Nochi xiujmej, miakej tokniuan akin amo monechikouajok touan mosentiliaj ijkuak tikelnamikij imikilis Jesús. Maski yejuan kemej yeskia peujkaj motalouaj itech ojti tein teuika itech nemilis, miak taman kichiuak maj mosenkauakan kemej tein kijtoua amaix Jiova kineki xionmokepa (Heb 12:1). Sayoj ke Jiova kisentoka kinpatiuita akin amo monechikouajok, porin yejuatsin kinkouak ika iesyo iKonetsin (Hch 20:28; 1Pe 1:18, 19). ¿Keniuj uelis tikinpaleuiskej maj mokepakan itech nechikol?

Tayekananij itech nechikol mochikauaj tajtoskej iniuan tokniuan akin amo monechikouajok uan kinpaleuiskej, ijkon kemej se ichkatajpixkej kiteltemoua ichkamej tein mouejkatilianij (Lu 15:4-7). Nejin kinextia ke Jiova kinteltasojta (Jer 23:3, 4). Sayoj ke, amo sayoj tayekananij uelis kinyolchikauaskej nejin tokniuan; tinochin uelis tikchiuaskej. Nochi tein tikchiuaskej tein ika tikinnextiliskej teiknelilis uan netasojtalis, semi kiyolpaktis Jiova uan amo nenkaj yeski (Pr 19:17; Hch 20:35). Yejua ika, xikonnemili akoni uelis tikonyolchikauas uan niman xikonchiua.

XIKONITA VIDEO MAJ TIKINYOLCHIKAUAKAN AKIN AMO MONECHIKOUAJOK UAN SATEPAN XIKONNANKILI NEJIN NETAJTANILMEJ:

• ¿Toni kichiuak Abbey keman kiixmatik se tokniuj akin amo monechikouayaok?

• ¿Keyej moneki titajtoskej iniuan tayekananij komo tiknemilijtokej tikpaleuiskej aksa akin amo monechikouaok?

• ¿Toni kichiuak Abbey achto ke oksepa yaskia kiitatiuj Laura?

• ¿Keniuj kinextij Abbey ke amo mosenkauaskia, amo yolijsiuia uan ika netasojtalis kipaleuiskia Laura?

• ¿Toni techmachtia neskayot tein kitemakak Jesús tein moajsi itech Lucas 15:8-10?

• ¿Toni tein kuali panok keman nochin tokniuan kitemojkej kipaleuiskej Laura?