Jueces 19:1-30
-
Ichankauan Benjamín ika mauiltiaj se siuatsin ompa Guibeá (1-30)
19 Itech nejon tonalmej amo akin tekiuajtia ompa Israel. Se tonal, se takat levita monamiktij iuan se siuatsin* akin kayot Belén tein poui Judá. Nejon levita nemia kampa tepeyoj kampa kintaxejxelouilijkaj ichankauan Efraín, uan ichan semi uejka yetoya.
2 Sayoj ke isiuatsin kikajkayauak uan kikaujteuak. Siuatsin mokepak ichan itat akin nemia Belén tein poui Judá uan ompa mokauak naui metsti.
3 Yejua ika, nejon levita yajki Belén uan kitataujtito isiuatsin maj iuan mokepa. Iuan yajki se itakeual uan kinuikak ome burros. Keman ompa ajsik, siuatsin kiluij maj kalaki ichan itat. Uan itat semi mouelitak keman kiixmatik imontikauj.
4 Yejua ika imontat levita kitataujtij maj mokaua eyi tonal. Yejua mokauak uan takuajkej uan tatayikej.
5 Keman levita kichiuaskiaya naui tonal ompa, kualkan meuak iuan isiuatsin para mokepaskej ichan. Sayoj ke itat siuatsin kiluij imontikauj: “Xitakuajteua para titaxikos uan satepan tias”.
6 Yejuan motalijkej, sentakuajkej uan tatayikej. Satepan itat siuatsin kiluij imontikauj: “Nimitstataujtia nikan ximokauaok nejin youak uan ximoseui”.
7 Keman takat moketsak para yas, imontat kitataujtij maj mokauaok. Uan yejua oksepa mokauak nejon youak.
8 Keman levita kichiuaskiaya makuil tonal ompa, kualkan meuak iuan isiuatsin para yaskej. Sayoj ke itat siuatsin kiluij imontikauj: “Xitakuaujteuaok para titaxikos”. Nochin omen peuak takuaj uan sentonaltijkej.
9 Keman levita moketsak uan kikuiteuayaya isiuatsin uan itakeual, imontat kiluij: “Xikita, tiotakya. Okachi kuali nikan ximokauakan uan ximoseuikan. Mosta kualkan nameuaskej uan nanyaskej namochan”.*
10 Sayoj ke levita amo kinekikok mokauas. Kikuiteuak isiuatsin, itakeual uan ome iburros uan yajki Jebús, tein no moixmati kemej Jerusalén.
11 Keman ajsitiayajya Jebús, tapoyaujtoyaya. Yejua ika itakeual kiluij: “Maj nejin youak timokauakan kampa nemij jebuseos”.
12 Sayoj ke levita kiluij: “Amo uelis timokauaskej kampa nemij akin amo israelitas. Tiaskej hasta Guibeá”.
13 Levita kiluij itakeual: “Maj timoijsiuilikan para tiajsiskej Guibeá oso Ramá uan ompa timokauaskej”.
14 Yejuan kisentokakej nejnenkej. Uan keman ajsitoyajya Guibeá motayoualtijtoyajya. Guibeá yetoya kampa kintaxejxelouilijkaj ichankauan Benjamín.
15 Yejuan ajsitoj ueyi xolal Guibeá uan kalakkej para ompa mokauaskej nejon youak. Motalitoj plaza, sayoj ke amo akin kinyoleuaya maj mokauatij ininchan.
16 Nejon youak ajsito se takat akin tatajtsinya katka, akin yajka tekitito milaj. Yejua achto nemia kampa tepeyoj kampa kintaxejxelouilijkaj ichankauan Efraín, sayoj ke axkan mokaltalijka Guibeá. Nochin takamej akin nemiaj Guibeá pouiaj iniuan ichankauan Benjamín.
17 Nejon takat akin tatajtsinya kiitak ke levita yetoya itech plaza, yejua ika motokij uan kitajtanij:* “¿De kani tiuitse uan kani tiouj?”.
