Mateo 5:1-48
-
TAMACHTIA ITECH SE TEPET (1-48)
-
Jesús peua tamachtia (1, 2)
-
Akin yolpakij (3-12)
-
Istat uan tanex (13-16)
-
Kichiuako tein kijtoua iTanauatil Moisés (17-20)
-
Keniuj se kiyektalis kuejmolmej (21-26), maj amo se auilnemi (27-30), akin kikaua inamik (31, 32), maj se kichiua tein se kijtoua (33-37), amo se momakepa (38-42), se kintasojta akin tetauelitaj (43-48)
-
5 Keman Jesús kiitak ke miakej mosentilijkej, pankisak tepitsin itech se tepet uan ompa motalij. Uan imomachtijkauan motokijkej.
2 Uan yejua peuak kinmachtia:
3 “Yolpakij akin kiajsikamatij ke moneki maj Dios kinixyekana, porin iTaixyekanalis tein moajsi iluikak yeski ininaxka.
4 ”Yolpakij akin tayokoyaj, porin kinyolseuiskej.
5 ”Yolpakij akin yolnejmachmej, porin Dios kinmakas taltikpak.
6 ”Yolpakij akin semi kinejnekij* maj mochiua tein kuali yetok, porin nejon tein kinejnekij mochiuas.
7 ”Yolpakij akin teikneliaj, porin no kinikneliskej.
8 ”Yolpakij akin yolchipaujkej, porin kiitaskej Dios.
9 ”Yolpakij akin tapaleuiaj maj oksekin yolseujkanemikan, porin yejuan yeskij ikoneuan Dios.
10 ”Yolpakij akin kintajyouiltianij porin kichiuaj tein kuali yetok, porin iTaixyekanalis Dios tein moajsi iluikak yeski ininaxka.
11 ”Xiyolpakikan keman namechuijuikaltiskej,* namechtajyouiltiskej, namechtakajkayauiliskej uan namechijtouiliskej miak taman porin notech nantakuaujtamatij.
12 Xiyolpakikan uan ximouelitakan porin Dios namechmakas se ueyi tatiochiualis ne iluikak, porin itanauatijkauan* akin nenkej achto ke namejuan no ijkon kintajyouiltijkej.
13 ”Namejuan kemej yeskia istat nikan taltikpak. Sayoj ke, komo istat amo tapoyeliaok, ¿uelis oksepa poyeyas? Amo kualtiaok, yejua ika se kikalantamota uan maj ipan tajtaksakan.*
14 ”Namejuan kemej yeskia tanex tein kintauilia oksekin para tachiaskej. Amo ueli se kitatia* se ueyi xolal tein moajsi ikuapan se tepet.
15 Amo akin kixotaltia se candil uan kipantsakua ika se chikiuit,* ta kitalia kampa kinketsaj candilmej para maj kintauili nochin akin yetokej kalijtik.
16 No ijkon, maj petani namotanex ininixpan nochin. Maj kiitakan tein kuali tein nankichiuaj uan ijkon maj kiueyitalikan namoTajtsin akin yetok ne iluikak.
17 ”Amo xiknemilikan ke nikixpoloko iTanauatil Moisés oso tein kijkuilojkej Tanauatianij. Amo nikixpoloko, ta nikchiuako maj mochiua tein ijkuiliujtok.
18 Namechyekiluia ke maski ixpoliuiskia iluikak uan taltikpak, amo ixpoliuis letra tein okachi tsikitsin* nion se rayita tein kipia se letra itech iTanauatil Moisés hasta maj nochi mochiua.
19 Yejua ika, akin amo kitakamati semej tanauatilmej tein amo semi tayekantok, uan kinnextilia oksekin maj no ijkon kichiuakan, amo uelis kalakis* itech iTaixyekanalis Dios tein moajsi iluikak. Sayoj ke, akin kitakamati tanauatilmej uan kinnextilia oksekin, kemaj kalakis* itech iTaixyekanalis Dios tein moajsi iluikak.
20 Namechiluia ke komo namejuan amo okachi nanyolmelaujkej* ke tajkuilouanij uan fariseos, amo keman nankalakiskej itech iTaixyekanalis Dios tein moajsi iluikak.
21 ”Nankimatijya ke namouejkaujtatuan kiniluijkej: ‘Amo xitemikti, uan akin temiktis kiuikaskej ininixpan tamelauanij’.
22 Sayoj ke, nejua namechiluia ke akin semi iuan kualantos iikniuj kiuikaskej ininixpan tamelauanij. Uan akin kiuijuikaltis* iikniuj, kiuikaskej ininixpan Uejueyi Tamelauanij.* Sayoj ke, akin kiluis iikniuj ‘¡Senkis timijmikilot* uan amo teyi tikualtia!’ uelis tamitiuj itech Gehena* kampa motatikuitok.*
23 ”Yejua ika, komo tikuikatok tein tikmaktiliti Dios itech altar uan ompa tikelnamiki ke mokniuj mouan kualantok,
24 xikaua tein tiktemaktiti iixpan altar, uan xiouj. Achto xikchiua tein tapaleuis oksepa kuali iuan ximouika mokniuj, uan satepan ximokepa uan xiktemakti tein tikuikak.
25 ”Komo aksa* mitsteluilia iniuan tamelauanij, xiktemo nimantsin tikyektalis kuejmol keman nanyajtoskej ininixpan tamelauanij. Komo amo, akin mitsteluilia uelis mitstemaktis iuan juez, uan juez mitstemaktis iuan akin tajpia uan mitstsakuaskej.
