Tanojnots 64

Salomón kichijchiuak templo

ACHTOPA keman David momikiliskia, yej kimakak Salomón amat tein kipiaya tatamachiujmej, tein Dios kitemakaka kemej mochijchiuaskia templo. Keman Salomón kiuikatoya naui xiuit itech itekiuajyo, peuak kichijchiua templo, uan kiuikilij chikome xiuit uan tajko kitamichijchiuas. Tel miakej takamej tekitikej itech templo, uan tel miak tomin kiuikak, porin kikuikej miak oro uan plata.

Nejin templo kipia ome cuartos, kemej kipiaya tabernáculo. Sayoj ika, katka okse achiok ika uejueyi tein kipiaya tabernáculo. Salomón kichiuak maj kitalianij kaxon tein kixnextia netenkaualis itech cuarto tein moajsia takaltech, uan okseki taman tein kipiaya tabernáculo, kitalijkej itech okse cuarto.

Keman matankej templo, kichiujkej se ueyi iluit. Salomón motankuaketsak iixpan templo uan kichiuak se netataujtil kemej tikita itech taixkopin. Kiiluij Jiova: ‘Niono itech nochi iluikak ueli tiaki, ¿keniuj uelis tiakis itech nejin templo? Sayoj ika, noDios, ika kualtakayot xikinkaki israelitas keman kichiuakiuij imin netataujtil’.

Keman Salomón kitamichiuak inetataujtil, iluikak temok tit, uan kinchichinoj tapialmej tein kintemakakaj kemej netetayokolilmej. Uan se itanex Jiova kitauilij nochi templo. Nejin kinextij ika Jiova kikaktoya inetataujtil Salomón uan yolpakia kiitas templo tachijchiujya. Ompaya itech templo taueyichiuaskiaj israelitas, uan amook itech tabernáculo.

Tel miak xiujmej Salomón tekiuajtik ika tamatilis, uan israelitas yolpakiaj. Sayoj ika Salomón monamiktij imiuan miakej siuamej kayomej itech okseki altepemej tein amo kiueyichiuayaj Jiova. ¿Ueli tikita semej inamikuan tein taueyichiujtok iixpan se tiotsin? Ika tamik, inamikuan Salomón kiuikakej maj kiniueyichiuani tiotsitsin. ¿Tikmati toni mochiuak satepan? Salomón mochiuak amo yolkuali, uan israelitas amo yolpakiajok.

Nejin kichiuak maj Salomón kikualantiani Jiova, yejika kiiluij: ‘Nimitskuilis tekiuajyot uan nikmakas okse. Amo nikchiuas itech monemilis, ta keman tekiuajtitos mokoneuj. Sayoj ika amo nikuilis nochin israelitas, ta kinixyekanas se ome eyin’. Tikitatij keniuj mochiuak nejin.

1 Crónicas 28:9-21; 29:1-9; 1 Reyes 5:1-18; 2 Crónicas 6:12-42; 7:1-5; 1 Reyes 11:9-13.