Mateo 19:1-30
19 Keman Jesús kitamiijtoj nejin, kisak de Galilea uan ajsik itech tal tein monamiki iuan Judea, oksekopa den ueyiat Jordán.
2 Tel miakej kitojtokakej uan ompa kinpajtij akin mokokouayaj.
3 Uan kiajsitoj seki fariseos akin kitemouayaj maj mopolo uan kitajtanijkej:* “¿Kuali yetok maj se takat kikaua isiuatsin ika tein yeski taman?”.
4 Yejua kinnankilij: “¿Amo nankiitakej ke ijkuiliujtok ke keman peuak nochi, Dios kinchijchiuak takat uan siuat,
5 uan kijtoj: ‘Yejua ika, takat kikauas itat uan inan, nemis* iuan isiuatsin uan nejon omen mochiuaskej sayoj se’?
6 Nejin kinextia ke amo omenok, ta sayoj se. Yejua ika, maj amo akin kixelo tein Dios kisentilij”.*
7 Yejuan kiluijkej: “Komo ijkon, ¿keyej Moisés tanauatij maj takat kimaka isiuatsin se amat kampa kinextia ke kikauakya uan maj kilui maj youi?”.
8 Yejua kinnankilij: “Moisés namechkauak xikauakan namosiuatsin porin nanyoltakuaujkej. Sayoj ke keman Dios kichijchiuak yekinika takat uan siuat amo ijkon katka.
9 Nejua namechiluia ke akin monamiktijya uan kikaua isiuatsin, maski siuatsin amo auilnemik,* uan monamiktia iuan okse, nejon takat auilnemi”.
10 Imomachtijkauan kiluijkej: “Komo se takat moneki nochipa yetos iuan isiuatsin, okachi kuali maj amo se monamikti”.
11 Yejua kiniluij: “Amo nochin uelis kichiuaskej tein nikijtojtok, sayoj akin Dios kinmakatok nejon tatiochiualis.
12 Sekin amo ueli monamiktiaj* porin ijkon yolkej. Oksekin, kinchiujkej maj amo ueli monamiktikan, sayoj ke oksekin amo monamiktiaj porin kinekij okachi kitayekanaltiskej iTaixyekanalis Dios tein moajsi iluikak. Akin uelis ijkon nemis, kuali yetok”.
13 Uan kiualkuilijkej seki konemej para maj kitali imauan inintech, maj kintiochiua uan maj ininka motataujti. Sayoj ke imomachtijkauan kintakaualtijkej.
14 Sayoj ke Jesús kiniluij: “Xikinkauakan konemej maj nouan motokikan. Amo xikintsakuilikan, porin iTaixyekanalis Dios tein moajsi iluikak yeski ininaxka akin tamatij kemej yejuan”.
15 Uan yejua kintiochiuak* uan yajki.
16 Uan se telpoch kiajsito uan kitajtanij: “Tamachtijkej, ¿toni tein kuali moneki nikchiuas uan ijkon uelis ninemis nochipaya?”.
17 Yejua kiluij: “¿Keyej nejua tinechtajtania toni tein kuali? Sayoj se akin yolkuali. Maski ijkon, komo tikneki tinemis nochipaya, moneki nochipa tiktakamatis itanauatiluan Dios”.
18 Yejua kitajtanij: “¿Katin tanauatilmej?”. Uan Jesús kinankilij: “Amo xitemikti, amo xiauilnemi, amo xitachteki, amo xitetakajkayauili,
19 xiktakachiua* mopaj uan momaj uan xiktasojta moknitsin kemej tejua timotasojta”.
20 In telpoch kiluij: “Nejua nochipa niktakamatini nochi nejon. ¿Toni monekiok nikchiuas?”.
21 Jesús kinankilij: “Komo amo tikneki tikpias tein amo kuali,* xiknamakati tein tikpia uan nejon tomin xikinmaka pobres; ijkon tikpias tein kipia ipatiuj ne iluikak. Uan xiuiki uan xinechtojtoka”.
22 Keman telpoch kikakik nejon, semi tayokoxtiajki, porin kipiaya miak taman.
23 Uan Jesús kiniluij imomachtijkauan: “Namechyekiluia ke ouij yeski maj se tominpixkej kalaki itech iTaixyekanalis Dios tein moajsi iluikak.
24 Oksepa namechiluia ke okachi amo ouij maj se camello nalpano kampa koyoktik se aguja ke maj se tominpixkej kalaki itech iTaixyekanalis Dios”.
25 Imomachtijkauan semi kimojkakakkej nejon uan kijtojkej: “Komo ijkon, ¿akoni uelis makisas?”.
26 Jesús kinsenixitak uan kiniluij: “Nikan taltikpak kiitaj ke nejon amo uelis mochiuas, sayoj ke Dios nochi ueli kichiua”.
27 Uan Pedro kinankilij: “Xikita, tejuan tikaujkej nochi tein tikpiayaj uan timitstojtokakej. ¿Toni techmakaskej?”.
28 Jesús kiniluij: “Namechyekiluia ke ijkuak ajsis tonal keman nochi moyankuilis, uan nejua akin niyolik kemej takat nimotalis itech noueyi silla, namejuan akin nanechtojtokanij, namotaliskej itech 12 uejueyi sillas uan nankiixtaliskej tein kinnamiki kiseliskej 12 uejueyi kalyetonij israelitas.
29 Uan akin kikauak ichan, iikniuan takamej, iikniuan siuamej, itat, inan, ikoneuan oso italuan porin takuaujtamati itech notokay, kiselis se ciento okachi uan nemis nochipaya.
30 ”Sayoj ke miakej akin yetokej taixpan yetoskej taikampa, uan miakej akin yetokej taikampa yetoskej taixpan.
Tajtolmelaualismej
^ Oso “kitajtoltijkej”.
^ Oso “mosentilis”. Tajtol griego kijtosneki pepechiujtos.
^ Oso “kintalij itech sayoj se yugo”.
^ Tajtol griego, pornéia. Xikonita auilnemilis.
^ Nikan ika motajtoua takat akin amo ueli kinpia konemej.
^ Itech griego, “inintech kitalij imauan”.
^ Oso “xikpoujkaita”.
^ Oso “Komo tikneki maj amo teyi mitspolo”.
