Santiago 2:1-26
2 Nokniuan, namejuan nantakuaujtamatijya iuan toueyi Tekotsin Jesucristo, ¿keyej nankintakachiuaj* sekin uan nankinixtopeuaj oksekin?
2 Komo kampa namosentiliaj youi se akin kiuika anillos tachijchiuj ika oro uan takentiuj ika tasal tein patiyoj uan no youi se pobre ika itasal tein taloj,
3 nankitakachiuaj* akin kuali takentiuj uan nankiluiaj “Ximotali nikan kampa okachi kualtsin”, sayoj ke akin pobre nankiluiaj “Ompa xiijkato” oso “Ximotaliti ne talpan”.
4 Komo ijkon nankichiuaj, nankintakachiujtokej sekin uan nankinixtopeujtokej oksekin uan namochiujtokej kemej jueces akin kiixtaliaj tein amo kuali.
5 Xinechkakikan nokniuantsitsin. ¿Amo kinijitak* Dios akin nikan taltikpak kinitaj ke pobres para maj semi takuaujtamatikan? Kemaj, yejuan akin Dios kinijitak maj pouikan itech iTaixyekanalis tein yejua motenkauak kinmakas akin kitasojtaj.
6 Sayoj ke namejuan nankinixtopeuaj pobres, maski nankimatij ke tominpianij namechtajyouiltiaj uan namechtitilatsaj hasta ininixpan tekiuanij.
7 Tominpianij no kiuijuikaltiaj* kuali tokayit tein Dios namechmakak.
8 Yejua ika, kuali tein nankichiuaj komo nankitakamatij ueyi tanauatil* kemej kijtoua nejin Tajkuilol “Xiktasojta moknitsin kemej tejua timotasojta”.
9 Sayoj ke, komo nankisentokaj nankintakachiuaj* sekin uan nankinixtopeuaj oksekin, nankichiujtokej se tajtakol uan tanauatil kinextia ke nankitapanauilijtokej.
10 Porin komo aksa* kitakamati nochi iTanauatil Moisés sayoj ke amo kichiua se taman tein ompa kijtoua, kitapanauilijya nochi Tanauatil.
11 Porin akin kijtoj “Amo xiauilnemi” no kijtoj “Amo xitemikti”. Komo amo tiauilnemi sayoj ke titemiktia, tiktapanauilijtok tanauatil.
12 Namejuan amo namoajsij temako uan moixtalis tein namechnamiki nankiseliskej ijkon kemej ixyetok itech tanauatil tein nankipiaj, yejua ika xiksentokakan xitajtokan uan xikchiuakan kemej ompa ixyetok.
13 Porin akin amo teiknelia, amo no kiikneliskej keman moixtalis tein kinamiki kiselis. Okachi tayekantok maj se teikneli ke se kiixtalis tein kinnamiki kiseliskej oksekin.
14 Nokniuan, ¿keniuj kipaleuia akin kijtoua ke takuaujtamati sayoj ke amo kichiua tein kuali? Maj sayoj kijto ke takuaujtamati amo kipaleuis maj momakixti, ¿melauj?
15 Komo se tokniuj amo kipia tein motalilis uan amo kiajsi tein kikuas mojmostaj,
16 uan maski ijkon nankiluiaj “Kualtsin xiouj, ximotakenti uan kuali ximotamaka”, sayoj ke amo nankimakaj tein kipoloua, ¿keniuj tapaleuia nejon?
17 No ijkon, komo aksa kijtoua ke takuaujtamati uan amo kichiua tein kuali, nenkaj takuaujtamati.*
18 Sayoj ke aksa uelis kijtos: “Tejua titakuaujtamati uan nejua nikchiua tein kuali. ¿Keniuj uelis tiknextis ke titakuaujtamati komo amo tikchiua tein kuali? Nejua nimitsnextilis ke nitakuaujtamati ika tein kuali tein nikchiua”.
19 Tejua tikneltoka ke moajsi sayoj se Dios, ¿melauj? Kuali yetok nejon. Sayoj ke hasta amokuali ejekamej kineltokaj nejon uan sesepokaj.
20 Tejua akin amo teyi tikmati, ¿amo tikita ke nenkaj titakuaujtamati komo amo tikchiua tein kuali?
21 ¿Melauj ke Dios kiitak ke yolmelauak touejkaujtat Abrahán porin kichiuak tein kuali? Kemaj, Dios kiitak ke yolmelauak satepan ke kitalij itech altar ikoneuj, Isaac.
22 Tikmati ke yejua takuaujtamatia uan no kichiuaya tein kuali, uan ika tein kichiuaya kiyeknextij ke yekmelauj takuaujtamatia.
23 Ijkon mochiuak tein kijtoua Tajkuilolamatsin: “Abrahán takuaujtamatik iuan Jehová* uan yejua kiitak ke yolmelauak”. Uan moixmatik kemej itasojikniuj Jehová.*
24 Nankimatijya ke Dios kiita ke aksa yolmelauak porin kichiua tein kuali uan amo sayoj porin takuaujtamati.
25 No ijkon, Dios kiitak ke siuaauilnenkej Rahab katka yolmelauak porin kichiuak tein kuali keman kinselij tapijpianij uan kintitanik oksekopa.
26 Komo amo timijyotiaj,* amo tiyoltokej, no ijkon komo tikijtouaj ke titakuaujtamatij uan amo tikchiuaj tein kuali, nenkaj titakuaujtamatij.*
Tajtolmelaualismej
^ Oso “nankinpoujkaitaj”.
^ Oso “nankipoujkaitaj”.
^ Oso “Amo kinixpejpenak”.
^ Oso “kitejtelchiuaj”.
^ Oso “itanauatil tekiuaj”.
^ Oso “nankinpoujkaitaj”.
^ Oso “akin”, “akaj”.
^ Itech griego, “itakuaujtamatilis miket”.
^ Oso “amo tiijsikaj”.
^ Itech griego, “totakuaujtamatilis miket”.