26 Nimitsyekiluia ke amo uelis tikisas hasta ke tiktamiixtauas nochin tomin.*
27 ”Nankimatij ke moijtoj: ‘Amo xiauilnemi’.
28 Sayoj ke, nejua namechiluia ke akin kisentoka kiita se siuat uan kineki iuan motekas, iyolijtik auilnemikya iuan.
29 Yejua ika, komo moixtololo tein tikpia moyekmakopa kichiujtok xitajtako,* ximokixtili uan uejka xiktamota. Okachi kuali xikpolo se moixtololo uan amo maj nochi monakayo kitamotakan itech Gehena.
30 No ijkon, komo moyekmay kichiujtok xitajtako, ximokotonili uan uejka xiktamota. Okachi kuali xikpolo se momay uan amo maj nochi monakayo tamiti itech Gehena.
31 ”No moijtoj: ‘Akin monamiktijya uan kikaua isiuatsin, maj kimaka se amat kampa kinextia ke kikauakya’.
32 Sayoj ke nejua namechiluia ke akin monamiktijya uan kikaua isiuatsin, maski siuatsin amo auilnemik,* uelis kichiuas maj siuatsin auilnemi, uan takat akin monamiktis iuan nejon siuatsin, no auilnemi.
33 ”No nankimatij ke kiniluijkej namouejkaujtatuan: ‘Amo ximoyektenkaua teisa komo amo tikchiuas; ta xikchiua tein timotenkauak iuan Jehová’.*
34 Sayoj ke nejua namechiluia: amo keman xikijtojtiuetsikan ‘kitstikaj’. Amo xikijtokan ‘kitstikaj iluikak’, porin ompa tokotsyetok Dios;
35 nion ‘kitstikaj taltikpak’, porin yejua imetstapech Dios; nion ‘kitstikaj Jerusalén’, porin yejua iueyi xolal ueyi Tekiuaj.
36 Amo no xikijto ‘kitstikaj notsontekon’, porin amo ueli tikchiua maj pochinia oso tiltia nion se tsonti,
37 ta keman nankijtoskej ‘kemaj’, maj kemaj, uan keman nankijtoskej ‘amo’, maj amo. Porin akin amo kichiua tein kijtoua, kichiujtok tein kineki in Amokuali.
38 ”Namejuan nankimatij ke moijtoj: ‘Komo aksa teixpitsinia maj no kiixpitsinikan uan komo aksa tetanpixoua maj no kitanpixokan’.*
39 Sayoj ke nejua namechiluia: amo xikixnamikikan akin amo yolkuali, ta akin mitsixtatsinis moyekmakopa, xikaua maj no mitsixtatsini oksekopa.
40 Uan komo aksa kineki mitsuikas iniuan tamelauanij porin kineki moaxkatilis se motasal, no xikmaka mopantaken.
41 Uan komo aksa mitschikaujkauia xiktekitili se hora, xiktekitili ome hora.
42 Akin mitstajtania teisa, xikmaka. Uan akin mitstaneuilia teisa, xiktaneujti.*
43 ”Namejuan nankimatij ke moijtoj: ‘Xiktasojta moknitsin uan xiktauelita akin mitstauelita’.
44 Sayoj ke nejua namechiluia: xiksentokakan xikintasojtakan akin namechtauelitaj uan ximotataujtijtokan ininka akin namechtajyouiltiaj.
45 Ijkon nankinextiskej ke nanikoneuan namoTajtsin akin yetok ne iluikak, porin yejua kichiua maj kisa tonaltsin para akin amo yolkualmej uan akin yolkualmej, uan kichiua maj kioui para akin yolmelaujkej uan akin amo yolmelaujkej.
46 Porin komo nankintasojtaj akin namechtasojtaj, ¿toni tatiochiualis nankichiaj? ¿Amo no ijkon kichiuaj akin kisentiliaj impuesto?
47 Uan komo sayoj nankintajpalouaj namokniuan, ¿nankichiujtokej tein oksekin amo kichiuaj? ¿Amo no yejua nejon tein kichiuaj akin amo judíos?
48 Yejua ika, nochipa xikchiuakan tein kichiua* namoTajtsin akin yetok ne iluikak, akin amo teyi kipoloua.
Tajtolmelaualismej
^ Oso “mayanaj uan amikij porin kinekij”.
^ Oso “namechtejtelchiuaskej”.
^ Xikonita tanauatijkej.
^ Oso “maj ipan papanokan”, “kitejteliksakan”, “kitsoniksakan”.
^ Oso “Niman moita”.
^ Oso “chikiuit tein ika tatamachiuaj”.
^ Oso “pisiltik”.
^ Oso “kiitaskej ke amo teyi chiujkej”.
^ Oso “kiitaskej ke ueyichiujkej”.
^ Oso “nantatakamatij”.
^ Oso “taxotatok”.
^ Oso “Semi amo tikuatamati”.
^ Oso “kitejtelchiuas”.
^ Oso “akin”, “akaj”.
^ Itech griego, “cuadrante”. Tomin tein aksa kitania kemej itech 10 minutos.
^ Oso “xiuetsi”, “ximotepotami”.
^ Tajtol griego, pornéia. Xikonita auilnemilis.
^ Oso “tetantepeua maj no kitantepeuakan”.
^ Kijtosneki se tetaneujtis uan amo teyi se kitanilis.
^ Oso “maj amo teyi namechpolo ijkon kemej”.
