Tanojnots 62

Onkaya tajyouilis ichan David

SATEPAN keman David peuak tekiuajti Jerusalén, Jiova kinpaleuij itateuijkauan David maj tatanikan itech miak neteuilmej. Jiova Dios motenkaujka imiuan israelitas ika kinimakaskia tal tein pouia Canaán. Uan ijkon mochiuak, ika inepaleuil Jiova nochin talmej imin axkatik israelitas.

David katka se kuali tekiuaj uan kitasojtaya Jiova. Yejika, yekinika tein kichiuak satepan keman kikuik Jerusalén, kiuikak ompa ikaxon Jiova tein kixnextia netenkaualis. No kinekia kichijchiuas se templo kampa kitaliskia kaxon.

Seki xiujmej satepan, David kichiuak se ueyi tajtakol. Yej kimattoya ika amo kuali maj mokuiliani teisa tein amo iaxka. Sayoj ika se youak, keman yetoya kalkuako itech ikaltekiuaj, kipanitak se siuat tel kuakualtsin. Motokaytij Bat-seba, uan inamik katka se itateuijkauj David tein motokaytij Urías.

David kitelnekik kipias Bat-seba uan kichiuak maj kiuikilianij itech ikaltekiuaj. Kemej inamik uejka moajsia itech se neteuil, David motekak iuan Bat-seba uan satepan kimatik ika yaya kipiati se konet. David moteltekipachoj uan kiiluij Joab tein kinixyekanaya tateuianij, maj kitaliani Urías sentaixpan itech neteuil uan maj ompa kimiktianij. Keman Urías mikik, David monamiktij iuan Bat-seba.

David melauj kikualantij Jiova. Kititanik itekitikauj Natán maj kiiluiani nochi tajtakol tein kichiuak. Ueli tikita nikan Natán iuan David. David tel amo kuali momachiliaya ika nochi tein kichiujka, yejika Jiova amo kimiktij. Sayoj ika Jiova kijtoj: ‘Kemej tikchiuak nochi nejin tein amo kuali, tikpiati tel miak ouijkayomej mokalijtik’. ¡Tel miak tajyouilis kipiak David!

Yekinika, ikoneuj Bat-seba momikilij. Ompa, Amnón, yekinika ikoneuj David, kichikaujkauij ikniuj Tamar maj iuan motekani. Absalón, ikoneuj David, kikualauij Amnón uan kimiktij. Satepan, Absalón kintanejnektij miakej taltikpakneminij uan kiniuikak maj kichiuanij tekiuaj. Sayoj ika David tatanik itech neteuil, uan Absalón mikik. Kemaj, David kipiak miak tajyouilis.

Keman mochiujtoya nochi nejin, Bat-seba kipiak se konet tein motokaytij Salomón. Keman David katka ueuentsin uan amo teyi kiyekmatiaok, ikoneuj Adonías kinekia mochiuas tekiuaj. Yejika David kichiuak maj se tiopixkat tein motokaytij Sadoc, kikuatekiliani aceite Salomón uan ijkon momatiskia ika yejua eskia tekiuaj. Amo uejkauak, David momikilij keman kipiaya 70 xiujmej. Tekiuajtik 40 xiujmej. Ompa, Salomón mochiuak tekiuaj.

2 Samuel 11:1-27; 12:1-18; 1 Reyes 1:1-48.