Tanojnots 4

Keniuj kipolojkej Adán uan Eva kampa nemiaj

XIKITA toni mochiujtok itech taixkopin. Adán uan Eva kinkixtijtokej itech xochital. ¿Tikmati keyej?

Porin kichiujkej teisa tein tel amo kuali, yejika Jiova kintatsakuiltij. ¿Tikmati toni kichiujkej Adán uan Eva?

Kichiujkej tein Dios kiniluijka maj amo kichiuanij. Dios kiniluijka ika ueliskiaj kikuaskiaj kuoujtakilomej tein moajsiaj itech xochital. Sayoj ika, kiniluijka maj amo kikuanij se kuoujtakilot; komo kikuaskiaj, mikiskiaj. Nejon kuouit iaxka katka Dios. Uan tikmattokej ika amo kuali maj se kikui teisa tein teaxka, ¿melauj? Axkan, ¿toni mochiuak?

Se tonal keman Eva iselti yetoya itech xochital, kinojnotsak se kouat. ¡Ximonemili! Yej kiiluij maj kikua nejon kuoujtakilot tein Dios kiniluijka maj amo kikuakan. Sayoj ika, keman Jiova kinchijchiuak kouamej amo kinchijchiuak maj tajtokan. Yejika, yetoya se aksa tein kichiuak maj tajto kouat. ¿Akoni katka?

Amo katka Adán, ta katka semej ángeles tein Jiova kinchijchiujka ne tel uejkauj, achtopa keman kichijchiuaskia Taltikpak. Nejin ángel tein amo ueli tikitaj moueyinekik. Kinemilij maj no tekiuajti kemej Dios uan maj kitakamatikan yejua uan amo Jiova. Yejua nejon ángel kichiuak maj tajto kouat.

Nejin ángel kiiluij Eva ika eskia tel tamatkej kemej Dios komo kikuaskia nejon kuoujtakilot. Kemej kineltokilij yejika kikuaj, uan Adán no ijkon kichiuak. Adán uan Eva amo kitakamatkej Dios uan yejika kipolojkej kualtsin xochital kampa nemiaj.

Sayoj ika se tonal Dios kichiuati semanauak Taltikpak maj tel takualtsinkan kemej xochital tein moajsia itech Edén. Satepan tikitaskej keniuj uelis tinemis ompa. Yekintsin tikitatij toni kinpanok Adán uan Eva.

Génesis 2:16, 17; 3:1-13, 24; Apocalipsis 12:9.