichiuaj nejin:
40 ininsiuapipiluan israelitas xijxiujtika yayaj naui tonal* kiyolchikauatij isiuapil Jefté akin katka kayot Galaad.
Tajtolmelaualismej
^ Oso “kieualtijkej”.
^ Oso “kincholouilij”.
^ Xa itakpaikniuan Jefté katkaj ueyichiuanimej uan taixyekanayaj ompa Galaad.
^ Oso “nanecheualtijkej”.
^ Oso “atauit (ojpanat)”.
^ Oso “kitakoluijkej”.
^ Nejin kaltsitsin chijchiujtoyaj ika tasal (tilmaj).
^ Oso “atauit (ojpanat)”.
^ Oso “atauit (ojpanat)”.
^ Oso “timoixeuia”.
^ Oso “atauit (ojpanat)”.
^ Oso “kimelaua”.
^ Oso “motenkauak iuan”.
^ Nejin xa kijtosneki ke kitemakaskia para maj nochipa kitekitili Dios.
^ Oso “kiuijuitektiaya”.
^ Oso “pandereta”.
^ Oso “itilmaj”.
^ Oso “iniuan akin kuali iniuan nimouika”.
^ Oso “yayaj naujpa itech xiuit”.
