Mateo 3:1-17
3 Itech nejon tonalmej, Juan akin teauia peuak tanojnotsa taluakyan ompa Judea.
2 Kijtouaya: “Ximoyolpatakan, porin iTaixyekanalis Dios tein moajsi iluikak ejkotokya”.
3 Tein melauj, tanauatijkej* Isaías ika tajtojtoya Juan keman kijtoj: “Itech taluakyan se takat chikauak kijtojtok: ‘¡Xikyekchijchiuakan iojtsin Jehová* uan xikchipauakan!’”.
4 Juan takentoya ika tasal tachijchiuj ika camellojtojmit* uan tajkoilpitoya* ika se kuetax. Motamakaya ika chapolimej uan koujtajnekti.
5 Uan yayaj kiitatij akin nemiaj Jerusalén, nochin akin nemiaj Judea uan nochi xolalmej tein yetokej kampa panoua ueyiat Jordán.
6 Yejua kinauiaya* itech ueyiat Jordán uan yejuan kijtouayaj sentaixpan inintajtakoluan.
7 Uan ejkotiualayaj miakej fariseos uan saduceos kampa Juan teauijtoya. Keman kinitak, kiniluij: “Namejuan, ininkoneuan kouamej, ¿akoni namechnejmachtij ke uelis namakisaskej keman Dios kinextis iueyi kualanyo?
8 Achto xikchiuakan tein kinextis ke namoyolpatakejya.
9 Amo ximoluikan ‘Tiikoneuan Abrahán’. Porin namechiluia ke Dios uelis kichiuas maj itech nejin temej kisakan ikoneuan Abrahán.
10 Se hacha yetokya inintsintan koujmej. Yejua ika nochin koujmej tein amo kitemakaj kuajkuali takilot kintamotaskej uan kintatiskej.*
11 Nejua namechauia ika at porin namoyolpatakejya. Sayoj ke akin ualas satepan, kipia okachi tanauatil ke nejua, uan amo nechnamiki nikixtilis itekakuan. Yejua namechauis ika ichikaualis Dios uan ika tit.*
12 Maaktok tein ika kiajkotamota tatok uan kitamichipauas trigo. Kiololos itrigo uan kitalis kampa kisentilia tatok, sayoj ke itajsolyo kitatis* ika se tit* tein amo ueli seui”.
13 Jesús yetoya Galilea uan yajki ueyiat Jordán para maj Juan kiaui.
14 Sayoj ke Juan kitsakuilisnekia. Yejua ika kiluij: “Tejua monekiskia tinechauis, ¿uan tikneki maj nejua nimitsaui?”.
15 Jesús kinankilij: “Xikaua maj ijkon mochiua axkan, porin kuali yetok maj tikchiuakan nochi tein Dios kineki”. Uan Juan amo kitsakuilijok.
16 Niman keman Jesús kiauijkej, kisak den at, uan motapoj iluikak uan yejua* kiitak ichikaualis Dios ualpantemotiualaya kemej se paloma kampa yetoya Jesús.*
17 Uan Dios kiualijtoj ne iluikak: “Yejua nejin noKonetsin akin niktasojta; yejua semi nechyolpaktia”.
Tajtolmelaualismej
^ Xikonita tanauatijkej.
^ Oso “camellojijuit”.
^ Oso “tajkotsikaujtoya”.
^ Oso “kinpankalakiaya”.
^ Oso “kinchichinoskej”.
^ Oso “tekol”.
^ Oso “kichichinos”.
^ Oso “tekol”.
^ Xa Juan.
^ Itech griego, “yejua”.
