Lucas 18:1-43
18 Uan kintapouij se taman tein ika kinnextilij ke monekia nochipa motataujtiskej uan amo mosenkauaskej.
2 Kiniluij: “Itech se ueyi xolal yetoya se juez akin amo kimojkatokaya Dios nion kintakachiuaya* oksekin.
3 Ompa no nemia se siuatsin akin momikilijkaya itakatsin, akin miakpa yaya kiitati uan kiluiaya: ‘Xinechpaleui maj moyektali kemej moneki nejin kuejmol tein nikpia iuan akin nechteluilijtok’.
4 Uan seki tonalmej juez amo kinekik kipaleuis, sayoj ke moyoliluij: ‘Nejua amo nikmojkatoka Dios nion nikintakachiua* oksekin,
5 sayoj ke kemej nejin siuatsin kisentoka nechkuejmolojtok, nikpaleuis para maj amo kisentoka ualajto uan nechyolajxitijto’”.
6 Uan toTekotsin kisentokak kijtoj: “¿Nankikakkej tein kijtoj juez maski amo yolkuali katka?
7 Komo ijkon, ¿amo kiitas Dios maj kinpaleuikan akin kinijitak* akin youalintonal kitataujtiaj maj kinpaleui? Uan yejuan amo kiyolajxitiskej.
8 Namechiluia ke yejua kiitas maj nimantsin kinpaleuikan. Sayoj ke, keman niejkos nejua akin niyolik kemej takat, ¿onkaskej akin ijkon takuaujtamatiskej?”.
9 No kintapouij okse taman sekin akin kinemiliayaj ke katkaj yolkualmej uan kinitayaj oksekin ke amo teyi chiuanimej katkaj.
10 “Ome takamej pankiskej hasta templo motataujtitoj: se katka fariseo uan okse kisentiliaya impuesto.
11 Fariseo moketsak uan peuak motataujtia iyolijtik. Kijtouaya: ‘NoDios, nimitstasojkamatilia porin amo nikchiua kemej nochin kichiuaj: amo nitachteki, amo nitakajkayaua, amo niauilnemi..., nion no nikchiua kemej nejin akin kisentilia impuesto.
12 Ojpa semana nikixtalia amo nitakuas uan nitemaka diezmo* de nochi tein nimotanilia’.
13 Sayoj ke akin kisentiliaya impuesto, akin ijkatoya tepitsin nepaka, nion kinekia ajkotachias, ta moyolixkojkomoniaya uan kijtouaya: ‘NoDios, xinechikneli* porin nitajtakolej’.
14 Namechiluia ke keman nejin takat temok ichan, Dios kiitaya ke okachi yolmelauak ke nejon fariseo. Porin akin moueyitalia kipinaujtiskej, sayoj ke akin yolyemanik kiueyitaliskej”.
15 Sekin no kiualkuiliayaj ininkoneuan para maj kitali imauan inintech uan maj kintiochiua. Sayoj ke keman imomachtijkauan kiitakej nejin, peujkej kintakaualtiaj.
16 Sayoj ke Jesús tanauatij maj kinualkuilianij konemej uan kijtoj: “Xikinkauakan konemej maj nouan motokikan. Amo xikintsakuilikan, porin iTaixyekanalis Dios yeski ininaxka akin tamatij kemej yejuan.
17 Namechyekiluia ke akin amo kiselia iTaixyekanalis Dios kemej se konetsin, amo keman itech kalakis”.
18 Se inintaixyekankauj judíos kitajtanij:* “Kuali Tamachtijkej, ¿toni moneki nikchiuas uan ijkon uelis ninemis nochipaya?”.
19 Jesús kiluij: “¿Keyej tinechiluia Kuali Tamachtijkej? Amo akin yolkuali, ta sayoj se: Dios.
20 Tejua tikixmati nejin tanauatilmej: amo xiauilnemi, amo xitemikti, amo xitachteki, amo xitetakajkayauili, xiktakachiua* mopaj uan momaj”.
