Rut 2:1-23
2 Noemí kipiaya se ipariente akin monotsaya Boaz uan kipiaya miak tomin uan miak taman. Nejin takat katka ichankauj Elimélec.
2 Rut akin katka de Moab kiluij Noemí: “¿Uelis nias kampa tatokaj? Nikneki nikitas ox nechkauaj maj nikololojtiuj cebada tein mokaujtiuj”. Noemí kinankilij: “Xiouj nokonetsin”.
3 Yejua ika Rut yajki uan peuak kiololoua tein kikaujtiayaj takeualmej. Uan maski amo kimatia, ajsito italpan Boaz.
4 Ijkuak, Boaz ejkotiualaya de Belén uan kiniluij itakeualuan: “Maj Jehová namouan yeto”. Uan yejuan kinankilijkej: “Maj Jehová mitstatiochiui”.
5 Uan Boaz kitajtanij* akin kinixyekanaya itakeualuan: “¿Akoni ne siuapil?”.
6 Yejua kinankilij: “Ne siuapil kayot Moab uan ualaj iuan Noemí.
7 Yejua nechiluij: ‘¿Uelis nikololojtias cebada tein kikaujtiouij tekitinij?’. Desde kualkan peuak tekiti uan hasta yekintsin tepitsin moseuiko itech sakakaltsin”.
8 Satepan Boaz kiluij Rut: “Nokonetsin, amo xiouj okseko xitaololoti, ta nikan ximokaua. Xitaololojtiuj kampa siuamej tekititokej.
9 Xikita kani tekititokej uan iniuan xiouj. Nikinnauatij takamej maj amo mitskuejmolokan. Keman tiamikis, xiouj kampa yetokej tsotsokolmej uan xitayi at tein kikixtiaj takamej”.
10 Keman kikakik nejon, Rut niman motankuaketsak uan moixpiloj hasta talpan uan kitajtanij: “¿Keyej tikualtakat nouan? ¿Keyej tikneki tinechpaleuis, ta nejua amo niisraelita?”.
11 Boaz kinankilij: “Nechtapouianij nochi tein tikchiuani para tikpaleuis momonan desde ke momikilij motakatsin. No nechtapouianij ke tikinkauak motatuan uan tikisak de kampa tiyolik para tinemis iniuan akin amo tikinixmatia.
12 Maj Jehová mitstatiochiui porin tikchiuani tein kuali. Maj toDios* Jehová mitsmaka nochi tein timotanilij porin tiktemoj maj mitspaleui”.*
13 Uan Rut kinankilij: “Tejuatsin, tasojkamatik porin tinechpaleuia maski amo nimotakeual. Tein tinechiluia nechyolchikaua uan nechyolseuia”.
14 Keman yaya takuatijya, Boaz kiluij: “Ximoualtoki. Ximokuili tepitsin pantsin uan xikajaki itech vino tein kixokoltijkej”. Uan Rut motalij iniuan tekitinij. Boaz kimakak cebada tateuats, uan yejua takuaj, ixuik uan hasta mokauakok tepitsin.
15 Keman Rut moketsak para oksepa taololotiuj, Boaz kinnauatij itakeualuan: “Xikauakan maj no kikui cebada tein nankitekkejya, uan amo xikuejmolokan.
16 Uan no, xiktamottiakan cebada tein nankimasentilijkejya para maj kiololo uan amo xiktakaualtikan”.
17 Uan Rut kisentokak tekitik hasta tiotak. Keman kichipauak nochi tein kiololojka, kiajxitij kemej 13 kilos* de cebada.
18 Rut mokepak ichan, kiuikak tein kisentilijka uan kinextilijtajsik imonan. No kimakak takual tein amo kitamijka.
19 Imonan kitajtanij: “¿Kani titaololoj axkan? ¿Kani titekitik? Maj Dios kitatiochiui akin mitspaleuij”. Uan Rut kitapouij akoni iuan tekitik. Kiluij: “Axkan nitekitik italpan se takatsin akin monotsa Boaz”.
20 Noemí kinankilij: “Maj Jehová kitatiochiui. Dios nochipa kintasojta akin yoltokej uan akin momikilijkejya”. Uan no kiluij: “Nejon takatsin topariente, uan yejua uelis techmakixtis”.*
21 Rut no kitapouij nejin: “Boaz no nechiluij: ‘Xitaololo kampa tekititokej notakeualuan hasta maj kitamitekikan tatok’”.
22 Uan Noemí kiluij: “Kemaj nokonetsin, okachi kuali xiouj kampa siuamej tekititokej. Porin komo tiouj tetalpan, mitskuejmoloskej”.
23 Uan Rut taololoj italpan Boaz kampa siuamej tekititoyaj hasta keman kitamitekkej xinach tein kiluiaj cebada uan trigo. Uan kisentokak nemik iuan imonan.
Tajtolmelaualismej
^ Oso “kitajtoltij”.
^ Oso “ininDios israelitas”.
^ Itech hebreo, “timopaleuij iajtapaltampa”.
^ Itech hebreo, “kemej se efá”. Xikonita B14.
^ Xikonita akin temakixtia.
