Romanos 7:1-25
7 Axkan namechnojnotstok namejuan nokniuan akin nankiixmatij iTanauatil Moisés, ¿amo nankimatij ke Tanauatil kiixyekana se takat sayoj keman yoltok?
2 Tanauatil kijtoua ke se siuat kisentoka namikyej iuan itakauj keman itakauj nemiok; sayoj ke, komo itakauj momikilia, amo monekiok kichiuas tein kiixtalij itakauj.
3 Yejua ika, komo yejua monamiktia iuan okse takat keman itakauj yoltokok, yejua auilnemi. Sayoj ke, komo itakauj momikilia, amo monekiok kichiuas tein kiixtalij itakauj. Yejua ika komo monamiktia iuan okse takat, amo auilnemi.
4 No ijkon nokniuan, namejuan kemej yeskia namonamiktijkaj iuan iTanauatil Moisés, sayoj ke inakayo Cristo namechmakixtij* para ximoajsikan imako okse, akin oksepa nemik,* para maj tikchiuakan tein Dios kiyolpaktia.
5 Porin keman tikchiuayaj tein kinejnekia tonakayo, Tanauatil kiyeknextiaya ke tein amo kuali tein tiknejnekiaj kichiuaya maj timotajtakolmakakan, uan nejon sayoj uelia kichiuaya maj timikikan.
6 Sayoj ke axkan amo timoyekanajok ika iTanauatil Moisés, porin amo timoajsijok imako. Yejua ika moneki tiyeskij titakeualmej amo porin Tanauatil techixyekana, ta porin techixyekana ichikaualis Dios.
7 Komo ijkon, ¿toni tikijtoskej? ¿Ke iTanauatil Moisés se tajtakol? Amo. Tein melauj, nejua amo nikmatiskia toni tajtakol komo amo motemakaskia iTanauatil Moisés. Amo nikmatiskia ke amo kuali maj semi nikixnejneki tein teaxka* komo Tanauatil amo kijtoskia “Amo xiktelixnejneki tein teaxka”.
8 Sayoj ke nejon tanauatil nechmatiltij toni yekmelauj tajtakol, nechmatiltij ke nejua semi nikixnejnekia tein teaxka uan ke tajtakol nejon. Porin keman amo onkaya Tanauatil, tajtakol amo teyi uelia kichiuaya.
9 Tein melauj, nejua niyoltoya keman amo niktakamatia iTanauatil Moisés. Sayoj ke keman nesiko Tanauatil, tajtakol moyolkuik uan nejua nimomikilij.
10 Uan nikmatik ke nejon tanauatil tein niknemiliaya ke kichiuaskia maj ninemi, tein melauj kichiujtoya maj nimiki.
11 Porin nejon tanauatil nechmatiltij toni tajtakol, uan tajtakol nechtanejnektij uan nechmiktij.
12 Maski ijkon, iTanauatil Moisés chipauak uan tein kijtoua chipauak, melauak uan kuali.
13 ¿Kijtosneki ke teisa tein kuali nechmiktij? ¡Amo! Yejua tajtakol tein nechmiktij. ITanauatil Dios semi kuali. Sayoj ke kiyeknextij ke tajtakol kichiujtoya maj nimiki. Yejua ika, tein kijtoua Tanauatil kinextij ke tajtakol tel amo kuali.
14 Porin tikmatij ke Tanauatil ualeua imako Dios ika ichikaualis, sayoj ke nikpia se kuejmol, nejua nitajtakolej,* nechnamakakej imako tajtakol.
15 Porin amo nikajsikamati tein nikchiujtok: amo nikchiua tein nikneki nikchiuas, ta nikchiua tein niktauelita.
16 Sayoj ke, komo nikchiua tein amo nikneki, nikita ke kuali yetok Tanauatil.
17 Yejua ika, amo nejua akin nikchiujtok nejon tein amo kuali, ta yejua tajtakol tein notech yetok.
18 Porin nikmati ke itech nonakayo tein tajtakolej amo onkak nion teyi tein kuali, porin maski nikneki nikchiuas tein kuali, amo niueli.
19 Porin amo nikchiua tein kuali tein nikneki, ta nikchiua tein amo kuali tein amo nikneki nikchiuas.
20 Komo ijkon, komo nikchiua tein amo nikneki, tajtakol tein notech yetok kichiujtok, amo nejua.
21 Yejua ika, nikita ke nechixyekana nejin tanauatil: keman nikneki nikchiuas tein kuali, tein amo kuali notech yetok.
22 Noyolijtik yekmelauj nikuelita itanauatil Dios,
23 sayoj ke itech nonakayo nikita ke yetok okse tanauatil tein moteuia iuan tanauatil tein kiixyekana notanemililuan. Nejin tanauatil yejua tajtakol tein yetok itech nonakayo uan tein kemej yeskia nechkitskia kemej se akin kitsakuatij.
24 ¡Semi niteikneltij! ¿Akoni nechmakixtis imako nonakayo tein kichiujtok maj nimiki?
25 ¡Niktasojkamatilia Dios porin nechmakixtij itechkopa toTekotsin Jesucristo! Ijkon, ika notanemilil nietok imako itanauatil Dios, sayoj ke ika nonakayo nietok imako itanauatil tajtakol.
Tajtolmelaualismej
^ Itech griego, “kichiuak ximikikan iixpan Tanauatil”.
^ Itech griego, “moajokuik”.
^ Oso “maj nixijxikuin”.
^ Itech griego, “ninakat”.