21 Uan yejua kiluij: “Nochi nejin niktakamati desde keman katka nipiliok”.
22 Keman Jesús kikakik, kinankilij: “Mitspolouaok se taman: xiknamaka nochi tein tikpia uan tein tiktanilis xikinxejxelouili pobres; ijkon tikpias tein kipia ipatiuj ne iluikak. Uan xiuiki uan xinechtojtoka”.
23 Keman kikakik nejin, nejon takat semi motayokoltij, porin semi tominpiaya.
24 Jesús kiitak uan kijtoj: “¡Semi ouij yeski maj kalakikan itech iTaixyekanalis Dios akin tominpiaj!
25 Tein melauj, okachi amo ouij maj se camello nalpano kampa koyoktik se aguja tein ika se tajtsoma ke maj se tominpixkej kalaki itech iTaixyekanalis Dios”.
26 Akin kikakkej nejin, tajtankej: “Komo ijkon, ¿akoni uelis makisas?”.
27 Yejua tanankilij: “Tein nikan taltikpak kiitaj ke amo uelis mochiuas, Dios ueli kichiua”.
28 Pedro kiluij: “Xikita, tejuan tikaujkej tein tikpiayaj uan timitstojtokakej”.
29 Yejua kiniluij: “Namechyekiluia ke akin kikauak ichan, isiuatsin, iikniuan, itatuan oso ikoneuan porin okachi kitayekanaltia iTaixyekanalis Dios,
30 kiselis okachi itech nejin tonalmej, uan satepan* nemis nochipaya”.
31 Uan kinuikak okseko 12 tatitanilmej uan kiniluij: “Xikitakan, tipankistokej Jerusalén uan nochi tein kijkuilojkej tanauatianij* ke nechpanoskia nejua akin niyolik kemej takat, mochiuas.*
32 Nechtemaktiskej ininmako akin amo judíos, nechpijpinaujtiskej, nechuijuikaltiskej* uan nechchijchaskej.
33 Uan satepan ke nechuijuitekiskej, nechmiktiskej, sayoj ke eyi tonal satepan oksepa ninemis”.*
34 Sayoj ke yejuan amo kiajsikamatkej tein kijtosnekia nochi nejin, porin amo monekia kiajsikamatiskej tein moijtojka.
35 Keman Jesús ajsitoyaya Jericó, se takat akin amo tachiaya tokotsyetoya ojtenoj, uan tajtantoya tomin.
36 Keman kikakik ke miakej ompaka panotoyaj, peuak tajtani toni mochiujtoya.
37 Kiluijkej: “¡Panotok Jesús akin kayot Nazaret!”.
38 Yejua ika, chikauak tsajtsik: “¡Jesús, iKoneuj David, xinechikneli!”.
39 Akin yayaj taixpan peuak kitakaualtiaj uan kiluiayaj maj amo tsajtsito. Sayoj ke yejua okachi chikauak tsajtsia: “¡IKoneuj David, xinechikneli!”.
40 Uan Jesús moketsak uan tanauatij maj kiualkuilianij takat. Keman takat motokij, Jesús kitajtanij:
41 “¿Toni tikneki maj nimitschiuili?”. Yejua kinankilij: “NoTekotsin, maj oksepa nitachia”.
42 Yejua ika Jesús kiluij: “Oksepa xitachia; tipajtik porin titakuaujtamatik”.
43 Uan nimantsin oksepa tachiak, uan peuak kitojtoka uan kiueyitalijtiaya Dios. Keman nochin kiitakej nejin, no kiueyitalijkej Dios.
Tajtolmelaualismej
^ Oso “nion kinpoujkaitaya”.
^ Oso “nion nikinpoujkaita”.
^ Oso “kinixpejpenak”.
^ Oso “xiyolkuali nouan”.
^ Oso “kitajtoltij”.
^ Oso “xikpoujkaita”.
^ Xikonita tonalmej; tein mochiujtok.
^ Xikonita tanauatijkej.
^ Oso “moajxitis”.
^ Oso “nechtejtelchiuaskej”.
^ Itech griego, “nimoajokuis”.
