Itech metsti septiembre, amaix Tein timomachtiaj itech nechikol peuas kipias se yankuik taman kemej uelis peuas titajtoskej itech tanojnotsalis tein motokaytis “Maj titamachtikan tein melauak”. Tein tiktemoskej yejua okachi tiknextiskej se tamachtilis tein tayekantok itech Biblia ika se netajtanil uan se tajkuilol.

Komo tikitaj ke taltikpaknenkej kineki kimatis okachi, uelis tikmakaskej se amaix oso tiknextiliskej se video tein moajsi itech jw.org tein tapaleuis maj oksepa tikalpanokan. Maj timochikauakan niman timokepaskej uan ijkon tiksentokaskej titajtoskej iuan taltikpaknenkej. Nejin yankuik taman kemej tipeuaskej titajtoskej uan tamachtilis tein momachtianij kipanoltiaj, mokixtiskej itech tataman tamachtilis tein kipia amaix ¿Toni yekmelauj tamachtia Biblia?, itamian sejse tamachtilis kipia textos tein tayekantokej tein techpaleuis keman oksepa titakalpanoskej oso keman titamachtiskej sayoj ika Biblia.

Sayoj moajsi se ojti tein teuika itech nemilis (Mt 7:13, 14). Kemej taltikpakneminij akin iniuan titajtouaj tataman tein kineltokaj uan tataman kemej moskaltianij, moneki tikinmatiltiskej tein tamachtia Biblia ijkon kemej kinyolnotsas (1Ti 2:4). Ijkon kemej okachi tikixmatiyaskej tataman tamachtilis tein kipia Biblia uan okachi kuali tiktekitiltiskej “in Tajtoltsin de Dios”, okachi tiyolpakiskej uan okachi tikinpaleuiskej akin tikinmachtiskej tein melauak (2Ti 2:15).