Jueces 20:1-48
-
Israelitas kinteuiaj ichankauan Benjamín (1-48)
20 Yejua ika, nochin takamej israelitas kiixtalijkej mosentiliskej ompa Mizpá keman Jehová kinitstoya. Mosentilijkej nochin akin nemiaj Dan hasta Beer-Seba uan nochin akin nemiaj Galaad.
2 Taixyekananij israelitas uan akin kinixyekanayaj uejueyi kalyetonij yetoyaj itech nechikol tein kichiujkej itekitikauan Dios. Ijkuak, mosentilijkej 400 mil soldados akin kiuikayaj ininmachete tein ojkan tenej.*
3 (Ichankauan Benjamín kimatkej ke nochin takamej israelitas mosentilijkej ompa Mizpá).
Takamej israelitas kintajtanijkej* akin mosentilijkej: “Xitechiluikan, ¿toni panok? ¿Keyej kimiktijkej nejin siuatsin?”.
4 Uan levita akin kimiktilijkej isiuatsin,* kijtoj: “Niajsik iuan nosiuatsin ompa Guibeá tein poui Benjamín para ompa timokauaskej nejon youak.
5 Uan akin nemiaj Guibeá kiyoualokoj kali kampa timokaujkaj. Yejuan kinekiaj nechmiktiskej. Uan kemej amo uelkej, ika mauiltijkej nosiuatsin uan yejua mikik.
6 Yejuan kichiujkej tein tel amo kuali uan tein tepinaujtij. Uan kemej niknekia maj nochin kimatikan, niktejtekik nosiuatsin uan nikintitanilij sejse cacho nochin uejueyi kalyetonij israelitas.
7 Uan axkan, namejuan israelitas xikixejekokan toni nankichiuatij”.
8 Nochin moketskej uan kisenijtojkej: “Amo akin mokepas ichan,
9 ta tiktatamotatij tetsitsin* para tikitaskej akonimej yaskej kinteuitiuij akin nemij Guibeá.
10 Nochin uejueyi kalyetonij israelitas moneki kintitaniskej soldados. Uan tikinijitaskej* sekin para maj kitemokan tein kikuaskej nochin soldados. Komo kintitanij 100, tikinijitaskej 10, komo kintitanij mil, tikinijitaskej 100 uan komo kintitanij 10 mil tikinijitaskej mil. Ijkon okseki soldados uelis kinteuiskej akin nemij Guibeá para kintatsakuiltiskej porin kichiujkej tein tel amo kuali”.
11 Uan nochin soldados israelitas kiixejekojkej mosenpaleuiskej para kinteuiskej akin nemiaj Guibeá.
12 Nochin israelitas tanauatijkej maj kinitatij ichankauan Benjamín, uan maj kiniluikan takamej: “¿Keyej nankikaujkej maj mochiua nejin tein tel amo kuali kampa nanemij?
13 Xikinkixtikan nejon takamej akin amo yolkualmej para maj tikinmiktikan. Uan ijkon ixpoliuiskej akin kichiujkej tein amo kuali”. Sayoj ke ichankauan Benjamín amo kinekkej kichiuaskej tein kiniluijkej okseki israelitas.
14 Nochin takamej akin pouiaj iniuan ichankauan Benjamín mosentilijkej ompa Guibeá para kinteuiskej okseki israelitas.
15 Nejon tonal, ichankauan Benjamín kinsentilijkej 26 mil takamej akin kiuikayaj ininmachete tein ojkan tenej.* No kinsentilijkej 700 soldados akin semi kuali tateuiayaj akin nemiaj Guibeá.
16 De nochin soldados akin mosentilijkej, yetoyaj 700 akin semi kuali tateuiayaj ika ininopochmay. Nochin nejon soldados uelia kitamotayaj se tet ika ateuitats* uan niman kikuiltiayaj se tsonti.
17 Okseki israelitas kinsentilijkej 400 mil soldados akin kiuikayaj ininmachete tein onkan tenej.* Nochin tel kuali tateuiayaj.
