Jueces 18:1-31
18 Itech nejon tonalmej, amo akin tekiuajtia ompa Israel. Uan ichankauan Dan kitemojtinemiaj kani nemiskej. Yejuan ayamo uelia moaxkatiliayaj tal tein israelitas kinxejxelouilijkaj.
2 Ichankauan Dan kintitankej makuil takamej maj kiitatij tal kampa ueliskia nemiskej. Yejuan katkaj takuaujtamachmej uan ualeuayaj Zorá uan Estaol. Ichankauan Dan kiniluijkej: “Xiakan xitachiatij kani uelis tinemiskej”. Yejuan ajsikej ichan Miqueas uan ompa mokaujkej nejon youak. Ichan Miqueas yetoya kampa tepeyoj kampa kintaxejxelouilijkaj ichankauan Efraín.
3 Keman ajsitiayajya ompa, kitenixmatkej okichpil akin katka levita. Yejua ika kitajtanitoj:* “¿Toni tikchiujtok nikan? ¿Akoni mitsualkuik? ¿Uan keyej timokauako?”.
4 Yejua kiniluij keniuj Miqueas kipaleuijka uan no kiniluij ke kiyoleujka maj kitekitili kemej itiopixkauj.
5 Yejuan kiluijkej: “Timitstataujtiaj xiktajtani Dios maj techmatilti ox tikajsiskej kani tinemiskej”.
6 Tiopixkat kiniluij: “Amo ximotekipachokan porin Jehová namechpaleuis kampa nanyaskej”.
7 Uan nejon makuil takamej yajkej uan ajsitoj Lais. Yejuan kiitakej ke akin ompa nemiaj katkaj kemej sidonios, porin amo mouikayaj iniuan akin nemiaj itech okseki xolalmej. Sidonios uejka yetoyaj uan akin nemiaj Lais kualtsin nemiaj uan amo akin kinteuiaya. Uan ompaka amo onkaya nion se taixyekankej akin ueliskia kintalkuilis uan kintajyouiltis.
8 Yejuan mokepkej Zorá uan Estaol kampa yetoyaj nochin ichankauan Dan. Keman ompa ajsikej, kintajtanijkej: “¿Toni nankiitakej?”.
9 Yejuan kiniluijkej: “Tikitakej ke ueyi xolal Lais semi takualtsinkan, yejua ika tiouij tikinteuitij akin ompa nemij. Maj timoijsiuilikan uan maj tiakan timoaxkatilitij nejon talmej.
10 Keman ompa tiajsiskej, nankiitaskej ke kualtsin nemij, ke taueyika uan ke semi taonkak. Dios techpaleuis maj timoaxkatilikan nejon talmej”.
11 Uan ichankauan Dan kintitankej 600 soldados maj tateuitij. Yejuan kiskej de Zorá uan Estaol.
12 Yajkej Judá uan kitalijkej ininkaltsitsin* amo uejka de Quiryat-Jearim kampa pankalaki tonaltsin. Yejua ika ompa moixmati kemej Mahané-Dan* hasta axkan.
13 Satepan yajkej kampa tepeyoj kampa kintaxejxelouilijkaj ichankauan Efraín uan ajsikej ichan Miqueas.
14 Uan makuil takamej akin yajkaj tapijpiatoj Lais, kiniluijkej oksekin ichankauan Dan: “Itech nejin kalmej kipiaj se koton tein kiluiaj efod,* ome tatadiosmej* tein chijchiujtokej ika plata uan okseki tatadiosmej.* Xikixejekokan toni nankichiuaskej”.
15 Yejuan moketskej kaltenoj uan makuil takamej yajkej kiitatoj levita akin nemia ichan Miqueas. Keman kiajsitoj, kitajtanijkej ox kuali yetoya.
16 Uan oksekin 600 soldados, mochixtoyaj* kaltenoj.
17 Uan makuil takamej akin yajkaj tapijpiatoj Lais, kalakitoj kalijtik para kiuikaskej koton,* ome tatadiosmej tein chijchiujtoyaj ika plata uan okseki tatadiosmej.* (Tiopixkat ijkatoya kaltenoj iniuan 600 soldados).
18 Yejuan kalakitoj ichan Miqueas uan mokuilijkej koton,* ome tatadiosmej tein chijchiujtoyaj ika plata uan okseki tatadiosmej. Uan tiopixkat kiniluij: “¿Keyej namouikilijtokej?”.
