Axkan okachi mochiuaj tetsaujmej. Keman panoua nejon, moneki kuali moixtalis keniuj kinpaleuiskej tokniuan. Yejua ika, tokniuan Oloch Taojtokaltianij kiixtalianij maj itech nochi kalmej Betel moajsi se departamento tein uelis kiitas nejon.

Keman tokniuan akin tekitij itech nejin departamento kimatij ke mochiuak se tetsauit, niman kinnotsaj tayekananij akin ompa nemij para kimatiskej keniuj uelis kinpaleuiskej tokniuan. Komo tel tauejueliuik uan tokniuan amo uelij ininselti tayektaliaj, akin tekitij Betel kinixtaliaj seki tokniuan para maj kiitakan keniuj kinpaleuiskej. Yejuan xa tayoleuaskej maj tapaleuitij oso maj kitetayokolikan seki taman tein ika uelis tapaleuiskej, oso xa yejuan kikouaskej tein monekis.

Keman ijkon motapaleuia, kuali kisa tekit tein kichiuaj uan amo nenkaj motekitiltiaj, nochin kimatij toni mochiuas uan kuali mokui tomin uan nochi taman tein mosentilia. Nejin amo ueli mochiua keman tokniuan ininselti kiixtaliaj keniuj tapaleuiskej.

Tokniuan akin Betel kinixtalia, uelis kiitaskej kanachi tomin mokuis uan kanachi tokniuan monekis tapaleuiskej. No uelis tajtoskej iniuan tekiuanij akin ompa nemij porin miakpa yejuan kitemouaj maj ueli motapaleui. Yejua ika komo amo tamechnauatiaj, tamechtataujtiaj amo xikixtalikan namejuan nankisentiliskej tomin, amo xiktitanikan seki taman nion xiakan kampa mochiuak tetsauit.

Semi tikintasojtaj tokniuan, yejua ika keman mochiua se tetsauit tiknekij tikinpaleuiskej (Heb 13:16). Komo ijkon, ¿toni uelis tikchiuaskej? Semi moneki maj ininka timotataujtikan nejon tokniuan akin tajyouijtokej uan nochin akin kinpaleuiaj. No uelis titapaleuiskej ika totomin tein ika mochiua tekit itech nochi taltikpak. Tokniuan Oloch Taojtokaltianij kinixyekanaj akin tekitij Betel, yejua ika okachi kuali kimatij kani mokuis tomin uan keniuj. Komo no tiknekij titapaleuiskej, uelis tiktitaniskej Solicitud de voluntario local de diseño y construcción (DC-50-S).

SATEPAN KE TIKONITAS VIDEO KIOUIT TEL TAUEJUELOJ OMPA BRASIL, XIKONNANKILI NEJIN NETAJTANIL:

¿Toni okachi tikonuelitak tein kichiujkej tokniuan ompa Brasil satepan ke mochiuak se tetsauit?