18 Yejuan yajkej Betel para kitajtaniskej Dios: “¿Akonimej tayekanaskej keman tikinteuitiuij ichankauan Benjamín?”. Jehová kiniluij: “Tayekanaskej ichankauan Judá”.
19 Mostika, israelitas kualkan meujkej uan kitalitoj ininkaltsitsin* amo uejka de Guibeá para tateuiskej.
20 Soldados israelitas motejtekpankej taixpan de Guibeá para kinteuiskej ichankauan Benjamín.
21 Nejon tonal, ichankauan Benjamín akin yetoyaj Guibeá, kinixnamikitoj israelitas uan kinmiktijkej 22 mil.
22 Sayoj ke soldados israelitas amo moujkej, ta oksepa motejtekpankej para tateuiskej. Motejtekpankej kampa mosentilijkaj yekinika tonal.
23 Uan no, israelitas yajkej chokatoj Betel uan kitataujtijkej Jehová hasta keman tayouak. Yejuan kitajtanijkej Jehová: “¿Maj oksepa tikinteuitij ichankauan Benjamín akin toparientes?”. Uan Jehová kiniluij: “Xiakan xikinteuitij”.
24 Israelitas oksepa yajkej kampa yetoyaj ichankauan Benjamín.
25 Uan ichankauan Benjamín kiskej de Guibeá para kinteuiskej. Nejon tonal kinmiktijkejok 18 mil israelitas, akin kiuikayaj ininmachete tein ojkan tenej.
26 Satepan soldados israelitas yajkej Betel. Ompa motalitoj, chokakej uan kitataujtijkej Jehová uan amo takuajkej hasta keman tayouak. Yejuan kichichinouilijkej Jehová seki tapialmej uan kimaktilijkej seki taman para sentakuaskej.*
27 Ijkuak, tatiochiualkaxon* tein iaxka toTajtsin Dios yetoya Betel. Yejua ika, israelitas kitajtanijkej Jehová toni monekia kichiuaskej.
28 (Ijkuak, Finehás katka tiopixkat. Yejua katka ikoneuj Eleazar uan iixuiuj Aarón). Israelitas kitajtanijkej Dios: “¿Maj oksepa tikinteuitij ichankauan Benjamín akin toparientes? ¿Oso maj amo teyi tikinchiuilikanok?”. Jehová kinnankilij: “Xiakan xikinteuitij. Mosta namechpaleuis xikintanikan”.
29 Yejua ika, seki israelitas yajkej Guibeá uan ompaka motatitoj.*
30 Israelitas oksepa* yajkej Guibeá kinteuitoj ichankauan Benjamín. Motejtekpankej para tateuiskej kemej ipa kichiujkaj achto.
31 Keman ichankauan Benjamín kinixnamikitoj, israelitas cholojkej para maj ichankauan Benjamín kintokatianij. Yejuan motalojkej uan kintokatiajkej itech ueyi ojti tein pankisa Betel uan oksekin kintokatiajkej itech ojti tein ualeua Guibeá. Ichankauan Benjamín oksepa peuak kinteuiaj uan kinmiktijkej kemej 30 soldados israelitas.
32 Ichankauan Benjamín moiluiayaj: “Oksepa tikintantokej”. Sayoj ke israelitas moiluiayaj: “Maj timotalokan uan maj techtokatiakan hasta uejueyi ojmej para maj kikaujteuakan ininueyi xolal”.
33 Soldados israelitas yajkej Baal-Tamar uan motejtekpankej para kinteuiskej ichankauan Benjamín. Uan okseki israelitas akin motatijtoyaj kiskej para kinteuiskej akin mokaujkaj Guibeá.
34 Uan 10 mil soldados israelitas akin semi kuali tateuiayaj ajsitoj Guibeá uan peuak kinteuiaj ichankauan Benjamín. Sayoj ke, ichankauan Benjamín amo kimatiaj tein yaya kinpanoti.
35 Jehová kichiuak maj israelitas kintanikan ichankauan Benjamín. Nejon tonal, israelitas kinmiktijkej 25,100* takamej akin kiuikayaj ininmachete tein ojkan tenej.
