Lucas 19:1-48
19 Uan yejua ajsik Jericó uan panotiajki itech ueyi xolal.
2 Ompa yetoya se takat akin monotsaya Zaqueo. Yejua kinixyekanaya akin kisentiliaj impuesto uan katka tominpixkej.
3 Nejin takat kinekia kiitas akoni katka Jesús. Sayoj ke, amo uelia kiitaya porin tel miakej yetoyaj uan amo uejkapantik katka.
4 Yejua ika tayekanteuak uan tejkok* itech se morajkouit para kiitas Jesús, porin yaya panotiya ompaka.
5 Keman ajsik ompa, Jesús kiajkoitak uan kiluij: “Zaqueo, nimantsin xipantemo porin axkan nimokauati mochan”.
6 Yejua temotiuetsik uan ika miak pakilis kiuikak ichan uan ompa mokauak.
7 Keman kiitakej nejin, nochin peujkej moichtakailuiaj: “Yajki mokauato ichan se tajtakolchiujkej”.
8 Sayoj ke Zaqueo moketsak uan kiluij toTekotsin: “Xikita noTekotsin, nikinmakati pobres tajko tein noaxka, uan nochi tein niksentilij keman nikintachtekij oksekin, nikepas naui achiok”.
9 Uan Jesús kiluij: “Nejin tonal Dios kimakixtij nejin takat uan ichankauan porin yejua no ikoneuj Abrahán.
10 Porin nejua akin niyolik kemej takat nikintemoko uan nikinmakixtiko akin poliujtoyaj”.
11 Keman yejuan kikaktoyaj nejin, kintapouij okse taman, porin yejuan kinemiliayaj ke keman ajsiskiaj Jerusalén, iTaixyekanalis Dios nimantsin monextiskia.
12 Yejua ika kijtoj: “Se takat akin katka ikoneuj se tekiuaj, yaya yati uejka kiseliti tanauatil kemej tekiuaj uan satepan mokepaskia.
13 Kinnotsak majtakti itakeualuan, kinmakak tel miak tomin* uan kiniluij: ‘Xiktekitiltikan hasta maj niuiki’.
14 Sayoj ke akin nemiaj itech ialtepeuj kitauelitayaj, uan kintitankej seki takamej maj kijtotij: ‘Amo tiknekij maj nejin takat techixyekana kemej tekiuaj’.
15 ”Keman kiselij tanauatil kemej tekiuaj uan mokepak, kinsentilij itakeualuan akin kinmakaka tomin* porin kinekia kimatis kanachi kitankaj.
16 Se takeual kiitato uan kiluij: ‘NoTeko, ika motomin niktanik majtakti achiok’.
17 Tekiuaj kinankilij: ‘¡Tel kuali tein tikchiuak, semi tiyolkuali! Kemej tiknextij ke titakuaujtamach itech se taman tein amo ueyi, titaixyekanas itech majtakti uejueyi xolalmej’.
18 Uan okse takeual kiitato uan kiluij: ‘NoTeko, ika motomin niktanik makuil achiok’.
19 Yejua no ijkon kinankilij: ‘Tejua titaixyekanas itech makuil uejueyi xolalmej’.
20 Sayoj ke ualaj okse uan kiluij: ‘NoTeko, nikan yetok motomin tein niktatij* itech se tasal.
21 Nejua nimitsmouilia, porin semi titauel; tikixtia tomin tein amo tikauato itech banco uan tiksentilia tein amo tiktokak’.
22 Tekiuaj kinankilij: ‘Amo tiyolkuali, ika tein tikijtoj nimitstatsakuiltiti. ¿Tikijtoua ke tikmatia ke nitauel, ke nikixtia tomin tein amo nikauato itech banco uan ke niksentilia tein amo niktokak?
23 Komo ijkon, ¿keyej amo tikauato notomin itech banco? Ijkon, keman niualaskia, nechkepiliskiaj notomin ika tein kitaniliskia’.
24 ”Uan kiniluij akin ompa yetoyaj: ‘Xikuilikan tomin, uan xikmakakan akin kitanik majtakti achiok’.
25 Sayoj ke yejuan kiluijkej: ‘¡ToTeko, yejua kipiaya majtakti!’.
26 Yejua kinnankilij: ‘Namechiluia ke akin kipia, kimakaskej okachi, sayoj ke akin amo kipia, kikuiliskej hasta tein kipia.
