Jueces 9:1-57
9 Satepan, Abimélec ikoneuj Jerubaal yajki Siquem kinitato itíos, iikniuan imomaj, uan nochin ichankauan iueyitat. Uan kiniluij:
2 “Xikiniluikan akin taixyekanaj Siquem: ‘¿Toni nankinemiliaj ke okachi kuali? ¿Nankinemiliaj ke okachi kuali maj namechixyekanakan 70 ikoneuan Jerubaal oso maj sayoj se takat namechixyekana? Uan xikelnamikikan ke namejuan uan nejua tiparientes’”.*
3 Yejua ika itíos Abimélec kiniluitoj akin taixyekanayaj Siquem tein kijtojka. Uan akin taixyekanayaj Siquem kiixtalijkej kipaleuiskej Abimélec porin moiluiayaj: “Abimélec topariente”.
4 Uan kimakakej Abimélec 800 gramos* de plata tein kikuikej itech templo kampa kiueyichiuayaj Baal-Berit. Ika nejon tomin, Abimélec kintakeuak seki takamej para maj kipaleuianij. Nejon takamej tatsiujkanentinemiaj uan tel amo yolkualmej katkaj.
5 Satepan, Abimélec yajki ichan itat ompa Ofrá uan kinmiktij 70 ikoneuan Jerubaal. Yejuan katkaj iikniuan Abimélec. Kinmiktij nochin itech se tet. Sayoj makisak Jotán akin xokoyot, porin motatij.*
6 Nochin akin taixyekanayaj Siquem uan nochin akin nemiaj Bet-Miló mosentilijkej ompa Siquem, tein amo uejka yetok de se ueyi kouit uan se kalikxit. Uan ompa kiixtalijkej Abimélec kemej tekiuaj.
7 Keman Jotán kimatik nejon, niman yajki ikuapan tepet Guerizim uan kinpantsajtsilij akin mosentilijkaj: “¡Namejuan akin nantaixyekanaj Siquem, xinechkakikan uan Dios no namechkakis!
8 ”Se tonal, seki koujmej mosentilijkej para kiixtaliskej akoni kinixyekanas. Yejua ika kiluijkej olivojkouit: ‘Tiknekij tejua xitechixyekana’.
9 Sayoj ke olivojkouit kinnankilij: ‘Nejua amo nikneki namechixyekanas,* porin komo namechixyekana amo niktemakasok aceite tein ika kiueyitaliaj Dios uan no ika kinueyitaliaj takamej’.
10 Kemej olivojkouit amo kinekik, koujmej kiitatoj higojkouit uan kiluijkej: ‘Tejua xitechixyekana’.
11 Sayoj ke higojkouit kinnankilij: ‘Nejua amo nikneki namechixyekanas, porin komo namechixyekana amo niktemakasok notakilo tein semi uelik uan tsopek’.
12 Satepan koujmej kiluijkej uvajkouit: ‘Tejua xitechixyekana’.
13 Sayoj ke uvajkouit kinnankilij: ‘Nejua amo nikneki namechixyekanas,* porin komo namechixyekana amo niktemakasok vino tein kiyolpaktia Dios uan tein kinyolpaktia takamej’.
14 Satepan, nochin koujmej kiluitoj kouit tein uitsyoj: ‘Tejua xitechixyekana’.
15 Uan kouit tein uitsyoj kinnankilij: ‘Komo yekmelauj nankinekij maj nejua namechixyekana, ximokalakikij nomatampa uan nejua namechpaleuis. Sayoj ke komo amo nanyektajtojtokej, maj nixotatikisa uan maj nikinchichino nochin cedrojkoujmej tein onkakej Líbano’”.
16 Jotán no kiniluij: “¿Nankinemiliaj ke kuali yetok tein nankichiujkej keman nankiixtalijkej Abimélec kemej tekiuaj? ¿Nankiniknelijkej Jerubaal uan ichankauan? ¿Kinextij nejon ke nankitakachiuaj* Jerubaal?
17 Keman madianitas namechtajyouiltijtoyaj, nopaj kinteuij para namechpaleuis maski ueliskia kimiktiskej.
18 Sayoj ke axkan namejuan nankinixnamikij ichankauan nopaj uan nankinmiktijkej 70 ikoneuan itech se tet. Uan kemej Abimélec namopariente nankiixtalijkej maj taixyekana Siquem, maski yejua ikoneuj se siuat akin katka itakeual nopaj.
19 Komo nankinemiliaj ke kuali yetok tein nankichiujtokej porin ijkon nankitakachiuaj* Jerubaal uan ichankauan, xiyolpakikan iuan Abimélec uan maj yejua no yolpaki namouan.
