Lucas 1:1-80
1 Miakej semi kitemojkej kimatiskej tein mochiuak uan kijkuilojkej, uan nejon tejuan no senkis tikneltokaj.
2 Oksekin akin no kiitakej tein mochiuak uan kiteixmatiltiaj itajtol Dios, techiluijkej nochi nejin.
3 Yejua ika, tejuatsin Teófilo, nejua no kuali nimomachtij nochi nejin uan nikixtalij nimitsijkuilouilis ijkon kemej mochiujtiualaj desde keman peuak nochi.
4 Nikchiuak nochi nejin para uelis tikyekmatis ke melauak nochi tein mitsmachtianij.
5 Keman Herodes* katka tekiuaj ompa Judea, nemia se tiopixkat akin monotsaya Zacarías. Yejua pouia iniuan oloch tiopixkamej tein itokay Abías. Isiuatsin monotsaya Elisabet, akin iuejkaujtat katka Aarón.
6 Nochin omen katkaj yolmelaujkej iixpan Dios uan senkis kitakamatiaj nochi itanauatiluan Jehová* uan nochi tein kijtojka ke monekia se kichiuas.
7 Sayoj ke amo kipiayaj nion se konetsin porin Elisabet amo uelia kinpiaya konemej, uan nochin omen xiuejkejya* katkaj.
8 Zacarías tekititoya kemej tiopixkat iixpan Dios keman ixyetoya tekitiskej oloch tiopixkamej kampa pouia,
9 uan ijkon kemej ipa kichiuayaj tiopixkamej, ejkok hora keman kalakiskia itech itemplo Jehová* uan tapopochuiskia.
10 Uan keman tapopochuijtoya, nochin motataujtijtoyaj kalampa.
11 Uan iángel Jehová* monextij iixpan. Ijkatoya inakastan altar kampa tapopochuiaj.
12 Keman Zacarías kiitak, amo kimatia toni kichiuas uan motelmoujtij.
13 Sayoj ke in ángel kiluij: “Amo ximoui Zacarías, porin Dios kikakik tein semi ika timotataujtij. Mosiuatsin Elisabet kipias se okichpiltsin, uan moneki tiktokaytis Juan.
14 Timouelitas uan tiyolpakis, uan miakej yolpakiskej porin yoliti;
15 porin yeski ueyichiujkej iixpan Jehová.* Sayoj ke amo keman tayis vino nion okse tayil tein teuintij. Achto ke yolis ipa kipiasya ichikaualis Dios.
16 Uan kichiuas maj miakej israelitas mokepakan iuan ininDios, Jehová.*
17 Uan no, Dios kititanis maj youi iixpan ika chikaualis tein kipiaya Elías. Yejua kichiuas maj ininyolo tetatmej mochiua kemej ininyolo konemej uan kichiuas maj akin amo tatakamatij tamattokan uan maj kichiuakan tein kuali yetok. Yejua kichiuas nejon para maj senpouikan itech sayoj se xolal akin kitekitiliskej Jehová”.*
18 Zacarías kiluij in ángel: “¿Keniuj uelis nikneltokas nejon? Porin nixiuejya* uan nosiuatsin no xiuejya”.*
19 Uan ángel kinankilij: “Nejua niGabriel, akin niijkatok iixpan Dios uan yejua nechualtitanik maj mouan nitajtoki uan maj nimitsmatiltiki nejin kuali tanauatilmej.*
20 Sayoj ke, xikita, kemej amo tikneltokak tein nimitsiluij, amo uelis titajtos hasta keman mochiuas nejin, itech tonal tein ixyetok”.
21 Uan nochin kisentokayaj kichiayaj Zacarías uan motajtaniayaj keyej semi uejkauaya itech templo.
22 Keman ualkisak, amo uelia kinnojnotsaya, uan kimatkej ke itech templo kiitaka se milagro tein kimojkaitak. Kintanejnextiliaya ika imauan, sayoj ke kisentokaya amo uelia tajtouaya.
23 Keman kitamichiuak tekit tein ixyetoya kichiuas itech templo, yajki ichan.
24 Panokej seki tonalmej uan Elisabet mokokoxkatalij, uan makuil metsti amo kisak de ichan. Kijtouaya:
25 “Ijkon Jehová* nechpaleuij axkan. Nechelnamikik para maj amo nechpinaujtikanok”.
