Romanos 12:1-21
12 Yejua ika nokniuan, kemej Dios semi namechiknelia, namechtataujtia xikmaktilikan namonakayo uan namonemilis kemej se taman tein chipauak uan tein kiyolpaktis. Ijkon, nankitekitiliskej Dios ika nochi namotanemilil.
2 Uan amo xiksentokakan xikchiujtokan kemej kichiuaj akin axkan nemij;* ta xikauakan maj Dios kipata kemej nantanemiliaj. Ijkon uelis kuali nankimatiskej toni kineki xikchiuakan: tein kuali, tein kiyolpaktia uan tein amo teyi kipoloua.
3 Kemej Dios nechnextilij itatiochiualis tein amo technamiki, namechiluia nansejsemej ke amo xiknemilikan ke semi nantayekantokej, ta xiknextikan ke nanyektalnamikij, ijkon kemej Dios namechpaleuij nansejsemej iuan xitakuaujtamatikan.
4 Porin tonakayo kipia miak taman, sayoj ke amo nochi tein kipia kichiua sayoj se tekit.
5 No ijkon tejuan, maski timiakej, timochiuaj sayoj se uan tisenyetokej iuan Cristo, sayoj ke sejse tisenpouij se iuan okse.
6 Kemej Dios technextilij itatiochiualis tein amo technamiki, techpaleuij maj tiuelikan tikchiuakan tataman tekit. Komo Dios kichiua maj tiuelikan tiktematiltikan tein yejua kijtoua, maj tiktematiltikan ijkon kemej Dios techpaleuij maj titakuaujtamatikan;
7 komo Dios kichiua maj tiuelikan titapaleuikan, maj nochipa titapaleuijtokan; komo Dios kichiua maj tiuelikan titamachtikan, maj titamachtikan;
8 akin ueli teyolchikaua, maj teyolchikaua; akin ueli kitemaka, maj kitemaka ika nochi iyolo;* akin taixyekana, maj yektaixyekana; akin teiknelia, maj teikneli ika nochi iyolo.
9 Yekmelauj xitetasojtakan uan amo xitaixkajkayauakan. Xiktauelitakan tein amo kuali; ximochikauakan nankichiuaskej tein kuali.
10 Yekmelauj ximotasojtakan kemej yeskia naniknimej. Namejuan achto xiknextikan ke nantetakachiuaj.*
11 Xitekitinij, amo xitatsiuinij. Xikauakan maj Dios ika ichikaualis namechixyekana para nankichiuaskej tein kuali. Xiktekitilikan Jehová* ika nochi namoyolo.
12 Xiyolpakikan porin nankichiaj tein kuali. Xitaxikokan keman nankipiaskej ouijkayomej. Nochipa xikchiujtokan netataujtil.
13 Xikinpaleuikan tokniuan* ijkon kemej kinpolos. Nochipa kuali xikinselikan oksekin.
14 Nochipa xikinnejnekilikan tein kuali akin namechtajyouiltiaj, uan amo xikinnejnekilikan tein amo kuali.
15 Xiyolpakikan iniuan akin yolpakij; xichokakan iniuan akin chokaj.
16 Xikinitakan oksekin kemej namejuan namoitaj; amo ximoueyimatikan,* ta xiyolyemankej. Amo xiknemilikan ke okachi nantamatinij ke nochin oksekin.
17 Keman namechchiuiliskej tein amo kuali, amo ximomakepakan. Xikelnamiktokan tein nochin kinemiliaj ke kuali yetok.
18 Komo ueli uan namomako yetok, xiyolseujkanemikan iniuan nochin.
19 Nokniuantsitsin, amo ximomakepakan, ta xikauakan maj Dios kinexti iueyi kualanyo. Porin ijkuiliujtok: “Jehová* kijtoua: ‘Nejua nimomakepas; nejua nikinmakas tein kinnamiki’”.
20 Okachi kuali, “komo mayana akin mitstauelita, xiktamaka; komo amiki, xikmaka tein tayis; porin komo tikchiua nejin, uelis kimojkaitas uan moyolyemanis”.*
21 Amo xikaua maj mitstani tein amo kuali, ta xiksentoka xikchiua tein kuali para tiktanis tein amo kuali.
Tajtolmelaualismej
^ Xikonita tonalmej; tein mochiujtok.
^ Oso “maj amo tsotsokat”.
^ Oso “nantepoujkaitaj”.
^ Oso “akin Dios moinxelouilij”.
^ Oso “amo xiktayekanaltikan tein ika namoueyinekiskej”.
^ Itech griego, “tiksentilis tekol itech itsontekon”.