20 Sayoj ke komo amo kuali yetok tein nankichiujtokej, maj Abimélec namechchichino namejuan akin nantaixyekanaj Siquem uan nochin akin nanemij Bet-Miló. Uan namejuan no xikchichinokan Abimélec”.
21 Jotán choloj uan yajki Beer uan ompa mokaltalij porin kimouiliaya Abimélec akin katka iikniuj.
22 Abimélec kinixyekanak israelitas eyi xiuit.
23 Sayoj ke Dios kichiuak maj Abimélec uan akin taixyekanayaj Siquem motauelitakan.* Uan akin taixyekanayaj Siquem peuak kiixnamikij.
24 Ijkon Dios kitaxtaualtiskia Abimélec porin fiero kinmiktij 70 ikoneuan Jerubaal, akin katkaj iikniuan. Uan no kintaxtaualtiskia akin taixyekanayaj Siquem porin kipaleuijkaj maj kinmikti.
25 Yejua ika, akin taixyekanayaj Siquem kinnauatijkej seki takamej maj motatitij* tepekuapan para kiichtakauiskej Abimélec. Nejon takamej kintachtekiayaj nochin akin ompaka panouayaj. Satepan, kiluijkej Abimélec tein kichiujtoyaj nejin takamej.
26 Itech nejon tonalmej, Gaal ikoneuj Ébed uan iikniuan ajsikej Siquem uan ompa mokaujkej. Uan akin taixyekanayaj Siquem kinemilijkej ke yejuan ueliskiaj kinpaleuiskej.
27 Akin taixyekanayaj Siquem yajkej kitekitoj uvas uan kimetspatkej para kikixtiliskej iayo. Keman kitamichiujkej nejon no iluichiujkej. Satepan yajkej templo kampa kiueyichiuayaj inintatadios* uan ompa takuajkej, tatayikej uan peuak kiuijuikaltiaj* Abimélec.
28 Uan Gaal ikoneuj Ébed kijtoj: “¿Toni chiujkej Abimélec ikoneuj Jerubaal? ¿Uan toni chiujkej Zebul akin Abimélec kiixtalij maj taixyekana nikan Siquem? ¿Toni chiuanimej yejuan para maj tikintekitilijtokan? Amo moneki tiktekitiliskej Abimélec, okachi kuali maj tikintekitilikan ikoneuan Hamor.
29 Komo nejua nikinixyekanaskia akin nikan nemij, niktakuiliskia Abimélec”. Uan hasta kijtoj: “¡Xikinmiakilti mosoldados Abimélec uan xitechteuiki!”.
30 Uan keman Zebul kimatik tein kijtojka Gaal ikoneuj Ébed, tel kualanik.
31 Yejua ika kinichtakatitanik seki takamej para maj kiluitij Abimélec: “Gaal ikoneuj Ébed uan iikniuan yetokej nikan Siquem uan kichiujtokej maj mitsixnamikikan akin nikan nemij.
32 Xiuiki de youak iniuan takamej akin mitspaleuiaj uan ximochiakan kalampa de Siquem.
33 Uan niman keman tanesis, xikalakikan itech ueyi xolal uan xikinteuikan akin nikan nemij. Keman Gaal uan akin kipaleuiaj kisaskej para mitsteuiskej, xikchiua tein yeski para tikintanis”.
34 Uan Abimélec uan nochin akin kipaleuiayaj yajkej Siquem nejon youak. Yejua naujkan kinxejxeloj uan mochiakej kalampa de Siquem.
35 Mostika, Gaal ikoneuj Ébed kalankisak uan moketsak kalampa de Siquem. Ijkuak, Abimélec uan akin iuan yetoyaj kiskej de kampa motatijtoyaj.
36 Keman Gaal kinitak, kiluij Zebul: “¡Xikita! Ne tepeyoj ualtemotokej seki takamej”. Sayoj ke Zebul kiluij: “Timoixpolojtok. Tein tikitstok amo takamej, ta ininyekauil tepemej”.
37 Satepan Gaal kiluij: “¡Xikita! Seki takamej ualtemotokej ne tatajkoyampa uan oksekin ualajtokej itech ojti tein panoua kampa yetok ueyi kouit Meonenim”.
38 Zebul kiluij Gaal: “Tikelnamiki ke tikijtoj ‘¿Toni chiujkej Abimélec para maj tiktekitilikan?’. Nejin takamej yejuan akin tikinijijtojtoya. Nikan yetokejya, xikisa uan xikinteuiti”.
39 Uan akin taixyekanayaj Siquem kitojtokakej* Gaal keman kiteuito Abimélec.
40 Gaal choloj uan Abimélec kitokatiajki. Miakej kinmiktijkej nejon tonal. Kinmiktijtiajkej itech nochi ojti hasta kalampa den ueyi xolal.
