Jueces 21:1-25
-
Israelitas tapaleuiaj para maj amo ixpoliuikan ichankauan Benjamín (1-25)
21 Keman israelitas mosentilijkaj ompa Mizpá, kijtojkaj ke kichiuaskiaj nejin: “Amo akin kinamiktis isiuapil iuan semej takamej akin pouij iniuan ichankauan Benjamín”.
2 Yejua ika israelitas yajkej Betel. Ompa motalijkej uan tel chokakej hasta keman tayouak uan Dios kinitstoya.
3 Yejuan kijtouayaj: “ToDios* Jehová, semi amo kuali tein techpanok. Axkan ixpoliuik semej uejueyi kalyetonij”.
4 Mostika, israelitas kualkan meujkej uan kichijchiujkej se altar. Ompa kichichinouilijkej Dios tapialmej uan kimaktilijkej seki taman para sentakuaskej.*
5 Israelitas kijtojkaj ke kimiktiskiaj akin amo yaskia Mizpá. Nejon tonal Jehová kiitak keman mosentilijkej. Yejua ika israelitas kijtojkej: “¿Akonimej amo mosentilijkaj touan ompa Mizpá keman Jehová techitstoya?”.
6 Israelitas semi motayokoltijkej porin ichankauan Benjamín kinpanoka tein tel amo kuali. Yejua ika moiluiayaj: “Axkan ixpoliuik semej uejueyi kalyetonij.
7 Uan tejuan timotenkaujkej itokaykopa Jehová ke amo tikinnamiktiskej tosiuapipiluan iniuan ichankauan Benjamín. ¿Kani tikinkuitiuij siuamej para maj monamiktikan iniuan takamej akin mokauajok?”.
8 Israelitas tajtankej:* “¿Akonimej amo mosentilijkaj touan ompa Mizpá keman Jehová techitstoya?”. Keman israelitas mosentilijkaj ompa Mizpá kiitakej ke amo yajkaj akin kayomej Jabés-Galaad.
9 Porin keman kinpoujkaj nochin akin mosentilijkaj amo kinitakej akin kayomej Jabés-Galaad.
10 Yejua ika israelitas kintitankej ompa 12 mil soldados akin semi kuali tateuiayaj. Uan kiniluijkej: “Xikuikan namomachete tein ojkan tenej* uan xikinteuitij nochin akin nemij Jabés-Galaad, hasta siuamej uan konemej.
11 Xikinmiktikan nochin takamej uan no xikinmiktikan nochin siuamej akin motekanij iuan se takat”.
12 Keman soldados yajkej Jabés-Galaad kinajsikej 400 ichpochmej akin amo keman motektoyaj iuan se takat. Soldados kinuikakej nejon ichpochmej ompa Siló, tein yetok Canaán kampa kitalijkaj ininkaltsitsin.*
13 Satepan, israelitas tanauatijkej maj kiniluitij ichankauan Benjamín ke amo kinteuiskiajok. Nejon takamej motatijtoyaj* itech tepejxit tein moixmati kemej Rimón.
14 Yejua ika, takamej akin pouiaj iniuan ichankauan Benjamín mokepkej kampa kintaxejxelouilijkaj. Uan israelitas kinmajmakakej ichpochmej akin kinualkuikaj de Jabés-Galaad para maj iniuan monamiktikan. Sayoj ke amo ajsikej para nochin takamej.
15 Uan israelitas semi kiniknelijkej ichankauan Benjamín porin Jehová kichiujka maj uejueyi kalyetonij moxexelokan.
16 Taixyekananij israelitas kijtojkej: “Nochin siuamej akin pouiaj iniuan ichankauan Benjamín kinmiktijkej, uan yetokejok seki takamej akin ayamo monamiktiaj. ¿Kani tikinkuitiuij siuamej para maj iniuan monamiktikan?”.
17 Sekin tanankilijkej: “Ichankauan Benjamín moneki kipiaskej ininkoneuan* para maj amo ixpoliui semej uejueyi kalyetonij.
18 Sayoj ke tejuan timotenkaujkej ke amo tikinnamiktiskiaj tosiuapipiluan iniuan. Tinochin tikijtojkaj: ‘Maj Dios kitatsakuilti akin kinamiktis isiuapil iuan semej takamej akin pouij iniuan ichankauan Benjamín’”.
19 Taixyekananij israelitas no kijtojkej: “Xijxiujtika kiiluichiuiliaj Jehová ompa Siló, tein yetok tatajko de Betel uan Leboná. Ueyi xolal Siló yetok kampa ualkisa tonaltsin, tanakastan den ueyi ojti tein peua Betel uan ajsi hasta Siquem”.
20 Yejua ika kiniluijkej takamej akin pouiaj iniuan ichankauan Benjamín: “Xiakan kampa kitokaj uvas uan ompa ximotatikan.*
21 Uan keman nankiitaskej ke ichpochmej peua mijtotiaj ompa Siló, xikisakan uan ximouikilikan sejse ichpoch para iuan namonamiktiskej. Satepan, ximokepakan kampa namechtaxejxelouilijkej.
22 Komo inintatuan oso ininikniuan techiluikij teisa, tikiniluiskej: ‘Tejuan sayoj tiknekiaj tikinpaleuiskej porin keman titateuitoj amo nochin uelik tikinajxilijkej se siuat para iuan monamiktiskej. Uan namejuan namotenkaujkej ke amo nankinnamiktiskej namoichpochuan iniuan. Yejua ika nejon takamej kinichtekkej namoichpochuan para namejuan amo ximotajtakolmakakan porin amo nankichiujkej tein namotenkaujkej’”.
23 Uan takamej akin pouiaj iniuan ichankauan Benjamín kichiujkej tein kiniluijkej. Sejse takat mouikilij se ichpoch akin mijtotijtoya para iuan monamiktis. Satepan mokepkej kampa kintaxejxelouilijkaj, kinyekchijchiujkej uejueyi xolalmej uan ompa mokaltalijkej.
24 Uan israelitas yajkej de Siló uan mokepkej kampa kintaxejxelouilijkaj, kampa yetoyaj ininchankauan.
25 Ijkuak amo akin tekiuajtia ompa Israel. Sejse israelita kichiuaya tein kinemiliaya ke kuali yetok.
Tajtolmelaualismej
^ Oso “IninDios israelitas”.
^ Oso “tatajtoltijkej”.
^ Oso “namoespada”.
^ Nejin kaltsitsin chijchiujtoyaj ika tasal (tilmaj).
^ Oso “mocholtijtoyaj”.
^ Itech hebreo, “moneki kisentokaskej kipiaskej tal tein kinmakakej”.
^ Oso “ximocholtikan”.
