Jehová uejkaujya kichiani maj mopatakan akin kichiuaj tein amo kuali. Sayoj ke amo nochipa ijkon yeski, amo uejkaua kinixpoloskej taneltokalismej tein amo melaujkej, oloch altepemej kinixnamikiskej itekitikauan Dios uan Jehová kinixpolos nochin akin amo yolkualmej itech Armagedón. Tinochin tiknekij maj mochiuaya nochi nejin.

Sayoj ke onkak miak taman tein amo tikmatij den tetsaujkatajyouilis. Amo tikmatij kemanian peuas, uan amo no tikmatij toni kichiuas maj tekiuanij kinixnamikikan taneltokalismej. Amo tikmatij kanachi tiempo kinixnamikiskej itekitikauan Dios nion keniuj yeski. Uan amo no tikmatij keniuj kinixpolos Jehová akin amo yolkualmej itech Armagedón.

Sayoj ke amo moneki tikmouiliskej tein panos, porin Biblia techiluia miak taman tein techpaleuia maj tiyolseujtokan. Kemej neskayot, tikmatij ke tinemij itech “itamian tonalmej” (2Ti 3:1, nota). No tikmatij ke amo uejkauak kinixnamiktoskej taneltokalismej tein amo melaujkej para amo ixpoliuis taneltokalis tein melauak (Mt 24:22). Uan no, tikyekmatij ke Jehová kinmakixtis itekitikauan (2Pe 2:9). Uan tikmatij ke Jehová kijitak aksa akin kichiua tein kuali uan semi chikauak para kinixpolos akin amo yolkualmej uan kinmakixtis itekitikauan itech Armagedón (Ap 19:11, 15, 16).

Keman mochiuas nochi nejin “tel miakej ixtayouaskej porin semi mojkamikiskej” (Lu 21:26). Sayoj ke tejuan amo. Komo tikixtajtoltiaj uan itech titanemiliaj keniuj Jehová kinmakixtij itekitikauan ne uejkauj uan tein techiluiani ke panos satepan, techpaleuis maj tikchiuakan tein kijtoua Lucas 21:28: “Ximoketsakan uan ximoixajokuikan, porin ejkotokya tonal keman Dios namechmakixtis”.