Marcos 9:1-50
-
Jesús mopata kemej moita (1-13)
-
Kipajtia se okichpil akin kipiaya se amokuali ejekat (14-29)
-
“Akin takuaujtamati nochi uelis kichiuas” (23)
-
-
Jesús oksepa kijtoua ke kimiktiskej (30-32)
-
Imomachtijkauan Jesús motajtolteuiaj (33-37)
-
“Akin amo techixnamiki, techpaleuia” (38-41)
-
Miak taman tein teuetsiltia (42-48)
-
“Ximochiuakan kemej istat” (49, 50)
9 Uan no kiniluij: “Namechyekiluia ke sekin akin nikan nanyetokej amo namikiskej, ta achto nankiitaskej ke Dios taixyekantokya* ika chikaualis”.
2 Panok chikuasen tonal uan Jesús kiuikak Pedro, Santiago uan Juan itech se ueyi tepet, kampa sayoj yejuan yetoyaj. Uan ininixpan, Jesús mopatak kemej moitaya.
3 Itasal peuak mimilika; okachi pochiktiak kemej nion akin ueliskia kipochinaltis maski semi kipakaskia.
4 Uan monextijkej Elías uan Moisés, akin tajtojtoyaj iuan Jesús.
5 Yejua ika Pedro kiluij Jesús: “Tamachtijkej,* ¡tiyolpakij nikan tietoskej! Maj tikchijchiuakan eyi kaltsitsin: se para tejua, se para Moisés uan okse para Elías”.
6 Tein melauj, Pedro amo kimatia toni kichiuas, porin semi moujtoyaj.
7 Uan nesik se mixti tein kinkemik, uan mixtsalan Dios kiualijtoj: “Yejua nejin noKonetsin akin niktasojta. Xiktajtolkakikan”.
8 Uan niman, keman tatachiakej, kiitakej ke amo akaj yetoyaok iniuan, ta sayoj Jesús.
9 Keman pantemotiualayaj itech tepet, yejua kinnajnauatij maj amo akin kitapouianij tein kiitakaj hasta maj akin yolik kemej takat oksepa nemi.*
10 Yejuan kitakamatkej tein kinnauatij,* sayoj ke ika monojnotstiayaj toni kijtosnekia keman kijtoj ke oksepa nemiskia.*
11 Uan peuak kitajtaniaj* Jesús: “¿Keyej tajkuilouanij kijtouaj ke Elías moneki achto ualas?”.
12 Yejua kiniluij: “Melauj nejon, Elías achto ualas uan oksepa kiyektalis nochi. Sayoj ke, komo ijkon, ¿keyej ijkuiliujtok ke akin yolik kemej takat moneki semi tajyouis uan kiixtopeuaskej?
13 Sayoj ke tein melauj, nejua namechiluia ke Elías ualajya uan kichiuilijkej tein kinekkej, ijkon kemej moijkuiloj ke kipanoskia”.
14 Keman ajsikej kampa yetoyaj okseki imomachtijkauan Jesús, kiitakej ke tel miakej kinyoualojtoyaj uan ke seki tajkuilouanij motajtolteuijtoyaj iniuan.
15 Niman keman akin ompa yetoyaj kiitakej Jesús, nochin semi kimojkaitakej uan tsikuinteujkej kitajpalotoj.
16 Uan yejua kintajtanij: “¿Toni ika namotajtolteuijtokej iniuan?”.
17 Se takat kinankilij: “Tamachtijkej, nimitsualkuilij nookichpil porin kipia se amokuali ejekat tein amo kikaua maj tajto.
18 Nochipa keman kikitskia, kitalixuiteki, uan okichpil tenposokkisa, tananatska uan kuetaui. Nikiniluij akin mitstojtokaj maj kikalankixtikan, sayoj ke yejuan amo uelkej”.
19 Jesús tanankilij: “¡Namejuan* amo nantakuaujtamatij! ¿Hasta kemanian monekis namouan nietos? ¿Hasta kemanian monekis namechxikojtos? Xinechualkuilikan”.
20 Yejua ika kiualkuilijkej in okichpil. Niman keman amokuali ejekat kiitak Jesús, chikauak kitsetseloj in okichpil, uetsito talpan, motetekuinojtinemia* uan tenposokkisaya.
21 Uan Jesús kitajtanij itat in okichpil: “¿Kemanian peuak kipanoua nejin?”. Yejua kinankilij: “Keman konetok katka.
22 Miakpa amokuali ejekat kitamota itech tit* oso itech at porin kineki kimiktis. Sayoj ke, komo ueli tikpajtia, xitechikneli uan xitechpaleui”.
23 Jesús kiluij: “¿Keyej tikijtoua ‘komo ueli’? Akin takuaujtamati nochi uelis kichiuas”.
24 Nimantsin itat in okichpil chikauak kijtoj: “¡Nitakuaujtamati! Sayoj ke ¡xinechpaleui maj okachi nitakuaujtamati!”.
25 Keman Jesús kiitak ke miakej ualtsikuintoyaj kinajsikij, kitakaualtij amokuali ejekat, uan kiluij: “Amokuali ejekat tein tikchiua maj okichpil amo ueli tajto nion maj takaki, ¡nimitsnauatia xikisa uan amo oksepa itech xikalaki!”.