18 Levita kiluij: “Tiuitsej de Belén tein poui Judá uan tiouij nochan. Nejua ninemi kampa tepeyoj kampa kintaxejxelouilijkej ichankauan Efraín. Nochan semi uejka yetok. Niajka Belén uan axkan niouj kampa kiueyichiuaj Jehová.* Tiualajkej nikan plaza, sayoj ke ayamo akin techyoleua maj timokauatij ichan.
19 Tikpiaj tein kikuaskej toburros. Uan no tikualkuij pantsin tein tikuaskej uan vino tein titayiskej. Amo teyi techpoloua, ta sayoj tiktemojtokej kani timokauaskej”.
20 Takat akin tatajtsinya katka kiluij: “Ximokauatij nochan uan nejua namechmakas nochi tein namechpolosok. Amo xikochikan nikan plaza”.
21 Takat kinuikak ichan uan yejuan mometspajpakkej, takuajkej uan tatayikej. Uan takat no kintamakak burros.
22 Keman yejuan kualtsin takuajtoyaj, seki takamej akin amo yolkualmej katkaj kiyoualotoj ichan takat akin tatajtsinya. Yejuan peuak kitejtelouaj* puerta uan kiluiayaj takat akin tatajtsinya: “¡Xikixti takat akin tikalakij mochan para iuan timotekaskej!”.
23 Takat akin tatajtsinya katka kisak uan kiniluij: “Nokniuan, namechtataujtia amo xikchiuakan nejin tein tel amo kuali. Nejua nikyoleuak nejin takat maj mokaua nochan. Tein nankinemiliaj nankichiuaskej tepinaujtij, amo xikchiuakan.
24 Nikpia se nosiuapil akin ayamo moteka iuan se takat, uan no nikan yetok isiuatsin nejin takat. Nikinkixtis para ininka ximauiltikan komo amo ueli namotsakuiliaj uan nankitelnekij namotekaskej iuan aksa.* Sayoj ke amo teyi xikchiuilikan nejin takat”.
25 Sayoj ke takamej amo kinekkej kikakiskej. Yejua ika levita kikalankixtij isiuatsin uan kinmakak nejon takamej. Uan yejuan ika mauiltijkej nochi youal uan kikaujkej maj youi hasta keman yaya tanesitia.
26 Siuatsin kualkantsisan ajsito ichan takat akin tatajtsinya. Uetsito puertajtenoj uan ompa mokauak hasta keman yektanesik.
27 Itakatsin nejon siuatsin kualkan meuak para yas ichan. Keman tatapoj, kiitak ke isiuatsin uetstoya kaltenoj uan kikitskijtoya puerta ika ome imauan.
28 Yejua kiluij: “Ximeua, tiouijya”. Sayoj ke siuatsin amo tanankilij porin ipa momikilijkaya. Levita kiajokuik, kiajkotalij itech iburro uan yajki ichan.
29 Keman ajsik ichan, kikuik se cuchillo* uan peuak kitejteki isiuatsin. Kikixtij 12 cachos uan kintitanilij sejse cacho 12 uejueyi kalyetonij israelitas.
30 Keman israelitas kiitakej tein levita kintitanilij, kijtojkej: “Desde keman israelitas kiskej de Egipto, amo keman tikitstoyaj maj mochiua nejin. Maj timonojnotsakan uan maj tikyekitakan tein mochiuak para tikixtaliskej toni tikchiuatij”.
Tajtolmelaualismej
^ Itech hebreo, “okse siuatsin”. Xikonita tajtol okse siuatsin.
^ Itech hebreo, “namokaltsin”.
^ Oso “kitajtoltij”.
^ Oso xa “nitekiti ichan Jehová”.
^ Oso “kiuijuitekij”.
^ Oso “akin”, “akaj”.
^ Oso “cuchillo tein ika kinmiktiayaj tapialmej”.
