Pablo kiluij Tito maj kinixtaliani tayekananij itech xolalmej. Axkan, tokniuan takalpanouanij no ijkon kichiuaj keman kinixtaliaj tayekananij itech nechikol.
OLOCH TAOJTOKALTIANIJ
Ijkon kemej mochiuak itech yekinika siglo, tokniuan Oloch Taojtokaltianij kiixtalijkej maj tokniuan takalpanouanij kinixtalikan tayekananij uan tapaleuianij.
TOKNIUAN TAKALPANOUANIJ
Achto ke tokniuan takalpanouanij kinixtaliskej tayekananij oso tapaleuianij porin kichiujtokejya tein Biblia tajtani, moneki kiitaskej ika nejmachkayot tein kijtouaj tayekananij uan no moneki kichiuaskej netataujtil.
TAYEKANANIJ ITECH NECHIKOL
Satepan ke kiixtaliaj se tokniuj kemej tayekankej, moneki kisentokas kichiuas tein Biblia tajtani.