26 Satepan ke tsajtsik uan chikauak kitsetseloj in okichpil, amokuali ejekat kisak. Uan okichpil mokauak kemej miket. Tein melauj, miakej kijtouayaj: “¡Mikikya!”.
27 Sayoj ke Jesús kimakitskij uan kiajokuik, uan okichpil moketsak.
28 Satepan ke kalakik itech se kali iniuan imomachtijkauan, yejuan kitajtanijkej keman amo akin kinkaktoya: “¿Keyej tejuan amo uelik tikalankixtilijkej?”.
29 Yejua kinnankilij: “Se amokuali ejekat kemej nejin sayoj ueli se kikalankixtia ika netataujtil”.
30 Uan kiskej de ompa uan yajkej Galilea, sayoj ke yejua amo kinekia maj akaj kimati
31 porin kinmachtijtoya imomachtijkauan. Kiniluiaya: “Nejua akin niyolik kemej takat nechtemaktiskej ininmako akin nechtauelitaj uan nechmiktiskej. Sayoj ke, maski nechmiktiskej, eyi tonal satepan oksepa ninemis”.*
32 Yejuan amo kiajsikamatkej tein kijtoj, uan mouiaj kitajtaniskej.
33 Uan ajsitoj Capernaúm. Keman yejua yetoyaya kalijtik, kintajtanij: “¿Toni ika namotajtolteuiayaj itech ojti?”.
34 Amo teyi kijtojkej, porin itech ojti motajtolteuijtoyaj porin kijtouayaj akoni katka okachi ueyichiujkej.
35 Yejua ika, yejua motalij, kinnotsak 12 tatitanilmej uan kiniluij: “Akin kineki tayekanas, moneki kintojtokatias nochin uan kintekitilis nochin”.
36 Uan kinotsak se konetsin, kiketsak tatajko, kikechnauaj uan kiniluij:
37 “Akin kiselia semej nejin konetsitsin notokaykopa no nechselia nejua, uan akin nechselia, amo sayoj nejua nechselia, ta no akin nechualtitanik”.
38 Juan kiluij: “Tamachtijkej, tikitakej se akin kinkalankixtijtoya amokuali ejekamej motokaykopa; sayoj ke kemej amo pouia touan, tiktakaualtijkej uan tikiluijkej maj amo kichiua nejon”.
39 Sayoj ke Jesús kijtoj: “Amo xiktsakuilikan, porin amo akin ueli kichiua se milagro notokaykopa uan nimantsin maj amo kuali noka tajto.
40 Porin akin amo techixnamiki, techpaleuia.
41 Uan yekmelauj tein namechiluia, akin namechmakas se vaso at porin naniaxkauan Cristo, namechyekiluia ke kiselis itaxtauil.
42 Sayoj ke akin kiuetsiltis* semej nejin akin moitaj ke amo ueyichiuanimej uan notech takuaujtamatij, okachi kuali yeskia maj kikechtalilikan se ueyi tet tein burros kimalakachouaj para takuechoskej, uan maj kipantamotakan itech ueyiat.
43 ”Takan momay kichiua xitajtako,* ximokotonili. Okachi kuali xiyolto timakotoltik, uan amo ika ome momauan xitamiti itech Gehena,* itech tit* tein amo ueli seui.
44 *
45 Uan takan momets kichiua xitajtako, ximokotonili. Okachi kuali xiyolto timetskotoltik uan amo ika ome mometsuan maj mitstamotakan itech Gehena.
46 *
47 Uan komo moixtololo kichiua xitajtako, uejka xiktamota. Okachi kuali xikalaki itech iTaixyekanalis Dios maski sayoj ika se moixtololo uan amo ika ome moixtololouan maj mitstamotakan itech Gehena,
48 kampa ijkochin amo miki uan tit amo seui.
49 ”Porin nochin kinpantepeuiliskej tit* ijkon kemej ijkuak se kiistauia se tapalol.
50 Istat semi kuali. Sayoj ke, komo amo poyekok, ¿toni ika kichiuaskej maj oksepa poyeya? Ximochiuakan kemej istat. Komo ijkon nankichiuaj, uelis kuali namouikaskej iniuan oksekin”.
Tajtolmelaualismej
^ Oso “ke iTaixyekanalis Dios ualajtokya”.
^ Itech griego, “Rabí”.
^ Itech griego, “moajokui”.
^ Oso xa “kiichtakamattoyaj”.
^ Itech griego, “moajokuiskia”.
^ Oso “kitajtoltiaj”.
^ Oso “Akin nanemij axkan”.
^ Oso “moxolkeptinemia”.
^ Oso “tekol”.
^ Itech griego, “nimoajokuis”.
^ Oso “kitepotamis”, “kichiuas maj amo takuaujtamatiok”.
^ Oso “kichiua xiuetsi”, “mitstepotamia”.
^ Oso “tekol”.
^ Nejin versículo moajsi itech seki Biblias, sayoj ke itech miak uejkauj amatajkuilolmej itech tajtol griego amo yetok.
^ Nejin versículo moajsi itech seki Biblias, sayoj ke itech miak uejkauj amatajkuilolmej itech tajtol griego amo yetok.
^ Oso “tekol”.