41 Satepan Abimélec mokepak Arumá kampa yetoya ichan. Uan Zebul akin taixyekanaya Siquem kintokak* Gaal uan iikniuan.
42 Mostika, Abimélec kimatik ke akin nemiaj Siquem kisayaj kalampa den ueyi xolal.
43 Yejua ika, Abimélec yajki iniuan takamej akin kipaleuiayaj uan exkan kinxejxeloj. Yejuan mokaujkej kalampa den ueyi xolal uan mochiakej hasta maj kisanij akin nemiaj Siquem. Keman yejuan kistiayaj, kinteuitoj uan kinmiktijkej.
44 Abimélec uan takamej akin iuan yetoyaj tateuijtiajkej uan ajsikej kampa yetoya puerta den ueyi xolal. Uan okseki takamej akin no kipaleuiayaj kinteuitoj uan kinmiktitoj nochin akin yetoyaj kalampa den ueyi xolal.
45 Nochi nejon tonal, Abimélec kinteuij akin nemiaj Siquem hasta ke kintanik. Kinmiktij akin ompa nemiaj uan kiixpoloj ueyi xolal. Satepan kitsonpachoj ika istat nochi ueyi xolal.
46 Nochin taixyekananij akin nemiaj itech uejkapan kali tein yetoya ompa Siquem kimatkej tein kichiuak Abimélec. Yejua ika yajkej templo kampa kiueyichiuayaj El-Berit* uan motatijkej itech se cuarto kampa kuali tatsaktoya.
47 Abimélec kimatik ke nochin akin taixyekanayaj itech uejkapan kali tein yetoya ompa Siquem mosentilijkaj itech nejon cuarto.
48 Yejua ika niman yajki tepet Zalmón iniuan takamej akin kipaleuiayaj. Kiuikak se hacha uan kitekik imakoujyo se kouit. Satepan momamaltij uan kiniluij akin iuan yayaj: “Namejuan no xiktektiuetsikan se imakoujyo kouit”.
49 Nochin takamej kitekkej imakoujyo kouit uan kitojtokakej* Abimélec. Ika nochi nejon koujmej kiyoualojkej cuarto kampa motatijtoyaj akin taixyekanayaj itech uejkapan kali uan kitikuiltijkej. Ijkon kinmiktijkej nochin akin nemiaj itech uejkapan kali tein yetoya Siquem. Katkaj kemej mil takamej uan siuamej.
50 Satepan Abimélec yajki kinteuito akin nemiaj Tebez uan kintanik.
51 Tatajko den ueyi xolal yetoya se uejkapan kali uan ompa motatitoj* nochin takamej, siuamej uan akin taixyekanayaj itech ueyi xolal. Kuali tatsakkej uan tejkokej* kampa okachi uejkapan.
52 Uan Abimélec ajsik hasta kampa yetoya uejkapan kali para kitikuiltis. Keman yaya kitikuiltitia,
53 se siuatsin kipankajkauak se ueyi tet tein ika takuechouaj. Nejon tet uetsito ikuako* Abimélec uan kikuatapanak.
54 Abimélec niman kinotsak takat akin kimamaliaya tein ika tateuiaya uan kiluij: “Xikixti momachete tein ojkan tenej* uan xinechmikti para maj amo kijtokan ke nechmiktij se siuat”. Nejon takat kitokilij imachete tein ojkan tenej uan Abimélec mikik.
55 Keman israelitas kiitakej ke Abimélec mikik, mokepkej ininchan.
56 Ijkon Dios kitaxtaualtij Abimélec tein amo kuali tein kichiuilijka itat porin kinmiktij 70 iikniuan.
57 Uan Dios no kintaxtaualtij nochi tein amo kuali tein kichiujkaj akin nemiaj Siquem. Ijkon mochiuak tein Jotán, ikoneuj Jerubaal, kinnejnekilijka.
Tajtolmelaualismej
^ Itech hebreo, “nanoomiyo uan nanonakayo”.
^ Oso “70 siclos”.
^ Oso “mocholtij”.
^ Itech hebreo, “amo nikneki namechkuapanauis”.
^ Itech hebreo, “amo nikneki namechkuapanauis”.
^ Oso “nankipoujkaitaj”.
^ Oso “nankipoujkaitaj”.
^ Itech hebreo, “Dios kichiuak maj kinejnekinij kichiuaskej tein amo kuali”.
^ Oso “mocholtitij”.
^ Oso “inintiotsin”.
^ Oso “kitejtelchiuaj”, “kijijtouaj”. Nikan kijtojtokej maj kipano teisa tein amo kuali.
^ Oso “kitoktilijkej”.
^ Oso “kineualtij”.
^ No moixmatia kemej Baal-Berit.
^ Oso “kitoktilijkej”.
^ Oso “mocholtitoj”.
^ Oso “pankiskej”.
^ Oso “ikuatipan”.
^ Oso “moespada”.