36 Keman ichankauan Benjamín kiitakej ke soldados israelitas cholojtoyaj kinemilijkej ke kintaniskiaj. Sayoj ke yejuan cholojkej porin kiyekmatiaj ke okseki soldados motatijtoyaj* para kinteuiskej akin mokaujkaj Guibeá.
37 Soldados akin motatijtoyaj niman kalakitoj Guibeá. Momoyaujkej* itech nochi ueyi xolal uan kinmiktijkej nochin akin ompa nemiaj ika ininmachete tein ojkan tenej.
38 Nochin soldados israelitas motenkaujkaj ke soldados akin motatiskiaj,* kitikuiltiskiaj ueyi xolal. Keman okseki soldados kiitaskiaj pokti, kimatiskiaj ke kalakkajya ueyi xolal.
39 Keman israelitas cholojteujkej, ichankauan Benjamín peuak kinteuiaj. Kinmiktijkej kemej 30 soldados israelitas. Ichankauan Benjamín moiluiayaj: “Oksepa tikintantokej”.
40 Sayoj ke israelitas kiitakej pokti tein kinextiaya ke okseki soldados kalakkajya Guibeá. Uan keman ichankauan Benjamín ikantachiakej, kiitakej ke nochi ininueyi xolal chichinaujtoya uan uejkapan mokeketsaya tit.*
41 Ijkuak, soldados akin cholojtoyaj mokepkej uan peuak kinteuiaj ichankauan Benjamín. Yejuan motelmoujtijkej keman kiitakej ke tapolojkajya.
42 Yejua ika yajkej taluakyan porin kinekiaj choloskej. Sayoj ke soldados israelitas motalojkej uan kintokatiajkej. Uan no, takamej israelitas akin nemiaj itech okseki uejueyi xolalmej, no kinmijmiktijkej ichankauan Benjamín.
43 Ichankauan Benjamín amo uelikok cholojkej porin kampa yeski kintsakuiliayaj. Soldados israelitas kintankej ichankauan Benjamín taixpan de Guibeá, kampa ualkisa tonaltsin.
44 Kinmiktijkej 18 mil ichankauan Benjamín. Nochin nejon takamej katkaj soldados akin semi kuali tateuiayaj.
45 Okseki ichankauan Benjamín cholojteujkej taluakyan, kampa yetok tepejxit tein moixmati kemej Rimón. Soldados israelitas kinmiktijkej makuil mil ichankauan Benjamín itech uejueyi ojmej. Motalojkej uan kintokatiajkej hasta Guidom uan kinmiktijkej okseki ome mil takamej.
46 Nejon tonal kinmiktijkej 25 mil soldados akin pouiaj iniuan ichankauan Benjamín. Nochin nejon soldados kiuikayaj ininmachete tein ojkan tenej uan semi kuali tateuiayaj.
47 Sayoj ke 600 soldados cholojteujkej taluakyan. Yejuan motatijkej* naui metsti itech tepejxit tein moixmati kemej Rimón.
48 Uan soldados israelitas mokepkej uan kinmiktijkej nochin ichankauan Benjamín akin mokauayajok itech nochi uejueyi xolalmej. No kinmiktijkej inintapialuan uan kintikuiltijtiayaj uejueyi xolalmej kampa panotiayaj.
Tajtolmelaualismej
^ Oso “ininespada”.
^ Oso “kintajtoltijkej”.
^ Xikonita tajtol okse siuatsin.
^ Xikonita tetsitsin tein kitatamotayaj.
^ Oso “tikinixpejpenaskej”.
^ Oso “ininespada”.
^ Oso “se honda”.
^ Oso “ininespada”.
^ Nejin kaltsitsin chijchiujtoyaj ika tasal (tilmaj).
^ Xikonita tatiochiualkaxon.
^ Oso “mocholtitoj”.
^ Itech hebreo, “ika expa”.
^ Oso “veinticinco mil cien”.
^ Oso “mocholtijtoyaj”.
^ Oso “Moxinijkej”.
^ Oso “mocholtiskiaj”.
^ Oso “tekol”.
^ Oso “mocholtijkej”.
