Xikonnemili ke tionnemi Galilea, itech itonaluan Jesús. Tionyoui hasta Jerusalén itech iluit tein mochiua itech Sakakaltsitsin. Oksekin akin no taneltokaj ualeujkej noyampa itech altepet, yejua ika tel miakej moajsij itech xolal. Axkan, tikonneki tikonmakas Jiova se netetayokolil. Yejua ika, peua tionnejnemi kampa ika moajsi templo uan tikonuika se cabra, sayoj ke mitsonouijmaka tionpanos itech ojti porin tel miakej moajsij. Keman tionajsi tikonita ke tel miakej no kinekij kitemakaskej se netetayokolil. Satepan ke semi tionmochiakya, ajsi hora keman ueli tikontemaka cabra tein tikonuika. Sayoj ke, ijkuak tikonmakati tiopixkat, tikonelnamiki ke se mokniuj akin uelis yetos ompa itech templo oso itech xolal kipia se kuejmol mouan. Jesús kimelaua tein moneki tikonchiuas komo mitsonpanoua nejon (xikonixtajtolti Mateo 5:24). ¿Keniuj tejuatsin uan tokniuj akin moyolxokolij ueliskia nankichiuaskej tein Jesús kijtoj uan nanyolseujkanemiskej? Xikonchajkuilo tanankilil tein kinamiki itech nejin ome recuadro.

TEIN MONEKISKIA TIKONCHIUAS

• Tiontajtos iuan tokniuj sayoj komo tikonnemilia ke yekmelauj tikonchiuilij teisa tein kiyolxokolij.

• Tikontemos tikonchiuas maj kiita ke yejua mopolojtok porin tikonnemilia ke niman moyolkokoua oso ke no itajtakol.

• Tikonkakis ika nejmachkayot keman tajtos uan maski amo nochi tikonajsikamatis, ika nochi moyolo tikoniluis maj mitsontapojpolui porin amo tikonnekia tikonyolxokolis.

TEIN MONEKISKIA KICHIUAS TOKNIUJ

• Kintapouis okseki tokniuan itech nechikol tein tikonchiuilij, uan ijkon kitemos maj kipaleuikan.

• Mitsonixiluis tein tikonchiuilij, kijtos nochi tein panok uan kitemos xikonijto ke motajtakol.

• Kiitas yolyemanilis uan yolchikaualis tein monekik tikonnextis keman iuan tiontajtoj uan ika nochi iyolo mitsontapojpoluis.

Maski axkan amo tiktemakajok tapialmej keman tikueyichiuaj Dios, ¿keniuj kinextij Jesús ke se yolseujkanemis iniuan tokniuan iuan mouika se kiueyichiuas Dios kemej kineki?