Lucas 7:1-50
7 Keman kintamiiluij akin ompa yetoyaj tein monekia kiniluis, ajsik Capernaúm.
2 Uan ompa yetoya se takat akin kinixyekana 100 soldados. Yejua kipiaya se takeual akin semi kitasojtaya uan semi mokokouaya, xikaujtoyaya.*
3 Keman kikakik ke oksekin ika tajtouayaj Jesús, kintitanik seki taixyekananij judíos maj kiluitij maj kipajtiki itakeual.
4 Yejuan yajkej kampa yetoya Jesús uan peuak kiteltataujtiaj: “Nejin takat kinamiki xikpaleui,
5 porin techtasojta tejuan tijudíos uan yejua techchijchiuilij kampa titaueyichiuaj”.
6 Yejua ika Jesús yajki iniuan. Sayoj ke keman ajsitiayaya kalijtik, akin kinixyekana soldados kintitanik seki itasojikniuan maj kiluitij: “Tejuatsin, amo ximokuejmolo tiualas, porin amo nechnamiki xikalaki nochan.
7 Yejua ika amo no nimitsnamikiko. Sayoj ke xitanauati maj notakeual pajti uan pajtis.
8 Porin nejua no nechixyekanaj uan nikinixyekana soldados. Se nikiluia ‘¡Xiouj!’ uan youi, uan okse nikiluia ‘¡Xiuiki!’ uan uitse, uan notakeual nikiluia ‘¡Xikchiua nejin!’ uan kichiua”.
9 Jesús semi kimojkakakik nejon, moikankepak uan kiniluij akin kitojtokayaj: “Namechiluia ke nion nikan Israel nikitani aksa* maj semi takuaujtamati kemej nejin takat”.
10 Keman takamej akin kintitanka mokepkej kalijtik, kiitakej ke takeual pajtikaya.
11 Uan amo uejkauak, yajki ueyi xolal Naín, uan imomachtijkauan uan tel miakej iuan yayaj.
12 Keman ajsitiaya ikalakyan ueyi xolal, kiitak ke kiuikayaj se miketsin, yayaj kitokatijya, katka ikonetsin se siuatsin uan ipa setsin katka. Uan no, nejon siuatsin momikilijkaya itakatsin. No iuan yayaj tel miakej akin kayomej itech nejon ueyi xolal.
13 Keman toTekotsin kiitak siuatsin, semi kiyoliknelij uan kiluij: “Amo xichokaok”.
14 Niman motokij uan kitalij imay kampa kiuikayaj miketsin, uan akin kiuikayaj moketskej. Ompa, yejua kijtoj: “Okichpil, nimitsiluia: ¡ximeua!”.
15 Uan okichpil motalij uan peuak tajtoua, uan Jesús kimaktilij inan.
16 Nochin semi kimojkaitakej uan peujkej kiueyitaliaj Dios uan kijtouayaj: “Se ueyi tanauatijkej* monextiko touan”, uan “Dios kielnamikik ixolal”.
17 Uan nochi tein kichiuaya momatik itech nochi xolalmej tein pouij Judea uan ompaka.
18 Uan itatojtokakauan Juan kitapouijkej nochi nejin.
19 Yejua ika Juan kinnotsak omen uan kintitanik maj kitajtanitij* toTekotsin: “¿Tejua yaya tiualati, oso moneki tikchiaskej okse?”.
20 Keman ajsitoj kampa yetoya Jesús, nejon takamej kiluijkej: “Juan akin teauia techualtitanik maj timitstajtanikij ox tejua yaya tiualati oso moneki tikchiaskej okse”.
21 Nejon hora, yejua kinpajtij miakej akin mokokouayaj, akin semi kinkokouaya teisa uan akin kipiayaj amokuali ejekamej, uan kintachialtij miakej akin amo tachiayaj.
22 Uan kinnankilij: “Xiakan uan xiktapouikan Juan tein nankiitakej uan tein nankikakkej: akin amo tachiayaj axkan tachiajya, metskoxojmej yeknejnemijya, akin kipiayaj lepra pajtikejya,* akin amo ueliaj takakiaj takakijya, mikemej oksepa nemij* uan pobres kinixmatiltiaj kuali tanauatilmej.*
23 Yolpaki akin amo teyi kitsakuilia maj notech takuaujtamati”.*
24 Keman yajkej akin Juan kintitanka, Jesús peuak ika kinnojnotsa Juan akin ompa moajsiaj. Kiniluij: “¿Toni nankiitatoj taluakyan? ¿Se akat tein ejekat kiuiuika?
25 ¿Toni nankiitatoj? ¿Se takat akin takentok ika tasal tein patiyoj? ¡Akin kikuij tasal tein patiyoj uan kipiaj nochi tein kinekij yetokej ininchan tekiuanij!
26 Komo ijkon, ¿toni nankiitatoj? ¿Se tanauatijkej? Namechiluia ke kemaj, uan okachi tayekantok ke se tanauatijkej.
27 Ijkuiliujtok nejin keman ika motajtoua Juan: ‘¡Xikita! ¡Niktitaniti notanauatijkauj maj youi moixpan, uan yejua mitsyekantias uan mitsyekchijchiuilijtias ojti!’.
28 Namechiluia ke hasta axkan amo yolini se akin okachi ueyichiujkej ke Juan. Sayoj ke, akin okachi amo ueyichiujkej itech iTaixyekanalis Dios, okachi ueyichiujkej ke yejua”.
