Jueces 17:1-13
-
Itatadiosuan Miqueas uan itiopixkauj (1-13)
17 Itech tal kampa tepeyoj kampa kintaxejxelouilijkaj ichankauan Efraín, nemia se takat akin monotsaya Miqueas.
2 Yejua kiluij inan: “Nejua nimitskuilij 12 kilos uan tajko* de plata tein tikpiaya. Nikelnamiki ke hasta tiknekia maj Dios kitatsakuilti akin mitsichtekilij”. Uan inan kiluij: “Maj Jehová mitstiochiua nokonetsin porin tinechiluij tein tikchiuak”.
3 Miqueas kikepilij inan 12 kilos uan tajko* de plata. Uan inan kiluij: “Nikmaktiliti Jehová nejin plata. Ximokauilia uan xikui para ika timochijchiuilis ome tatadiosmej* de plata”.
4 Miqueas kikepilij plata uan inan kixeloj ome kilo* plata uan kiuikilij akin tekitia ika plata. Nejon takat kichijchiuak ome tatadiosmej* uan kinkauatoj ichan Miqueas.
5 Yejua kipiaya se kali kampa kinueyichiuaya tatadiosmej.* Miqueas mochijchiuilij se koton tein kiluiaj efod* uan seki tatadiosmej,* uan kiixtalij semej ikoneuan maj mochiua itiopixkauj.
6 Ijkuak amo akin tekiuajtia ompa Israel. Sejse israelita kichiuaya tein kinemiliaya ke kuali yetok.
7 Ijkuak, moajsia se okichpil akin katka levita uan nemia ompa Belén tein poui Judá. Yejua mokaltalijka seki tonalmej iniuan ichankauan Judá.
8 Nejin okichpil kisak de Belén tein poui Judá uan kitemoto kani nemis. Yejua ajsito ichan Miqueas tein yetoya itech tal kampa tepeyoj kampa kintaxejxelouilijkaj ichankauan Efraín.
9 Miqueas kiluij nejon okichpil: “¿Kani tiualeuak?”. Okichpil kinankilij: “Nejua nilevita, nikisak de Belén tein poui Judá uan niktemojtinemi kani nichanchiuas”.
10 Miqueas kiluij: “Nikan ximokaua para tinechyolmajxitis uan timochiuas tinotiopixkauj. Xijxiujtika nimitsmakas 100 gramos* de plata, nimitsmakas tasal* uan nimitstamakas”. Yejua ika levita ompa mokauak.
11 Levita mokauak ichan Miqueas uan mochiuak kemej semej iokichpipiluan.
12 Miqueas kiixtalij maj mochiua itiopixkauj uan yejua kisentokak ompa chanchiuak.
13 Miqueas moluij: “Axkan Jehová nechtatiochiuis porin nejin levita notiopixkauj”.
Tajtolmelaualismej
^ Oso “1,100 siclos”.
^ Oso “1,100 siclos”.
^ Oso “tiotsitsin”.
^ Oso “200 siclos”.
^ Oso “tiotsitsin”.
^ Oso “tiotsitsin”.
^ Itech hebreo, “terafim”.
^ Oso “majtakti siclo”.
^ Oso “tilmaj”.
