Tanojnots 1

Dios peuak tachijchiua

NOCHI tein kuali techmakatok Dios. Yej kichijchiuak Tonaltsin maj techmaka tanex, Metsti uan sitalimej maj techmakakan tanex itech youal. Uan Taltikpak maj ompa tinemikan.

Sayoj ika, Tonaltsin, Metsti, sitalimej uan Taltikpak amo yejua tein yekinika kichijchiuak Dios. ¿Tikmati toni achto kichijchiuak? Yekinika kinchijchiuak ángeles. Nejin amo ueli tikinitaj ijkon kemej Dios amo ueli tikitaj. Yej kinchijchiuak ángeles maj iuan nemikan iluikak.

Yekinika ángel tein Dios kichijchiuak katka semi taman. Katka yekinika iKoneuj Dios uan tekitik iuan iPopaj. Kipaleuij kichijchiuak nochi tein onkak. Kipaleuij kichijchiuak Tonaltsin, Metsti, sitalimej uan no Taltikpak.

¿Kenijkui katka Taltikpak achto? Yekinika amo akin uelia nemia nikan Taltikpak porin sayoj pexontoya at. Sayoj ika, Dios kinekia maj nemikan taltikpakneminij. Yejika, peuak techyekchijchiuilia. ¿Toni kichiuak?

Taltikpak monekia maj achto kipiani tanex. Yejika Dios kichiuak maj Tonaltsin taui itech Taltikpak, uan ijkon ueliskia tatanesiskia uan tatayouayantiaskia. Satepan kichiuak maj nesini taltikpak uan at maj mokauani tani.

Yekinika amo teyi onkaya nikan Taltikpak. Tamatia kemej taixkopin tein nikan tikita. Amo onkaya xochimej, kuoujmej niono tapialmej. Amo nemiaj amichimej itech at. Dios kipiaya miak tekit tein kichiuas uan ijkon tapialmej uan taltikpakneminij ueliskiaj kipiaskiaj se kuali nemilis nikan Taltikpak.

Jeremías 10:12; Colosenses 1:15-17, NM; Génesis 1:1-10.