Jueces 16:1-31
16 Se tonal, Sansón yajki Gaza. Ompa kiitak se siuat akin monamakaya iniuan takamej uan kalakik ichan.
2 Akin nemiaj Gaza kimatkej ke Sansón ompa yetoya. Yejua ika kiyoualojkej nochi ueyi xolal. Uan sekin mokaujkej nochi youal kampa yetoya puerta tein kipia ueyi xolal. Yejuan kinekiaj kiichtakauiskej Sansón uan moiluiayaj: “Tikmiktiskej keman tanesis”.
3 Sansón kochtiajki uan ijsak* tajkoyouan. Meuak uan kiejkeuak puerta tein ika tatsaktoya ueyi xolal. No kinejkeuak kalikximej kampa pilkatoya puerta uan kouit tein kiixtapaltaliayaj para tatsakuaskej. Momamaltij uan kiuikak nochi hasta ikuapan tepet tein yetok iixpan Hebrón.
4 Panok in tiempo uan Sansón semi kiueuelitak se siuat akin monotsaya Dalila. Yejua nemia kampa tal tamanis* tein moixmati kemej Sorec.
5 Uan akin kinixyekanayaj filisteos kiitatoj Dalila uan kiluijkej: “Xikchiua* maj mitsilui keyej tel chikauak. Maj mitsilui keniuj tiktaniskej uan keniuj uelis tikilpiskej.* Komo titechiluia, sejse timitsmakaskej 12 kilos uan tajko* de plata”.
6 Uan Dalila kiluij Sansón: “Nimitstataujtia xinechilui keyej titelchikauak, uan ika toni uelis mitsilpiskej* para amo uelisok tikchiuas nion teyi”.
7 Sansón kiluij: “Komo nechilpiaj ika chikome mekat tein yankuikej uan apaltikej, tamis nochikaualis uan ijkon niyeski kemej okseki takamej”.
8 Akin kinixyekanayaj filisteos kiuikilijkej Dalila chikome mekat. Yejua kiilpij* Sansón ika nejon mekat tein yankuikej uan apaltikej.
9 Keman kichiujtoya nejon, seki filisteos motatijtoyaj* itech okse cuarto para kiichtakauiskej Sansón. Uan Dalila kitsajtsilij: “¡Sansón, filisteos mitskitskitij!”. Sansón niman kikokototsak mekat tein ika kiilpijkaj.* Nejon mekat kotonik kemej ijkuak se hilo tachijchiuj ika lino kipanoltiaj itech tit.* Uan amo kimatkej keyej tel chikauak katka.
10 Uan Dalila kiluij Sansón: “¡Tinechkajkayauak! ¡Nouan timauiltijtok! Nimitstataujtia xinechilui ika toni uelis mitsilpiskej”.
11 Sansón kiluij: “Komo nechilpiaj ika lazos tein yankuikej, tamis nochikaualis”.
12 Yejua ika, Dalila kiilpij* ika seki lazos tein yankuikej, uan kitsajtsilij: “¡Sansón, filisteos mitskitskitij!”. Yejua nimantsin kikokototsak lazos tein ika kiilpijkaj.* Kinkokototsak kemej yeskia hilos. (Filisteos akin kinekiaj kiichtakauiskej Sansón yetoyajok itech cuarto).
13 Dalila kiluij Sansón: “Oksepa tinechkajkayauak uan nouan timauiltijtok. Xinechilui ika toni uelis mitsilpiskej”. Sansón kiluij: “Moneki tikijkitis chikome notrenzas ika hilos tein ika tajkitij”.
14 Dalila kichiuak nejon. Yejua kiijkitik itrenzas uan kitijtilintij ika se kouit tein ika tajkitij. Keman matamik kitsajtsilij: “¡Sansón, filisteos mitskitskitij!”. Sansón ijsatikisak,* uan kikixtij kouit tein ika tajkitij de itson uan kikokototsak hilos tein ika kikuaijilpijkaj.
15 Dalila kiluij: “Tikijtoua ke tinechtasojta, sayoj ke amo nochi tinechiluiani. Expaya tinechkajkayauak uan amo tinechiluia keyej titelchikauak”.
16 Kemej Dalila mojmostaj kikuejmolouaya, kikuasioujtij uan kitelyolajxitij.
17 Yejua ika Sansón kiluijya keyej tel chikauak: “Amo keman nechtekilianij notson, porin Dios nechijitak* desde ke niyolik* para yeski ninazareo. Komo nechkuatekiskiaj,* tamiskia nochikaualis”.
