Lucas 21:1-38
21 Uan keman moixajokuik, kinitak tominpianij kipantalijtoyaj inintomin itech kaxomej itech templo.
2 Uan no kiitak se siuatsin pobre akin momikilijkaya itakatsin. Yejua kipantalijtoya ome centavitos.*
3 Uan Jesús kijtoj: “Namechyekiluia ke nejin siuatsin pobre kipantalij okachi ke nochin yejuan.
4 Porin nochin yejuan kipantaliaj tein amo kikuijok, sayoj ke nejin siuatsin maski semi pobre, kipantalij nochi tein ika moixpanoltiskia”.
5 Satepan, keman sekin moiluijtoyaj keniuj templo kichijchiujkej ika kuajkuali uan kualtsitsin temej uan ika miak taman tein patiyoj tein kimaktilijkaj Dios,
6 yejua kijtoj: “Ejkoskej tonalmej keman nion se tet nepaniujtos iuan okse kemej nankiitaj axkan. Nochi tamixitinis”.
7 Yejua ika kitajtanijkej:* “Tamachtijkej, ¿kemanian yekmelauj panos nejon, uan toni kinextis ke mochiuatiya?”.
8 Kinnankilij: “Ximoyekpiakan. Amo ximokauakan maj namechkajkayauakan, porin miakej ualaskej, kikuiskej notokay uan kijtoskej: ‘Nejua niCristo’ oso ‘Ejkotokya tonal tein ixyetok’. Amo xikintojtokatiakan.
9 Uan no, keman nankikakiskej ke moteuijtokej uan ke motakuejmolchiujtok, amo ximojkakalakikan. Porin achto moneki mochiuas nejin, sayoj ke ayamo niman tatamis”.
10 Uan no kiniluij: “Akin nemij itech seki xolalmej moteuiskej iniuan akin nemij itech okseki xolalmej uan akin nemij itech se altepet iniuan akin nemij itech okse altepet.
11 Chikauak talolinis, uan miakkan onkas mayan uan tetsaujkakokolismej. Uan kiitaskej tein kintetsaujkamoujtis, uan monextis ne iluikak tein amo keman moitstoya.
12 ”Sayoj ke achto ke mochiuas nochi nejin, namechkitskiskej uan namechtajyouiltiskej. Namechtemaktiskej kampa taueyichiuaj judíos uan namechtsakuaskej. Uan porin nantakuaujtamatij itech notokay namechuikaskej iniuan uejueyi tekiuanij uan okseki tekiuanij.
13 Nejon tapaleuis xikiniluikan tein nankineltokaj.
14 Yejua ika, xikixtalikan amo namomamachtiskej keniuj namotajtouiskej,
15 porin nejua namechpaleuis xikmatikan toni nankijtoskej, uan ijkon, keman namechsenkuiskej akin namechixnamikij amo teyi uelis namechnankiliskej.
16 Uan no, hasta namotatuan, namokniuan, namochankauan uan namotasojikniuan namechtemaktiskej. Uan nansekimej namechmiktiskej.
17 Uan nochin namechtauelitaskej porin nantakuaujtamatij itech notokay.
18 Sayoj ke amo nankipoloskej nion se namotson.
19 Uan komo nantaxikouaj namakisaskej.
20 ”Uan no, keman nankiitaskej ke miakej soldados kiyoualojtokej Jerusalén, xikmatikan ke kiixpolotijya.
21 Uan akin yetoskej Judea, maj cholokan itech tepemej; akin yetoskej Jerusalén maj kisakan de ompa, uan akin yetoskej inintalpan maj amo yakan Jerusalén.
22 Porin nejon tonalmej Dios kinextis iueyi kualanyo, para maj mochiua nochi tein ijkuiliujtok.
23 ¡Teikneltijkej siuatsitsin akin kokoxkayetoskej oso tachichitijtoskej itech nejon tonalmej! Porin mochiuas ueyi tajyouilis itech nejin talmej uan kintatsakuiltiskej akin ompa nemij.
24 Uan kinmiktiskej ika machete tein ojkan tenej* uan kinuikaskej temako itech nochin altepemej; uan akin amo judíos ipan tajtaksaskej* Jerusalén hasta maj tamikan tonalmej keman taixyekanaskej akin amo judíos.
25 ”No monextis seki taman itech tonaltsin, metsti uan sitalimej, uan akin nemij itech tataman altepemej tajyouiskej, uan amo kimatiskej toni kichiuaskej keman tetsaujkaijkoyokas ueyiat uan moajkotamotas.
26 Kemej tein onkak ne iluikak kitsetseloskej, tel miakej ixtayouaskej porin semi mojkamikiskej uan porin kinteltekipachos tein mochiuati itech taltikpak.
27 Uan kiitaskej akin yolik kemej takat ualajtok itech se mixti ika chikaualis uan ueyi kualtsinyot.
28 Sayoj ke keman peuas mochiuas nochi nejon, ximoketsakan uan ximoixajokuikan, porin ejkotokya tonal keman Dios namechmakixtis”.
29 Uan kintapouij nejin: “Xikitakan higojkouit uan nochin okseki koujmej.
30 Keman nankiitaj ke maxiujyouaj nankimatij ke amo uejkaua tatakisya.*
31 No ijkon namejuan, keman nankiitaskej ke mochiua nochi nejin, xikmatikan ke iTaixyekanalis Dios ejkotokya.
32 Namechyekiluia ke akin nemij axkan amo mikiskej hasta maj mochiua nochi nejin.
33 Iluikak uan taltikpak ixpoliuiskej, sayoj ke notajtoluan amo keman ixpoliuiskej.
34 ”Ximotachilikan para maj amo keman sayoj xiknemilijtokan nanteltakuaskej uan nanteltatayiskej uan sayoj namechtekipachojtos tein namechpoloua uan nejon tonal ejkotiuetsis uan namechichtakauis
35 ijkon kemej se trampa kiichtakauia se tapial. Porin nejon tonal ualas kinichtakauikiuj nochin akin nemij itech taltikpak.
36 Yejua ika, xiijsatokan* uan nochipa ximotataujtijtokan para uelis namakisaskej keman mochiuas nochi nejin, uan maj ueli xiijkatokan iixpan akin yolik kemej takat”.
37 Uan tonayan tamachtiaya itech templo, sayoj ke keman tayouaya, kisaya de ompa uan yaya mokauati itech Olivojtepet.
38 Uan semi kualkan, nochin yayaj templo kikakitij.
Tajtolmelaualismej
^ Itech griego, “ome leptones”. Nejin se cuadrante, tomin tein aksa kitania kemej itech 10 minutos.
^ Oso “kitajtoltijkej”.
^ Oso “espada”.
^ Oso “kitejteliksaskej”, “kitsojtsoniksaskej”.
^ Oso “takauaniti (tapatsmikiti)”.
^ Oso “xitachixtokan”, “xiixpetantokan”.
