Jueces 14:1-20
14 Sansón yajki Timná uan ompa kiitak se siuat filistea.*
2 Keman mokepak ichan kiniluij itatuan: “Nikueuelitak se filistea ompa Timná. Xinechijtanilitij para maj iuan nimonamikti”.
3 Sayoj ke itatuan kiluijkej: “Nikan no onkakej siuapipil, uelis semej iuan timonamiktis. ¿Keyej tikneki timonamiktis iuan semej ininsiuapipiluan filisteos ta yejuan amo kitekitiliaj Dios?”. Sayoj ke Sansón kiluij itat: “Xinechijtaniliti, porin yejua akin nikueuelita”.
4 Itatuan amo kimatiaj ke Jehová kichiujtoya maj kinekini monamiktis iuan se ininsiuapil filisteos. Yejua* kitemojtoya keniuj kintatsakuiltis filisteos porin miak xiujmejya kintajyouiltijtoyaj israelitas.
5 Sansón yajki Timná iniuan itatuan. Keman ajsik kampa toktoyaj uvas ompa Timná, ualkisak se león tein nanalkatiualaya.
6 Ijkuak, Jehová kimakak Sansón ichikaualis uan Sansón kiixtapanak león ika imauan. Kiixtapanak kemej ipa kiixtapanaj se chivo. Sayoj ke amo kiniluij itatuan tein kichiujka.
7 Satepan Sansón yajki Timná kinojnotsato siuat filistea porin kisentokaya kiueuelitaya.
8 Satepan, keman oksepa kitemoto siuat para kiuikas ichan, kinalitato león tein kimiktijka. Seki nektsitsin* motachijchiuijkaj iijtik león uan onkaya nekti.*
9 Sansón kikixtij nekti* ika imauan uan kikuajtiajki. Uan keman kinajsito itatuan, no kinuantik.* Sayoj ke amo kiniluij ke kikixtijka de se león tein kimiktijka.
10 Sansón uan itat yajkej kampa nemia siuat uan ompa iluichiujkej, porin yejua nejon tein kichiuayaj takamej akin yaya monamiktitij.
11 Keman akin ompa nemiaj kiitakej Sansón, kiualkuilijkej 30 takamej para maj kipaleuikan.
12 Sansón kiniluij: “Namechtapouiti se taman uan komo nankimatij toni ika nitajtojtok namechmakas 30 linojtasal* uan okseki 30 tataman tasal. Sayoj ke moneki nanechiluiskej toni ika nitajtojtok achto ke tamis nejin iluit.
13 Komo amo nankimatij, namejuan nanechmakaskej 30 linojtasal uan okseki 30 tataman tasal”.* Yejuan kiluijkej: “Kemaj, xitechtapoui”.
14 Sansón kijtoj:
“Tein tekua kitemakak tein se kikua,uan tein chikauak itech kisak teisa tein tsopek”.
Panokaya eyi tonal uan yejuan ayamo kimatiaj toni kijtosnekia.
15 Mostika kiluijkej isiuatsin* Sansón: “Xikajkayaua motakatsin para maj techilui toni kijtosneki tein techtapouij. Komo amo titechpaleuia, timitschichinoskej uan no tikinchichinoskej nochin akin nemij ichan mopaj. Amo tiiluitikoj para nantechkuiliskej tein tikpiaj”.
16 Yejua ika isiuatsin Sansón chokaya uan kiteliluiaya: “Tikijtoua ke tinechtasojta, sayoj ke amo nimitsneltokilia porin amo tinechiluiani toni kijtosneki tein tikintapouij takamej akin ualajkej”. Sansón kiluij: “Keyej tikneki maj nimitsilui, ta nion nopaj nion nomaj nikiniluiani toni kijtosneki”.
17 Sayoj ke isiuatsin Sansón amo mosenkauak, ta mojmostaj kichokilijtoya hasta keman yaya tamitia iluit. Nejon iluit uejkauaya chikome tonal. Keman yaya tamitia iluit, Sansón kiluij isiuatsin toni kijtosnekia tein kintapouij takamej porin kiyolajxitijkaya. Uan isiuatsin nimantsin kiniluito takamej.
18 Chikometika tonal keman yaya tamitia iluit, takamej kiluijkej Sansón achto ke tapoyauiskia:*
“¿Toni okachi tsopek ke nekti,*uan toni okachi chikauak ke se león?”.
Sansón kiniluij:
“Komo nosiuatsin amo namechpaleuiskia,*amo nankimatiskiaj toni kijtosneki tein namechiluij”.
19 Jehová kimakak Sansón ichikaualis uan Sansón yajki Asquelón. Uan kemej semi chikauak katka kinmiktij 30 filisteos, kinkuilij inintasal* uan kinmakak takamej akin kimatkej toni kijtosnekia tein kintapouijka. Satepan mokepak ichan itat uan tel kualantiaya.
20 Uan isiuatsin Sansón kinamiktijkej iuan se takat akin kipaleuijka Sansón keman iluichiuak.
Tajtolmelaualismej
^ Itech hebreo, “semej ininsiuapipiluan filisteos”.
^ Nikan xa ika motajtojtok Dios.
^ Oso “abejas”.
^ Oso “miel”.
^ Oso “miel”.
^ Oso “kinyekoltij”.
^ Oso “linojtilmaj”.
^ Oso “tilmaj”.
^ Itech nejon tonalmej, keman se takat kijtankaya se siuat kinitayaj kemej yeskia monamiktijkajya.
^ Oso xa “achto ke kalakiskia icuarto isiuatsin”.
^ Oso “miel”.
^ Itech hebreo, “Komo amo nankikuiskiaj nokuakouej para nantalkaxaniskej”.
^ Oso “inintilmaj”.