18 Dalila kiitak ke Sansón amo kikajkayaujtoyaok, ta kiyekiluijtoyaya keyej semi chikauak. Yejua ika niman tanauatij maj kinnotsatij akin kinixyekanayaj filisteos. Dalila kiniluij: “Xiualakan porin axkan nechyekiluijya keyej tel chikauak”. Yejuan yajkej kiitatoj uan kiuikilijkej tomin tein kimakaskiaj.
19 Dalila kikochtij Sansón itankuako. Satepan kinotsak se takat para maj kitekili chikome itrenzas. Ijkon Dalila kichiuak maj amo chikauakok.
20 Uan Dalila kitsajtsilij: “¡Sansón, filisteos mitskitskitij!”. Sansón ijsatikisak* uan moiluij: “Nikchiuas kemej ipa nikchiuani uan amo teyi nechchiuiliskej”. Sayoj ke amo kimatia ke Jehová amo kipaleuijtoyaok.
21 Filisteos kikitskijkej uan kikixtilijkej iixtololouan. Satepan kiuikakej Gaza uan kiilpijkej* ika ome cadenas tein chijchiujtoyaj de cobre. Uan kampa tsaktoya kichiujkej maj kimamalakacho se tet tein ika takuechouaj.
22 Sayoj ke itson oksepa moskaltij.
23 Akin kinixyekanayaj filisteos mosentilijkej para kimaktiliskej tapialmej inintatadios* Dagón. No mosentilijkej para iluichiuaskej porin tatankej. Yejuan kijtouayaj: “¡Todios techpaleuij maj tiktanikan Sansón, akin techtauelita!”.
24 Keman akin mosentilijkaj kiitakej inintatadios, peuak kiueyichiuaj. Yejuan kijtouayaj: “Todios techpaleuij maj tiktanikan akin techtauelita. Yejua semi tauejueloj nikan kampa tinemij uan kinmiktij miakej”.
25 Kemej semi yolpakiaj, peuak moiluiaj: “Xikualkuikan Sansón para maj tikejkelokan”. Yejuan kikixtitoj Sansón kampa tsaktoya para kikejkeloskej. Kiuikakej uan kiketsatoj tatajko den kalikximej.
26 Sansón kiluij okichpil tein kimakitskijtiaya: “Xinechpaleui maj nikmaajsi ikalikxiuan nejin kali para maj ompa nimotakitskili”.
27 (Itech nejon kali mosentilijkaj tel miakej takamej uan siuamej. No ompa yetoyaj nochin akin kinixyekanayaj filisteos. Uan kalkuako* yetoyaj eyi mil takamej uan siuamej akin kiueuetskilijtoyaj* Sansón).
28 Sansón kitataujtij Jehová: “NoUeyi Teko Jehová, nimitstataujtia xinechchikaua maski sayoj axkan. Filisteos nechinkixtilijkej nochi ome noixtololouan, xinechpaleui maj nikinixtaualti maski sayoj se noixtololo”.
29 Sansón motakitskilij itech kalikximej tein yetoyaj tatajko kali. Ika se imay kikitskij se kalikxit uan ika okse imay kikitskij okse.
30 Sansón chikauak kijtoj: “¡Maj iniuan nimiki filisteos!”. Uan chikauak kintopeuak kalikximej uan kali uetsik. Kinpechij nochin akin kinixyekanayaj filisteos uan akin ompa mosentilijkaj. Sansón ipa kinmiktijkaya miakej filisteos sayoj ke nejon tonal kinmiktij okachi miakej. Uan ijkuak yejua no mikik.
31 Satepan, ichankauan Sansón yajkej Gaza kikuitoj uan kitokatoj kampa kitokkaj Manóah akin katka itat. Miketekoch yetoya tatajko de Zorá uan Estaol. Sansón kinixyekanak israelitas 20 xiujmej.
Tajtolmelaualismej
^ Oso “tachiak”, “ixpetanik”.
^ Oso “takomol”.
^ Oso “Xikajkayaua para”.
^ Oso “tiktsikoskej”.
^ Oso “1,100 siclos”.
^ Oso “mitstsikoskej”.
^ Oso “kitsikoj”.
^ Oso “mocholtijtoyaj”.
^ Oso “kitsikojkaj”.
^ Oso “tekol”.
^ Oso “kitsikoj”.
^ Oso “kitsikojkaj”.
^ Oso “tachixtikisak”, “ixpetantikisak”.
^ Oso “nechixpejpenak”.
^ Itech hebreo, “desde ke nietoya iijtik nomaj”.
^ Oso “nechkuaximaskiaj”, “nechtsontekiskiaj”.
^ Oso “tachixtikisak”, “ixpetantikisak”.
^ Oso “kitsikojkej”.
^ Oso “inintiotsin”.
^ Oso “kaltipan”, “kalpani”.
^ Oso “kipakitstoyaj”.