26 Keman kiuikayaya chikuasen metsti, Dios kititanik ángel Gabriel itech se ueyi xolal tein pouia Galilea tein monotsaya Nazaret.
27 Kititanik maj kiitati se ichpoch* akin motenkaujka monamiktis iuan se takat akin monotsaya José, akin iuejkaujtat katka David. Nejon ichpoch monotsaya María.
28 Keman ángel kalakik kampa yetoya María, kiluij: “Nimitstajpaloua María. Jehová* semi yolpaktok mouan uan mitstatiochiuijtok”.
29 Sayoj ke keman kiluij nejon, yejua moyolmoujtij uan kitemoj kimatis toni kijtosnekia nejon tajtolmej.
30 Yejua ika in ángel kiluij: “Amo ximoui María, porin semi tikyolpaktia Dios.
31 Xikita, timokokoxkatalis uan tikpias se okichpiltsin, uan moneki tiktokaytis Jesús.
32 Yejua yeski ueyichiujkej uan kiixmatiskej kemej iKoneuj akin okachi ueyichiujkej. Uan Jehová* Dios kichiuas maj tekiuajti kemej itat, David,
33 uan yejua kinixyekanas nochipaya ikoneuan Jacob. Yejua nochipa taixyekantos”.
34 Sayoj ke María kitajtanij* in ángel: “¿Keniuj uelis panos nejon, ta nejua amo nimotektok iuan nion se takat?”.
35 In ángel kinankilij: “Dios mitstitanilis ichikaualis, uan ichikaualis akin okachi ueyichiujkej motech yetos. Yejua ika akin yoliti amo kipias tajtakol uan kitokaytiskej iKoneuj Dios.
36 Uan mochankauj Elisabet no kokoxkayetok uan kiuikaya chikuasen metsti, maski xiuejya* uan kijtouayaj ke amo uelia kinpiaya konemej.
37 Porin nochi tein Dios kijtoua mochiua”.
38 Uan María kijtoj: “¡Nikan nietok! ¡Nejua niitakeual Jehová!* Maj notech mochiua ijkon kemej tikijtoj”. Satepan, in ángel yajki.
39 Panokej seki tonalmej, uan María kisteuak uan yajki ijsiujka kampa tepeyoj, itech se ueyi xolal tein poui Judá,
40 uan kalakik ichan Zacarías uan kitajpaloj Elisabet.
41 Niman keman Elisabet kikakik ke María kitajpaloj, ikonetsin ajkotsikuinik iijtik. Uan Elisabet kiselij ichikaualis Dios
42 uan chikauak kijtoj: “¡Tejua okachi titatiochiual ke nochin siuatsitsin, uan tatiochiual konetsin tein tikpiati!
43 ¿Toni nichiujkej nejua para maj inan noTekotsin nechkalpanoki?
44 Porin niman keman nikakik ke tinechtajpaloj, konetsin tein nikuika noijtik yolpakik uan ajkotsikuinik.
45 Yolpaki no akin kineltokak tein kiluijkej, porin tein Jehová* kiluij senkis mochiuas”.
46 Uan María kijtoj: “Nikueyitalia Jehová,*
47 uan semi niyolpaki ika tein Dios noTemakixtijkauj noka kichiuak,
48 porin yejua nechelnamikik, nejua niitakeual, akin amo niueyichiujkej. ¡Uan desde axkan nochin peuas kijtoskej ke niyolpaki!
