Tanojnots 68

Ome konemej oksepa nenkej

KOMO timomikiliskia, ¿keniuj momachiliskia momomaj komo oksepa tinemiskia? ¡Tel yolpakiskia! Sayoj ika, ¿ueli oksepa nemi tein momikilijya? ¿Mochiujkaya achto nejin?

Xikita takat, siuat uan konet tein yetokej itech taixkopin. Takat, tanauatijkej Elías. Siuat tein amo nemiok inamik, kayot itech altepet Sarepta, uan okichpil, ikoneuj. Se tonal konet kokolispeuak, ueyipeuak uan momikilij. Ompa, Elías kiiluij siuat: ‘Xinechmaka konet’.

Elías kiuikak tapan uan kitalij itech itapech. Ompa kichiuak se netataujtil: ‘Jiova, nimitstataujtia, xikchiua maj oksepa nemi konet’. ¡Uan konet peuak mijyotia! Ompa, Elías kitemoltij uan kiiluij siuat: ‘¡Xikita, mokoneuj yoltok!’ Nejin kitelyolpaktij imomaj.

Okse itanauatijkauj Jiova motokaytij Eliseo. Yej katka itapaleuijkauj Elías. Sayoj ika satepan, Jiova kichiuak maj Eliseo no kichiuani mouiskatekimej. Se tonal, Eliseo yajki altepet Sunem, uan keman ompa moajsia, se siuat kinextiliaya ueyi kualtakayot. Satepan nejin siuat kipiak se konet.

Keman konet nenken ueyiak, se kualkan kiajsito ipopaj kampa tekititoya itech italpan. Ompa, sepasaj tsajtsik: ‘¡Nechkokoua notsontekoj!’ Keman kiuikakej kalijtik, momikilij. ¡Moteltayokoltij imomaj! Uan niman kitemoto Eliseo.

Keman Eliseo ajsik uan kalakik kampa mokauaya, ompa yetoya konet miket. Kichiuak se netataujtil iuan Jiova, uan ipan motekak miket. Inakayo konet niman kauanik, uan ekxoj chikojpa. ¡Tel yolpakik imomaj keman kalakik uan kiitak ika oksepa yoltoya konet!

Tel miakej taltikpakneminij momikilijkejya. Nejin kintayokoltia imin chankauan uan imin tasojikniuan. Tejuan amo ueli tikinajokuij mikemej. Sayoj ika, Jiova kemaj ueli. Satepan tikitaskej ika yej kichiuas maj tel miakej taltikpakneminij oksepa nemikan.

1 Reyes 17:8-24; 2 Reyes 4:8-37.