29 Keman nochin akin ompa nemiaj uan akin kisentiliaj impuesto kikakkej nejin, kijtojkej ke Dios kichiua nochi tein kuali yetok, porin Juan ipa kinauijkaya.
30 Sayoj ke fariseos uan akin kuali kiixmatiaj iTanauatil Moisés amo kinekkej kichiuaskej tein Dios kinekia, porin yejuan amo kinauijka Juan.
31 Jesús no kijtoj: “¿Kemej akoni ueliskia nikijtos ke tamatij akin nemij axkan?
32 Tamatij kemej pipiltsitsin akin tokotsyetokej itech plaza uan chikauak moiluiaj: ‘Tamechpichilijkej flauta, sayoj ke namejuan amo namijtotijkej; timotayokolkuikatijkej,* sayoj ke namejuan amo nanchokakejʼ.
33 Porin Juan akin teauia kiixtalia amo takuas nion tayis vino uan namejuan nankijtouaj: ‘Kipia se amokuali ejekatʼ.
34 Nejua akin niyolik kemej takat kemaj nitakua uan nitayi vino uan namejuan nankijtouaj: ‘¡Xikitakan! ¡Se takat kampets uan tauankej,* akin mouika iniuan akin kisentiliaj impuesto uan iniuan tajtakolchiuanij!ʼ.
35 Sayoj ke akin tamatkej kinextia ika tein kichiua”.*
36 Uan semej fariseos miakpa kiluijtoya maj iuan takuati. Yejua ika Jesús kalakik ichan fariseo uan motalij kampa takuajtoyaj.
37 Uan se siuatsin akin moixmatia itech ueyi xolal kemej tajtakolchiujkej kimatik ke Jesús takuajtoya ichan fariseo, uan kiualkuik se istak kontsin tein pexontoya* ika se aceite tein kualtsin ajuiyak.
38 Motokij iikankopa Jesús, chokatoya imetsnakastan uan iixayo uetsia imetsko uan peuak kimetsuajuatsa ika itson. No kimakaya besos imetsuan,* uan kimetstekilij nejon aceite.
39 Keman fariseo akin kiyoleujka kiitak nejin, moyoliluij: “Komo nejin takat yekmelauj yeskia se tanauatijkej, kimatiskia akoni kimetskitskijtok; kimatiskia ke yejua se tajtakolchiujkej”.
40 Sayoj ke, kemej Jesús kimatik tein kinemilijtoya, kiluij: “Simón, nikneki nimitsiluis teisa”. Yejua kinankilij: “¡Xinechilui Tamachtijkej!”.
41 “Ome takamej kitauikiliayaj se takat akin tetaneujtia tomin; se kitauikiliaya 500 denarios,* uan okse, kitauikiliaya 50.
42 Kemej amo kipiayaj keniuj kikepiliskej, ika nochi iyolo kiniluij ke amo teyi kitauikiliayajok. ¿Akoni tiknemilia ke okachi kitasojtas?”.
43 Simón kinankilij: “Niknemilia ke takat akin okachi tauikaya”. Yejua kiluij: “Kuali titanankilij”.
44 Uan moixkepak kampa yetoya siuatsin uan kiluij Simón: “¿Tikita nejin siuatsin? Nikalakik mochan uan amo tinechmakak at para nimometspajpakas, sayoj ke yejua nechmetspajpakak ika iixayo uan nechmetsuajuatsak ika itson.
45 Amo tinechmakak se beso,* sayoj ke nejin siuatsin, desde keman nikalakik, kimakatok besos nometsuan.*
46 Amo tinechkuatalilij aceite, sayoj ke nejin siuatsin nechmetstekilij aceite tein kualtsin ajuiyak.
47 Yejua ika nimitsiluia ke maski miak* itajtakoluan, niktapojpoluia, porin semi tetasojtak. Sayoj ke akin amo miak kitapojpoluiliaj, amo semi tetasojta”.
48 Uan kiluij siuatsin: “Nejua nimitsintapojpoluilia motajtakoluan”.
49 Akin iuan takuajtoyaj peujkej moiluiaj: “¿Akoni nejin takat akin hasta tetapojpoluilia se itajtakoluan?”.
50 Sayoj ke yejua kiluij siuatsin: “Dios mitsmakixtij porin titakuaujtamati. Xiouj uan amo ximotekipacho”.
Tajtolmelaualismej
^ Oso “momikilijtoyaya”.
^ Oso “akin”, “akaj”.
^ Xikonita tanauatijkej.
^ Oso “kitajtoltitij”.
^ Oso “chipauayakejya”.
^ Itech griego, “kinajokuij”.
^ Oso “tajtolmej”.
^ Oso “amo kiuetsiltia (kitepotamia) tein nikchiua”.
^ Oso “titayokolcantarojkej”.
^ Itech griego, “tel tayi vino”.
^ Oso “tamatilis monextia ika nochi ikoneuan”.
^ Oso “temitoya”.
^ Oso “No kimetspijpitsouaya”, “No kimetstejtenamikia”.
^ Oso “Amo tinechpitsoj”, “Amo tinechtenamik”.
^ Oso “nechmetspijpitsojtok”, “nechmetstenamiktok”.
^ Oso “uejueyi”.