49 Porin Dios akin chikauak uan yektik itokay, noka kichiuak uejueyi taman.
50 Nochipa kiniknelia akin kimojkatokaj.
51 Ika imay kinextij ke chikauak; kinmoyauak* akin moueyimatij.*
52 Akin ueyichiuanimej kinkuilij inintaixyekanalis uan kinueyitalij akin amo ueyichiuanimej.
53 Akin amo teyi kipiaj kinmakak nochi tein kuali uan tominpianij kiniluij maj yakan uan amo teyi kinmakak.
54 Kipaleuiko itekitikauj, Israel, para kinextis ke kielnamikia ke motenkaujka nochipa kiiknelis
55 Abrahán uan ikoneuan, ijkon kemej kiniluijka touejkaujtatuan”.
56 María mokauak iuan Elisabet kemej eyi metsti uan satepan mokepak ichan.
57 Uan ajsik tonal keman Elisabet kipiaskia ikonetsin uan kipiak se okichpiltsin.
58 Ivecinos uan ichankauan yolpakkej iuan keman kimatkej keniuj Jehová* semi kiiknelijka.
59 Chikueyitika tonal kiuikakej okichpiltsin maj kitekikan,* uan yaya kitokaytitij kemej itat: Zacarías.
60 Sayoj ke inan kijtoj: “¡Amo! Monotsati Juan”.
61 Yejuan kinankilijkej: “Nion se mochankauj ijkon monotsa”.
62 Uan kitanejnextilijkej Zacarías uan kitajtanijkej keniuj kinekia maj monotsa in okichpiltsin.
63 Yejua tajtanik se koujtsin* uan kijkuiloj: “Monotsa Juan”. Nochin kimojkaitakej.
64 Nimantsin Zacarías oksepa uelik tajtoj uan peuak kiueyitalia Dios.
65 Nochin akin ompaka nemiaj semi kimojkaitakej; uan itech nochi Judea peuak ika motajtoua nochi nejin.
66 Akin kitekakiliayaj tein mochiuak, ika tanemilijtinemiaj uan motajtaniayaj: “¿Toni kichiuas nejin okichpiltsin keman moskaltis?”. Porin tein melauj, Jehová* yetoya iuan.
67 Uan Dios kimakak ichikaualis Zacarías, itat in okichpiltsin, uan yejua kijtoj tein Dios kimatiltij:
68 “Maj tikueyitalikan Jehová,* ininDios israelitas, porin kiniknelij akin pouij itech ixolal uan kinmakixtij.
69 Techmakak se temakixtijkej akin semi chikauak uan ichankauj David, itekitikauj Dios,
70 ijkon kemej ne uejkauj kiniluij itanauatijkauan* maj kijtokan,
71 para techmakixtis ininmako akin techixnamikij uan ininmako nochin akin techtauelitaj.
72 Uan no para teiknelis ijkon kemej kiniluijka touejkaujtatuan uan para kielnamikis ueyi* taman tein Dios motenkauak,
73 tein motenkauak iuan touejkaujtat Abrahán,
74 ke satepan ke techmakixtiskia ininmako akin techixnamikij, techkauaskia maj tikueyichiuakan uan maj amo timouikan,
75 maj amo tikauakan uan maj nochipa tiyolmelaujkej.
76 Uan tejua, nokonetsin, tiyeski tiitanauatijkauj akin okachi ueyichiujkej, porin Jehová* mitstitanis xiouj iixpan uan xikyekchijchiua iojuan,
77 uan xiktematilti itech ixolal ke yejua uelis kinmakixtis keman kintapojpoluilis inintajtakoluan
78 porin toDios teyoliknelia. Yejua ika, tikitaskej se tanex ne ajko kemej keman tanesi
79 uan kintauilis akin nemij tayouayanijtik uan kampa in mikilis tayekauilijtok. Nejon tanex technextilis toni moneki tikchiuaskej para tiyolseujtoskej”.
80 In okichpiltsin moskaltij uan ichikaualis Dios kipaleuij maj semi takuaujtamati, uan mokauak itech taluakyan hasta in tonal keman monextij iniuan israelitas.
Tajtolmelaualismej
^ Oso “tatajmejya”, “tatotsitsinya”.
^ Oso “nitatajya”, “nitatotsinya”.
^ Oso “nanajya”, “nanotsinya”.
^ Oso “tajtolmej”.
^ Tajtol griego kijtosneki se siuapil akin amo keman motekani iuan se takat.
^ Oso “kitajtoltij”.
^ Oso “nanajya”, “nanotsinya”.
^ Oso “kinxinij”.
^ Oso “moueyinekij”.
^ Oso “maj kichiuilikan circuncisión”. Xikonita circuncisión.
^ Oso “uapaltsin”.
^ Xikonita tanauatijkej.
^ Oso “chipauak”.
