Tanojnots 75

Naui konemej tein moajsiaj Babilonia

TEKIUAJ Nabucodonosor kiniuikak Babilonia israelitas tein okachi tamachtilmej. Satepan, kinijitak telpochmej tein okachi kualtsitsin uan tamatinij. Itech taixkopin tikinita nauin. Se motokaytia Daniel uan oksekin telpochmej, babilonios kintokaytijkej Sadrac, Mesac uan Abednego.

Nabucodonosor kinekia kuali kinimachtis uan ijkon tekitiskiaj itech ikaltekiuaj. Satepan keman kipanoskiaj eyi xiuit itech nemachtil, sayoj kinijitaskia tein okachi tamatinij tein kipaleuiskiaj maj kimelaua kuejmolmej. Kinekia maj telpochmej eskiaj chikaujkej, yejika tanauatij maj kinimakanij takual uan tayil tein yejua uan ichankauan kinimakayaj.

Xikita telpoch Daniel. ¿Tikmati toni kiiluijtok Aspenaz, itayekankatakeual Nabucodonosor? Kiiluijtok ika amo kineki kikuas takual tel uejuelik tein kimakayaj tekiuaj. Sayoj ika Aspenaz motekipachoj. Kiiluij: ‘Tekiuaj kijtoj tein nankikuaskej uan tein nantayiskej. Uan komo amo namoitaj nanchikaujkej kemej oksekin telpochmej, uelis nechmiktis’.

Satepan, Daniel no kiiluij takat tein Aspenaz kitalijka maj kinitani yejua uan eyi itasojikniuan. Kiiluij: ‘Ika xitechita majtakti tonalmej. Xitechmaka takual tein se kitoka uan at tein titayiskej. Ompa, xitechita tejuan uan xikinita oksekin telpochmej tein kimajseuaj itakual tekiuaj, uan xikyekita akonimej okachi chikaujkej’.

Takat tein kinitaya kijtoj ika kuali yetok. Uan keman tamik majtakti tonalmej, Daniel uan eyi itasojikniuan okachi chikaujkej moitayaj, uan amo kemej oksekin telpochmej. Yejika kinkaujkej maj kikuajtokan tein tajtankaj, uan amo tein tekiuaj kitemakaya.

Keman ajsik eyi xiuit, nochin telpochmej kiniuikakej iixpan tekiuaj Nabucodonosor. Satepan keman tekiuaj imiuan tajtoj, kinitak ika Daniel uan eyi itasojikniuan okachi katkaj tamatinij. Yejika, kinkauak kemej tapaleuianij itech ikaltekiuaj. Uan keman tekiuaj kiniuikiliaya netajtanilmej uan kuejmolmej Daniel, Sadrac, Mesac uan Abednego, yejuan kimatiaj majtakpa okachi ke tiopixkamej uan tamatinij tein kinpiaya tekiuaj.

Daniel 1:1-21.