Itech Biblia moijtojka ke Satanás techtajyouiltiskia uan ika kitemoskia maj amo titanojnotsakan (Jn 15:20; Ap 12:17). ¿Uelis tikchiuaskej teisa tein ika tikinpaleuiskej tokniuan akin kintajyouiltiaj? Kemaj, uelis tiktataujtiskej Dios maj kinpaleui. Biblia kijtoua ke kipia miak chikaualis inetataujtil takat akin yolmelauak (Snt 5:16).

¿Toni titajtaniskej itech nejon netataujtil? Maj tiktajtanikan Jiova maj kinyolchikaua tokniuan uan maj kinpaleui maj amo mouikan (Isa 41:10-13). No maj tiktajtanikan Dios maj tekiuanij techkauakan maj titanojnotsakan, ijkon “tiyolseukanemiske uan tiyekyetinemiske” (1Ti 2:1, 2).

Keman Pablo uan Pedro kintajyouiltijkej, akin kichiuayaj kemej Cristo ininka motataujtijkej uan kintokaytijkej itech ininnetataujtiluan (Hch 12:5; Ro 15:30, 31). Tejuan no, maski amo tikmatiskej inintokay akin kintajyouiltijtokej, uelis tikijtoskej itokay nechikol, altepet oso xolal kampa moajsij.