Jueces 5:1-31
5 Nejon tonal, Débora cantaroj iuan Barac ikoneuj Abinoam nejin tatsotson:
2 “¡Xikueyichiuakan Jehová!Porin isoldados kiixtalijkej tateuitiuij,isoldados akin tsonmoyaujtokej.*
3 ¡Xikakikan nejin, tekiuanij! ¡Xikakikan tein nikijtoti, taixyekananij!
Nejua nicantarouiliti Jehová.
Niktatsotsoniliti Jehová, ininDios israelitas.
4 Jehová, keman tiualeuak de Seír,keman timarcharojtiualaj desde talmej tein pouij Edom,talolinik uan peuak kioui.¡Tel chikauak kiouik!
5 Tepemej motsetselojkej* iixpan Jehová, ininDios israelitas.Hasta tepet Sinaí motsetseloj* iixpan Jehová.
6 Keman nemik Samgar ikoneuj Anat,uan keman nemik Jael amo akin ojtokaya itech uejueyi ojmej,ta nochin yayaj itech ojpitsakmej.
7 Israelitas akin tekitiaj milaj amo yayajok tekititij,*amo yayajok tekititij hasta keman nejua Débora nechixtalijkej.Hasta keman nechixtalijkej maj nikinpaleui israelitas kemej yeskia ininnan.
8 Israelitas peuak kinueyichiuaj tatadiosmej.*Yejua ika akin kintauelitayaj kinteuitoj itech ininpuertas,
kalampa den uejueyi xolalmej.Cuarenta mil takamej israelitas amo kipiayaj nion se escudo uan nion se lanza.*
9 Nejua nikinpaleuia akin kinixyekanaj soldadosporin kiixtalijkej iniuan tateuitiuij israelitas.
¡Xikueyichiuakan Jehová!
10 Namejuan akin nanyouij itech burros;namejuan akin nankiuelitaj namotaliskej itech kuajkuali tasal*uan namejuan akin nankiuelitaj nanentinemiskej kampa amo ouijkan.¡Itech xitanemilikan tein Dios kichiua!
11 Kampa atitij tapialmej tajtojtoyaj akin youij kikixtitij at.Kijtouayaj nochi tein kuali tein Jehová kichiuakuan nochi tein kuali tein kichiujkej akin nemij itech xolaltsitsin ompa Israel.
Uan itekitikauan Jehová temokej kampa yetoyaj puertas den uejueyi xolalmej.
12 ¡Xiijsa* Débora, xiijsa!
¡Xiijsa uan xicantaro!
¡Ximoketsa Barac, ikoneuj Abinoam uan xikinuika akin tikintanik!
13 Akin taxikojkej keman kintajyouiltijkej kinitatoj taixyekananij.Itekitikauan Jehová nechitakoj para maj tikinteuitij akin techixnamikiaj, akin semi kuali tateuiayaj.
14 Takamej akin nemij itech tal tamanis* yejuan ichankauan Efraín.Namejuan ichankauan Benjamín iniuan nanyouij.
Akin kinixyekanaj soldados pouij iniuan ichankauan Makiruan akin kinijkuilouaj soldados* pouij iniuan ichankauan Zabulón.
15 Uejueyi chiuanimej akin pouij iniuan ichankauan Isacar kipaleuijkej Débora.Barac no kipaleuij, ijkon kemej kichiujkej ichankauan Isacar.
Yejua kititankej maj youi tal tamanis* uan nejnemik hasta ompa.
Miakej ichankauan Rubén amo kimatiaj toni kichiuaskej.*
16 ¿Keyej sayoj timotalij kemej se tapial tein kimamajtok ome koxtalmej?¿Keyej sayoj tikinkaktoya ichkatajpianij akin kinpichilijtoyaj flauta ininichkauan?*
Miakej ichankauan Rubén amo kimatiaj toni kichiuaskej.
17 Akin nemij Galaad mokaujkej oksekopa den ueyiat Jordán.¿Uan keyej ichankauan Dan mokaujkej kampa moketsaj barcos?
Ichankauan Aser mokaujkej atenoj uan amo teyi kichiujkej.Mokaujkej kampa moketsaj barcos.
