Romanos 15:1-33
15 Sayoj ke tejuan akin tiyektakuaujtamatij moneki inintech titanemiliskej akin amo yektakuaujtamatij, uan maj amo sayoj tejuan timoyolpaktijtokan.
2 Maj tisejsemej tiktemokan tikyolpaktiskej tokniuj uan maj tikchiuilikan tein kuali, para maj moyolchikaua.
3 Porin nion Cristo sayoj yejua moyolpaktij, ta mochiuak kemej ijkuiliujtok: “Tein ika mitsuijuikaltijkej,* no ika nechuijuikaltijkej”.
4 Porin nochi tein ne uejkauj moijkuiloj, moijkuiloj para techmachtis. Uan tikchiaj tein kuali porin itajtol Dios techyolseuia uan techpaleuia maj titaxikokan.
5 Maj Dios namechpaleui xitaxikokan, maj namechyolseui uan maj no namechpaleui nanochin xitanemilikan kemej Cristo,
6 uan ijkon, nankisenueyitaliskej Dios, iTajtsin toTekotsin Jesucristo.
7 Yejua ika kuali ximoselikan se iuan okse, ijkon kemej Cristo no kuali namechselij namejuan, uan nejon kichiua maj moueyitali Dios.
8 Porin namechiluia ke Cristo mochiuak inintekitikauj judíos* para kinextis ke Dios kichiua tein kijtoua uan para kiyeknextis ke melauak tein Dios motenkauak iniuan ininuejkaujtatuan,
9 uan para maj akin kayomej itech okseki altepemej kiueyitalikan Dios porin teiknelia. Ijkon kemej ijkuiliujtok: “Yejua ika nimitsueyitalis senteixtenoj itech altepemej uan nikueyitalis motokay ika tatsotson”.
10 Uan yejua no kijtoua: “Xiyolpakikan namejuan akin nanemij itech okseki altepemej iuan ixolal”.
11 Uan okse tajkuilol kijtoua: “Xikueyitalikan Jehová,* namejuan akin amo nanjudíos. Maj itech nochi xolalmej kiueyitalikan”.
12 Isaías no kijtoua: “Nesis se ichankauj Jesé, akin ualas para kinixyekanas akin nemij itech altepemej; itech nochi xolalmej itech takuaujtamatiskej”.
13 Dios techpaleuia maj tikchiakan tein kuali. Maj yejua kichiua semi xiyolpakikan uan xiyolseuikan porin iuan nantakuaujtamatij, uan ijkon ika ichikaualis uelis nankichiaskej tein kuali ika nochi namoyolo.
14 Nokniuantsitsin, nikyekmati ke namejuan semi nankualtakamej uan kuali nankiixmatij tein melauak, uan ke nanuelij namoyolmajxitiaj se iuan okse.
15 Sayoj ke, namechtajkuilouilia uan namechyekiluia seki taman tein nikneki oksepa xikelnamikikan, porin Dios nechnextilij itatiochiualis tein amo technamiki.
16 Nejua niitekitikauj Cristo Jesús uan nikinixmatiltia kuali tanauatilmej* akin amo judíos. Nikchiujtok nejin tekit tein iaxka Dios para maj yejua kinseli akin amo judíos. Yejuan kemej yeskia se taman tein kimaktiliaj Dios tein yejua kichipaua ika ichikaualis.
17 Yejua ika, niyolpaki porin niimomachtijkauj Cristo Jesús uan porin nikchiua tekit tein iaxka Dios.
18 Amo ika nitajtosok tein nejua nikchiua, ta sayoj ika tein Cristo kichiuak uan kijtoj notechkopa, para nikinpaleuis maj tatakamatikan akin amo judíos.
19 Yejuan no tatakamatkej porin kiitakej milagros uan uejueyi taman tein se kimojkaita tein mochiuak ika ichikaualis Dios. Ijkon, noyampa* nikteixmatiltiani kuali tanauatilmej tein ika tajtoua Cristo desde Jerusalén hasta Ilírico.
20 Yejua ika, nikixtalij amo nikteixmatiltis kuali tanauatilmej kampa moteixmatiltijkaya itokay Cristo, porin amo niknekia nikchiuas tekit tein okse kipeualtijkaya.
21 Ijkon kemej ijkuiliujtok: “Akin amo kinnojnotskej de yejua, kiitaskej, uan akin amo kikakinij, kiajsikamatiskej”.
22 Yejua ika miakpa amo no niuelik namechkalpanoto.
23 Sayoj ke nitamitanojnotsakya itech nejin talmej uan miak* xiujmejya niknektok namechitatiuj.
24 Yejua ika, keman nias España, nikchia namechitstikisas. Satepan ke nietos namouan seki tonalmej, nikchia xiuelikan xinechnalkauatij tepitsin.
25 Sayoj ke axkan niatiya Jerusalén nikinpaleuiti tokniuan* akin ompa yetokej.
26 Porin akin nemij Macedonia uan Acaya kitemakakej tein kipiaj ika nochi ininyolo para kinpaleuiskej tokniuan pobres akin nemij Jerusalén.
27 Maski kitemakakej ika nochi ininyolo; tein melauj, yejuan kiitayaj ke monekia kinpaleuiskej. Tokniuan* akin nemiaj Jerusalén kinmakakej akin amo judíos tein ualeua imako Dios, uan axkan akin amo judíos no moneki kinmakaskej tein kipiaj para kinpaleuiskej.
28 Yejua ika, satepan ke niktamichiuas nejin tekit uan niktamitemakas tein tokniuan kititankej,* nias España uan namechkalpanojtikisas.
29 Uan no, nikmati ke keman namechkalpanotiuj, namechuikilis iueyi tatiochiualis Cristo.
30 Nokniuan, kemej titakuaujtamatij iuan toTekotsin Jesucristo uan Dios ika ichikaualis kichiua maj timotasojtakan se iuan okse, namechtataujtia xiktajtanikan Dios maj nechpaleui, ijkon kemej nejua nikchiujtok,
31 para maj nimomakixti ininmako akin amo taneltokaj ompa Judea uan para maj tokniuan* ompa Jerusalén kuali kiselikan tein kintitaniliaj.
32 Uan ijkon, komo Dios kineki, ika miak pakilis namechkalpanotiuj uan timosenyolchikauaskej.
33 Maj Dios akin teyolseuia namouan yeto. Maj ijkon mochiua.*
Tajtolmelaualismej
^ Oso “mitstejtelchiujkej”.
^ Oso “akin kintekkejya”. Xikonita circuncisión.
^ Oso “tajtolmej”.
^ Oso “nouian”.
^ Oso xa “seki”.
^ Oso “akin Dios moinxelouilij”.
^ Oso “Akin Dios moinxelouilij”.
^ Itech griego, “takilot”.
^ Oso “akin chipaujkej iixpan Dios”.
^ Oso “Amén”.
