Jueces 7:1-25
7 Uan Gedeón akin no moixmatia kemej Jerubaal uan soldados akin iuan yetoyaj kualkantsin meujkej. Yejuan kinketskej ininkaltsitsin* inakastan ameyal* tein moixmati kemej Harod. Madianitas kitalijkaj ininkaltsitsin ajkokopa de kampa yetoyaj israelitas. Yetoyaj inakastan tepet Moré kampa tamanis.*
2 Uan Jehová kiluij Gedeón: “Nantelmiakej, yejua ika amo uelis namechpaleuis xikintanikan madianitas, porin uelis nankijtoskej ke namoselti nankintankej uan ika peuas namoueyimatiskej.*
3 Yejua ika xikinilui mosoldados: ‘Komo aksa* tel moui maj mokepa ichan’”. Gedeón kiniluij nejin para kiitas akonimej tel mouiaj. Yajkej 22 mil takamej uan mokaujkej 10 mil.
4 Sayoj ke Jehová kiluij Gedeón: “Nantelmiakejok. Xikinilui soldados maj temokan kampa onkak at uan ompa nejua nikinijitas.* Komo nimitsiluia ‘Nejin takat mouan yas’, yejua mouan yas. Sayoj ke komo nimitsiluia ‘Nejin takat amo mouan yas’, yejua amo mouan yas”.
5 Yejua ika Gedeón kiniluij soldados maj temokan kampa onkaya at.
Satepan Jehová kiluij Gedeón: “Xikinita akonimej motankuaketsaj uan moixpilouaj para tayiskej at* uan xikinxelo akin amo motankuaketsaj para tayiskej”.
6 Uan 300 soldados amo motankuaketskej para tayiskej at. Nochin okseki soldados motankuaketskej uan moixpilojkej.
7 Uan Jehová kiluij Gedeón: “Nimitspaleuis xikintani madianitas. Mitspaleuiskej 300 soldados akin amo motankuaketskej para tayiskej at. Nochin okseki soldados maj mokepakan ininchan”.
8 Gedeón kiniluij okseki soldados maj mokepakan. Sayoj ke achto ke mokepaskiaj ininchan kinmakateujkej takual uan kuaomimej soldados akin mokaujkej. Sayoj 300 soldados mokaujkej iuan Gedeón. Madianitas yetoyaj kampa tamanis,* tanikopa* de kampa yetoya Gedeón.
9 Nejon youak, Jehová kiluij Gedeón: “Xikinteuiti akin mitsixnamikij porin nimitspaleuiti xikintani.
10 Sayoj ke komo timoui tikinteuitiuj, xiouj kampa yetokej akin namechixnamikij uan xikuika Purá, akin mitspaleuia.
11 Keman tikakis tein kijtojtokej, amo timouisok* tikinteuitiuj”. Gedeón uan Purá, akin kipaleuiaya, motokijkej hasta kampa yetoyaj akin kinixnamikiaj.
12 Madianitas, amalequitas uan akin nemiaj kampa ualkisa tonaltsin sentakuitoyaj itech nochi tamanis,* kemej yeskia tel miak chapolimej. Uan kinpiayaj tel miak camellos tein amo uelia se kinpouaya kemej yeskia xal tein onkak martenoj.
13 Keman Gedeón ajsik kampa yetoyaj akin kinixnamikiaj, kikakik ke se takat kitapouijtoya okse takat tein kikochitaka.* Yejua kiluiaya: “Nikochitak ke se pantsin* youaltik motetekuinojtiualaj* hasta nikan kampa tietokej, uan moteloko* itech se kaltsin. Kemej tel chikauak moteloko, kiixkepak kaltsin uan kiuejueloj”.
14 Uan takat akin kikaktoya kiluij: “Nejon pantsin yejua imachete Gedeón tein ojkan tenej.* Dios kipaleuiti Gedeón ikoneuj Joás akin israelita maj kintani madianitas uan nochin ininsoldados”.
15 Keman Gedeón kikakik tein nejon takat kikochitaka* uan kimatik toni kijtosnekia, motankuaketsak uan peuak kiueyichiua Dios. Satepan mokepak kampa yetoyaj okseki israelitas uan kiniluij: “Tiouij tikinteuitij madianitas porin Jehová techpaleuiti maj tikintanikan”.
