Itech nejin taltikpak kampa tinemij, miakej kinekij maj tikitakan ke tein kuali yejua tein amo kuali, uan tein amo kuali yejua tein kuali (Is 5:20). Miakej kichiuaj tein Jiova kitauelita porin kichiuaj tein amo kuali iniuan inintakaikniuan oso ininsiuaikniuan. Akin iniuan momachtiaj tokoneuan uan oksekin, kinekiskej kinchiualtiskej tein yejuan kichiuaj. Tetatmej, ¿keniuj uelis nankinpaleuiskej namokoneuan maj kiixtopeuakan tein amo kuali?

Xikinmachtikan tein Jiova tanauatia (Le 18:3). Ijkon kemej moskaltijtiyaskej, yolik xikinmachtikan tein Biblia ika tajtoua keman se takat uan se siuat mosentekaj (Dt 6:7). Xionmotajtani: “¿Nikinmachtiani nokoneuan keniuj se tetasojtas kemej kinamiki? ¿Kimatij keyej motelneki maj kuali se motakenti? ¿Kimatij ke oksekin moneki kinpoujkaitaskej? ¿Kimatij toni kichiuaskej komo kinnextiliaj pornografía oso kiniluiaj maj kichiuakan tein amo kuali?”. Komo kimatijya toni kichiuaskej, amo kinpanos tein amo kuali (Pr 27:12; Ec 7:12). Keman kuali tikinmachtiaj tokoneuan, tiknextiaj ke tikpatiuitaj netetayokolil tein Jiova techmakatok (Sl 127:3).

SATEPAN KE MOITAS VIDEO MAJ TIKCHIJCHIUAKAN SE KALI TEIN TAXIKOS. MAJ TIKINYEKPIAKAN TOKONEUAN IKA TEIN “AMOKUALI”, XIKONNANKILI NEJIN NETAJTANILMEJ:

• ¿Keyej seki tetatmej kinouijmaka ika tajtoskej iniuan ininkoneuan keman se takat uan se siuat mosentekaj?

• ¿Keyej tetatmej keman kiniskaltiskej ininkoneuan moneki ‘kinmachtijtiyaskej uan kinmelautiyaskej’ kemej Jiova tanauatia? (Ef 6:4).

• ¿Toni nepaleuilmej kipiaj tetatmej tein kinmaka inechikol Jiova? (w19.05 12).

• ¿Keyej semi moneki maj tetatmej kuali kinnojnotsakan ininkoneuan achto ke panos tein amo kuali?