Semi kipiaya ipatiuj keman Jesús yaya kichiuati Pascua porin amo oksepa kichiuaskia. Kemej yaya momikilitiya kinekik kichiuas iniuan itatitaniluan uan kiniluis maj ijkuak kipeualtianij iTakualis toTekotsin. Yejua ika, kiniluij Pedro uan Juan maj kitalianij tein moneki itech se kali (Lu 22:7-13; xikonita taixkopin ipeujyan amaix). Nejin techelnamiktia ke moneki tikchiuaskej seki taman achto ke ajsis tonal 27 metsti marzo keman tikelnamikiskej imikilis Jesús. Tokniuan itech nechikolmej moneki kimatiskejya akoni kipanoltis tanojnots, akoni kichijchiuas pan, akoni kiuikas vino uan okseki taman. Sayoj ke, ¿toni moneki tikchiuaskej tisejsemej achto ke ajsis nejon tonal?

Maj okachi timotasojkamatikan ika tein Jesús kichiuak. Maj ika titanemilikan tein moixtajtoltis itech Biblia itech tonalmej keman tikelnamikiskej imikilis. Tikajsiskej tein uelis tikixtajtoltiskej itech folleto Maj timomachtikan iTajtol Dios mojmostaj, apéndice B12-A uan apéndice B12-B itech La Biblia. Traducción del Nuevo Mundo uan itech Tein timomachtiaj itech nechikol abril xiuit 2020. Komo tikonneki tionmomachtis iniuan mochankauan keyej semi monekik maj Jesús toka momikili, uelis tikontemos itech Índice de las publicaciones Watch Tower uan Nepaleuil tein ika momachtiaj itaixpantijkauan Jiova.

Maj tikinyoleuakan oksekin. Maj miakej tikinyoleuakan maj touan mosentilikan keman tikelnamikiskej imikilis Jesús. ¿Akonimej uelis tikinyoleuaskej? Xa akin tikinkalpanouanijya, akin achto tikinmachtiayaj ika Biblia, tochankauan uan akin tikinixmatij. Tayekananij moneki kinyoleuaskej akin amo monechikouajok nion tanojnotsajok. Maj tikelnamikikan ke komo aksa amo nemi kampa titanojnotsaj, moneki tiktemoskej itech jw.org kani uan toni hora uelis monechikos kampa amo uejka kikisas. Xikontemo kampa kijtoua TIAKONIMEJ uan xikonpatskili kampa kijtoua “Ijkuak tikelnamikij imikilis Jesús”.

¿Toni okachi uelis tikonchiuas achto ke ajsis nejon tonal?