16 Gedeón kinxejxeloj nejon 300 soldados uan kintalij ciejcien. Kinmajmakak se kuaomit uan se komit tein taijtik kipiaya okot tein xotatoya.
17 Uan kiniluij: “Xikitakan tein nikchiua uan no ijkon xikchiuakan. Keman niajsis kampa yetokej madianitas, no xikchiuakan tein nejua nikchiuas.
18 Tinochin tikinyoualoskej madianitas, uan keman nejua uan 100 soldados akin nouan youij tikpitsaskej kuaomit, namejuan no moneki nankipitsaskej kuaomit kampa nanijkatoskej. Uan moneki chikauak nankijtoskej: ‘¡Jehová uan Gedeón tateuijtokej!’”.
19 Ajsitoyaya tajkoyouan* keman Gedeón uan 100 soldados akin iuan yayaj ajsikej kampa yetoyaj madianitas. Ijkuak, yekin moixpatakaj tajpianij. Uan Gedeón uan 100 soldados kipitskej kuaomimej uan kitatapatskej konmej tein kiuikayaj.
20 Nochin soldados akin Gedeón kinxejxelojka kipitskej kuaomimej uan kitatapatskej konmej. Ika ininopochmay kikitskijtoyaj okot tein xotatoya uan ika ininyekmay kikitskijtoyaj kuaomit tein kipitstoyaj. Ijkuak chikauak kijtojkej: “¡Jehová uan Gedeón tateuijtokej!”.
21 Soldados israelitas amo moolinijkej, sayoj ke nochin soldados madianitas cholojteujkej uan tsajtsitiayaj keman tsikuintiayaj.
22 Uan 300 soldados kisentokayaj kipitsayaj kuaomimej, uan Jehová kichiuak maj momijmiktianij akin kinixnamikiaj israelitas. Sekin cholojkej hasta Bet-Sitá uan hasta Zererá. Uan ajsitoyajya Abel-Meholá, tein amo uejka yetok de Tabat.
23 Yejua ika Gedeón kinnotsak takamej akin pouiaj iniuan ichankauan Neftalí, Aser uan Manasés. Uan yejuan kintokatiajkej soldados madianitas.
24 Gedeón kintitanik seki takamej maj kinitatij ichankauan Efraín akin nemiaj kampa tepeyoj. Yejuan kiniluitoj: “Xikinteuitij soldados madianitas. Xiajsikan ueyiat Jordán uan ueyiamej tein yetokej Bet-Bará. Ximoketsakan kampa madianitas uelis kimetspanauiskej ueyiat uan amo xikinkauakan maj panokan”. Yejua ika nochin takamej akin pouiaj iniuan ichankauan Efraín mosentilijkej. Satepan yajkej ueyiat Jordán uan ueyiamej tein yetokej Bet-Bará para amo kinkauaskej madianitas maj panokan.
25 Uan kinkitskijkej Oreb uan Zeeb akin taixyekanayaj Madián. Kimiktijkej Oreb itech se ueyi tet tein satepan kitokaytijkej Oreb. Uan Zeeb kimiktijkej kampa kipatskayaj uvas tein satepan moixmatik kemej Zeeb. Israelitas kisentokakej kintokatiajkej madianitas. Satepan kiitatoj Gedeón, akin amo uejka yetoya den ueyiat Jordán, uan kiuikilijkej itsontekon Oreb uan Zeeb.
Tajtolmelaualismej
^ Nejin kaltsitsin chijchiujtoyaj ika tasal (tilmaj).
^ Oso “amel”.
^ Oso “takomol”.
^ Oso “namoueyinekiskej”.
^ Oso “akin”, “akaj”.
^ Oso “nikinixpejpenas”.
^ Oso “akin tayij at kemej kichiua se itskuinti”.
^ Oso “ataujkopa”, “tauakalkopa”.
^ Oso “takomol”.
^ Oso “timoyolchikauas”.
^ Oso “takomol”.
^ Oso “kitejtemik”.
^ Itech hebreo, “pantsin tein chijchiujtoya ika cebada”.
^ Oso “moxolkeptiualaj”, “motemimilojtiualaj”.
^ Oso “uetsiko”, “mouiteyiko”.
^ Oso “iespada Gedeón”.
^ Oso “kitejtemik”.
^ Nejin hora peuaya kemej majtakti hora youak hasta ome hora kualkan.
