Tikpiaj naui videos tein techpaleuiaj maj peua titamachtikan ika Biblia. ¿Keniuj tapaleuia sejse video uan keniuj uelis tikuiskej keman titanojnotsaskej?

• ¿Keyej moneki timomachtiskej Biblia? (video tein ajsitok). Nejin video kinpaleuia akin tikinnojnotsaj maj kinekikan kimatiskej tein Biblia kijtoua, maski tein yeski taneltokalis kipiaskej. Kichiua maj kinekikan kitemoskej itech Biblia tein kinekij kimatiskej uan ika se neskayot kinextia ke melauak tein kijtoua Biblia. Itamian video kijtoua keniuj uelis tajtaniskej maj kinmachtikan ika Biblia.

• ¿Keyej moneki timomachtiskej Biblia? (video tein amo uejkaua). Nejin no kemej video tein ajsitok, sayoj ke kemej okachi amo uejkaua ueli se kinnextilia akin amo kipiaj miak tiempo.

• ¿Keniuj mochiua se nemachtil ika Biblia? Nejin kipaleuia akin kineki kimatis keniuj titamachtiaj ika Biblia uan kimelaua seki taman tein sekin motajtanianij, kemej keniuj uelis tajtaniskej maj kinmachtikan ika Biblia.

• Kuali xionmomachili tionmomachtis Biblia. Nejin video se kinextilia akin tikmachtiaj ika Biblia. Maski nejin video yekinika nesi itech libro Tiyolpakiskej nochipaya itech página 2, no uelis tiknextiliskej keman timomachtijtoskej folleto. Video ika tajtoua tein kipia libro uan kimelaua keniuj se momachtia.

Maski tataman kemej tapaleuia sejse video, uelis titenextiliskej oso titetitaniliskej keman kinamikis. Yejua ika maj kuali tikitakan toni kimelaua sejse video para kuali tiktekitiltiskej keman titanojnotsaskej.