18 Ichankauan Zabulón semi tapaleuijkej maski ueliskia kinmiktiskej.No ijkon kichiujkej ichankauan Neftalí akin nemij kampa tepeyoj.
19 Taixyekananij tateuikojTaanac kampa panotok at ompa Meguidó.Akin taixyekanayaj Canaán tateuijkej,
sayoj ke amo uelik mokuilijkej nion tepitsin plata.
20 Desde iluikak sitalimej ualtateuijkej,desde iluikak kiteuijkej Sísara.
21 Atauit* tein moixmati kemej Cisón pexonik* uan kinkuitikisak,atauit Cisón tein ne uejkauj ipa yetok.
Nikintsojtsoniksak* takamej akin kuali tateuiayaj.
22 Caballos chikauak metskakistitiayaj.Chikauak kakistiaj keman ijsiujka motalojtiayaj para choloskej.
23 Iángel Jehová kijtoj: ‘Maj kinpano tein amo kuali akin nemij Meroz,porin amo kipaleuijkej Jehová.Ininsoldados akin kuali tateuiaj amo tateuijkej.Amo tateuijkej para kipaleuiskej Jehová’.
24 Siuatsin akin okachi kiueyitaliaj yejua Jael,isiuatsin Héber akin quenita.Yejua siuatsin akin nemi itech kaltsitsin* akin okachi kiueyitaliaj.
25 Sísara kitajtanij at uan Jael kimakak leche.
Kimakak leche tein tetsauak itech se kaxit tein kuakualtsin.
26 Ika se imay kikuik kouit tein tenpitstik.*Ika iyekmay kikuik se martillo tein etik
uan ika kikuatapanak Sísara.Kikuaxamanij keman kikuanakastantokilij kouit.
27 Imetstsintan kapanito, uetsito uan amo moolinijok.Imetstsintan kapanitouan kampa uetsito, ompa mikik.
28 Itech ventana naltachixtoya se siuatsin.Katka inan Sísara akin naltachixtoya.Yejua motajtaniaya:* ‘¿Keyej ayamo ejko?
¿Keyej ayamo ejko icarro nion mokakij icaballos?’.
29 Siuamej akin okachi tamattoyajuan katkaj uejueyi chiuanimej kinankiliayaj nejin uan inan no miakpa ijkon moiluiaya:
30 ‘Xa moxejxelouilijtoskej tein mokuilijkej:sejse soldado mokuilijtos se siuapil oso ome siuapipil.Sísara mokuilijtos seki tasal* de tataman colores.Uan nochin akin tatankej mokuilijtoskej tasal tein tajkitil.Mokuilijtoskej seki tasal de tataman colores uan ome tasal tein tajkitil para mokechtaliliskej’.
31 ¡Jehová, maj ijkon momikilikan nochin akin mitstauelitaj!Sayoj ke akin mitstasojtaj maj milinikan kemej tonaltsin”.
Uan israelitas kualtsin nenkej 40 xiujmej.
Tajtolmelaualismej
^ Oso “tsontoyaujtokej”, “tsonmajkaujtokej”. Nejin kinextiaya ke motemaktijkaj iuan Dios.
^ Oso xa “patkej”, “xitinkej”.
^ Oso xa “patik”, “xitinik”.
^ Oso “poliujkaj”.
^ Oso “tiotsitsin”.
^ Nejin katka se kouit tein ueyak tein itenpan kipiaya se tepos tein tenpitstik (yekapitstik).
^ Oso “tilmaj”.
^ Oso “Xitachia”, “Xiixpetani”.
^ Oso xa “uan akin kikuij tein ika tekitij tajkuilouanij”.
^ Oso “takomol”.
^ Oso “takomol”.
^ Oso “moyolnemiliayaj”.
^ Oso “ininborregos”.
^ Oso “Ojpanat”.
^ Oso “temik”.
^ Oso “Nikintejteliksak”.
^ Nejin kaltsitsin chijchiujtoyaj ika tasal (tilmaj).
^ Oso “yekapitstik”. Nejin katka se estaca kampa kiilpiayaj (kitsikouayaj) kaltsin.
^ Oso “motajtoltiaya”.
^ Oso “tilmaj”.