27 Uan no, xikinualkuikan nikan akin nechtauelitaj, akin amo kinekiaj maj nikinixyekana uan xikinmiktikan noixpan’”.
28 Keman kitamiijtoj nejin, kisentokak pankisak Jerusalén.
29 Uan keman ajsitiaya Betfagué uan Betania, itech Olivojtepet, kintitanik ome imomachtijkauan
30 uan kinnauatij nejin: “Xiakan itech ne xolal tein nankiitaj. Keman nanajsiskej, nankiitaskej ilpitok* se burrito tein amo akin itech mopantalijtok. Xiktojtomakan uan xinechualkuilikan.
31 Uan komo namechtajtaniaj* ‘¿Keyej nankitojtontokej?’, xitanankilikan ‘ToTekotsin kineki maj tikuikilikan’”.
32 Uan nejon ome imomachtijkauan yajkej uan kiajsikej ijkon kemej yejua kiniluijka.
33 Sayoj ke keman kitojtontoyaj in burrito, itekouan kintajtanijkej: “¿Keyej nankitojtontokej in burrito?”.
34 Yejuan kinankilijkej: “ToTekotsin kineki maj tikuikilikan”.
35 Uan kiuikilijkej Jesús, kitalijkej ininpantaken ipanko burrito uan Jesús ipanko motalij.
36 Ijkon kemej panotiaya itech ojti, yejuan kisoujtiayaj ininpantaken.
37 Niman keman ajsitiaya itech ojti kampa peua se pantemoua den Olivojtepet, nochin imomachtijkauan semi yolpakkej uan peujkej chikauak kiueyitaliaj Dios porin kiitakaj nochi milagros tein kichiujka.
38 Kijtouayaj: “¡Tatiochiual akin ualajtok kemej Tekiuaj itokaykopa Jehová!* ¡Maj tejuan uan Dios kuali timouikakan. Tikueyitaliaj akin yetok ne iluikak!”.
39 Sayoj ke seki fariseos akin no ompa yetoyaj kiluijkej: “Tamachtijkej, xikintakaualti momomachtijkauan”.
40 Yejua kinnankilij: “Namechiluia ke komo yejuan amo teyi kijtoskiaj, temej chikauak tajtoskiaj”.
41 Keman ajsitiaya Jerusalén uan kiitak ueyi xolal, kichokilij
42 uan kijtoj: “Komo tejua, kemaj tejua, tikajsikamatiskia itech nejin tonal toni monekia para tiyolseujtos...* Sayoj ke axkan amo ueli tikita nejon.
43 Porin ejkoskej tonalmej keman akin mitsixnamikij kikejketsaskej koujmej tein tenpijpitstikej* uan ika mitsyoualoskej uan amo kanaj uelis tikisas.
44 Tejua uan akin motech nemij,* namechtalixuitekiskej uan amo kikauaskej maj motech nepaniujto nion se tet iuan okse, porin amo tikmatik kemanian Dios mitsitako”.
45 Uan kalakik itech templo uan peuak kinkalankixtia akin ompa tanamakatoyaj.
46 Kiniluiaya: “Ijkuiliujtok ‘Nochan yeski se kali kampa motataujtiskej’, sayoj ke namejuan nankichiujkej kemej se kali kampa motatiaj* tachtekinij”.
47 Yejua mojmostaj kisentokak tamachtij itech templo. Sayoj ke uejueyi tiopixkamej, tajkuilouanij uan uejueyi chiuanimej kitemouayaj kimiktiskej.
48 Sayoj ke amo kiajsiaj keniuj kimiktiskej, porin miakej nochipa iuan nentinemiaj porin kinekiaj kikakiskej.
Tajtolmelaualismej
^ Oso “pankisak”.
^ Itech griego, “majtakti minas”. Tomin tein kikuiaj griegos uan etik katka 340 gramos, uan aksa kitania kemej itech eyi metsti (kemej 100 dracmas).
^ Itech griego, “plata”.
^ Oso “nikcholtij”.
^ Oso “tsikaujtok”.
^ Oso “namechtajtoltiaj”.
^ Nejin eyi punto kinextia ke Jesús amo kitamiijtoj tein yaya kijtoti.
^ Oso “yekapijpitstikej”.
^ Itech griego, “uan mokoneuan”.
^ Oso “mocholtiaj”.