19 Yejuan kiluijkej: “¡Ximotentsakua! Amo teyi xikijto. Touan xiouj para titechyolmajxitis uan timochiuas titotiopixkauj. ¿Toni okachi tikuelitaskia? ¿Tiyeski tiitiopixkauj sayoj se takat? ¿Oso tikneki tiyeski tiinintiopixkauj miakej israelitas akin pouij itech se ueyi kalyetonij?”.
20 Tiopixkat kiuelitak nejon; yejua ika kikuik koton,* ome tatadiosmej* tein chijchiujtoyaj ika plata uan okseki tatadiosmej uan yajki iniuan.
21 Yejuan kisteujkej uan kintayekanaltijkej ininkoneuan, inintapialuan uan nochi tein kipiayaj.
22 Ivecinos Miqueas mosentilijkej para kintokatiaskej ichankauan Dan, sayoj ke yejuan uejka yajtoyajya. Maski ijkon kinajsitoj.
23 Keman kinajsitoj, kinikantsajtsilijkej. Ichankauan Dan moixkepkej uan kiluijkej Miqueas: “¿Toni timitschiuilijkej? ¿Keyej miakej tikinsentilij?”.
24 Miqueas kiniluij: “Nanechkuilijkej tatadiosmej* tein nimoinchijchiuilij, uan no nankiuikakej notiopixkauj. ¿Keniuj maj amo teyi nikchiua ta amo teyi nanechkauilijkej?”.
25 Ichankauan Dan kiluijkej: “Amo xitechtsajtsili, amokan namechteuijkej* seki takamej akin niman kualanij. Yejuan uelis mitsmiktiskej uan no kinmiktiskej nochin akin nemij mochan”.
26 Keman kitamiiluijkej nejon, ichankauan Dan yajkej. Miqueas kiitak ke amo ueliskia kintanis porin okachi miakej katkaj, yejua ika mokepak ichan.
27 Ichankauan Dan mouikilijkej itatadiosuan* uan itiopixkauj Miqueas uan yajkej Lais. Akin nemiaj Lais kualtsin nemiaj uan amo akin kinteuiaya. Keman ichankauan Dan ompa ajsitoj, kinmiktijkej nochin akin ompa nemiaj ika ininmachete tein ojkan tenej.* Uan satepan kitikuiltijkej ueyi xolal.
28 Amo akin kinpaleuij akin nemiaj Lais porin yejuan amo mokuiaj iniuan akin nemiaj itech okseki xolalmej uan uejka yetoya de Sidón. (Ueyi xolal Lais yetok itech tal tamanis* tein poui Bet-Rehob). Satepan ichankauan Dan oksepa kiyekchijchiujkej ueyi xolal uan ompa mokaltalijkej.
29 Uan no, kipatilijkej itokay ueyi xolal Lais uan kitokaytijkej Dan. Kitokaytijkej kemej motokaytiaya ininuejkaujtat akin katka ikoneuj Israel.
30 Satepan, ichankauan Dan ompa kitachijchiuilijkej tatadios* para kiueyichiuaskej. Uan Jonatán uan ikoneuan mochiujkej inintiopixkauan ichankauan Dan hasta keman israelitas kinkixtijkej de kampa nemiaj uan kinuikakej okseko. Iuejkaujtat Jonatán katka Guersom uan itat Guersom katka Moisés.
31 Uan ompa itech ueyi xolal kitachijchiuilijkej tatadios tein Miqueas kichijchiujka. Nochi in tonalmej keman ikaltsin toTajtsin Dios* yetoya Siló, ichankauan Dan kiueyichiujkej tatadios tein Miqueas kichijchiujka.
Tajtolmelaualismej
^ Oso “kitajtoltitoj”.
^ Nejin kaltsitsin chijchiujtoyaj ika tasal (tilmaj).
^ Tokayit tein kijtosneki ‘kampa kitalijkej ininkaltsitsin ichankauan Dan’.
^ Oso “tiotsitsin”.
^ Itech hebreo, “terafim”.
^ Oso “mochatoyaj”.
^ Itech hebreo, “efod”.
^ Itech hebreo, “terafim”.
^ Itech hebreo, “efod”.
^ Itech hebreo, “efod”.
^ Oso “tiotsitsin”.
^ Oso “tiotsitsin”.
^ Oso “porin uelis namechteuiskej”.
^ Oso “itiotsitsin”.
^ Oso “ininespada”.
^ Oso “takomol”.
^ Oso “tiotsin”.
^ Xikonita ikaltsin Dios.
