Rut 3:1-18
3 Noemí kiluij isiuamon: “Nokonetsin, moneki nimitstemolis akoni iuan timonamiktis para kualtsin tinemis.
2 Boaz topariente uan siuamej akin iniuan titekitik, itakeualuan. Nejin youak Boaz tekititi kampa kichipauaj cebada.
3 Yejua ika, ximopajpaka uan ximoajuiyali. Ximotalili motasal* tein okachi kuali uan xiouj kampa kichipauaj cebada. Sayoj ke maj amo kimati ke ompa tietok, ta hasta maj tamitakua.
4 Keman kochitiujya, xikita kani motekati. Xikajsiti, xikmetsxipetso* uan ompa ximoteka. Yejua mitsiluis toni tikchiuas”.
5 Rut kinankilij: “Nikchiuas nochi tein tinechiluia”.
6 Yejua ika yajki kampa kichipauaj cebada, uan kichiuak nochi tein imonan kiluij.
7 Boaz takuaj uan yolpaktoya. Yajki motekato kampa tentoya cebada. Satepan Rut moichtakatokij, kimetsxipetsoj* uan ompa motekak.
8 Tajkoyouan, Boaz peuak uiuiyoka. Yejua ika motalij uan kiitak ke se siuatsin uetstoya iikxitan.
9 Yejua kitajtanij:* “¿Tiakoni?”. Rut kinankilij: “Tejuatsin, nejua niRut. Xinechpaleui porin tinopariente”.
10 Boaz kiluij: “Maj Jehová mitstatiochiui nokonetsin. Ika tein achto tikchiuak tiknextij ke semi titetasojta, sayoj ke axkan okachiok tiknextia. Porin amo tiktemoj se akin okichpilok, maski kipiaskia tomin oso amo.
11 Amo teyi ximolui nokonetsin, nimitspaleuis kemej tinechiluia, porin nochin akin nikan nemij kimatij ke titelkuali siuatsin.
12 Sayoj ke maski nejua uelis namechmakixtis,* yetok okse takat akin okachi ipariente Elimélec akin uelis namechmakixtis.
13 Nikan ximokaua nejin youal. Komo mosta kualkan nejon takat kijtoua ke mouan mokauas,* semi kuali. Sayoj ke komo amo kineki, nejua mouan nimokauas. Nimitsyekiluia nejin itokaykopa Jehová, Dios akin nochipa yoltok. Nikan ximokaua hasta maj tanesi”.
14 Rut mokauak iikxitan Boaz hasta mostika kualkan uan meuak keman tayouayanok katka para maj amo akin kiixmatini. Boaz amo kinekia maj kimatikan ke se siuatsin yajka kampa yetoya.
15 Boaz kiluij Rut: “Ximopankixtili mochal, xikixpataua uan kuali xikitski”. Uan Boaz ompa kitemilij 25 kilos* de cebada, kimakak Rut uan yajki Belén.
16 Keman Rut ajsik ichan imonan, yejua kitajtanij: “¿Toni panok nokonetsin?”. Rut kitapouij nochi tein Boaz kichiujka,
17 uan no kiluij: “Nechmakak nejin 25 kilos* de cebada uan nechiluij ‘Amo ijkonsan ximokepa, xikuikili nejin momonan’”.
18 Uan Noemí kiluij: “Nokonetsin, ximochia hasta maj moita toni panos, porin Boaz amo moseuis nejin tonal hasta maj kiita toni uelis mochiuas”.
Tajtolmelaualismej
^ Oso “motilmaj”.
^ Oso “xikmetsxitatso”.
^ Oso “kimetsxitatsoj”.
^ Oso “kitajtoltij”.
^ Xikonita akin temakixtia.
^ Oso “mitsmakixtis”.
^ Itech hebreo, “chikuasen tamachiuj”. Xa kemej chikuasen seas. Xikonita B14.
^ Itech hebreo, “chikuasen tamachiuj”. Xa kemej chikuasen seas. Xikonita B14.
