Noé kichijchiuak se arca
Tanojnots 9
Noé kichijchiuak se arca
NOÉ uan inamik kinpiakej eyi konemej. Motokaytijkej Sem, Cam uan Jafet. Nochin kipiayaj imin namik. Senochin kemej kalyetouanij katkaj chikueyin.
Dios kiiluij Noé maj kichijchiuani se teisa tein amo keman kichijchiujtoya. Kiiluij maj kichijchiuani se ueyi arca. Tel ueyi katka kemej se barco, sayoj ika okachi tamatia kemej se ueyi kaxon uan ueyak. Dios kiiluij: ‘Xikchijchiua maj eyi ixnepantik, uan xiktalili cuartos’. Itech nejon cuartos yetoskiaj Noé uan ichankauan, tapialmej uan takual tein kikuaskiaj yejuan uan tapialmej.
Dios kiiluij Noé maj kichijchiuani arca kemej amo kalakiskia at. Uan kiiluij: ‘Nikualkuiti se tetsaujkakiouit uan ika nikinixpoloti nochin tein nemij itech taltikpak. Tein amo yetos itech arca mikis’.
Noé uan ikoneuan kitakamatkej Dios uan peuak kichijchiuaj arca. Sayoj ika, oksekin taltikpakneminij sayoj kinkejkelojkej uan kisentokakej kichiujkej tein amo kuali. Amo akin kineltokilij Noé keman kiniluij toni yaya kichiuati Dios.
Kemej katka ueyi arca, kiniuikilij miak xiujmej kitamichijchiuaskej. Satepan keman matankej, Dios kiiluij Noé maj ompa kinkalakiani tapialtetatmej uan tapialtenamej. Kiiluij: ‘Tein amo chipaujkej se taman tapial xikalaki sayoj ome, uan tein chipaujkej se taman tapial xikinkalaki chikome. Uan no xikinkalaki nochin tataman totomej’. Noé kichiuak ijkon kemej Dios kiiluijka.
Satepan keman Noé uan ichankauan no kalakkej itech arca, Dios tatsakuak. Keman Noé uan ichankauan yetoyaj taijtika monekik mochiaskej. Ximonemili ika ompa tiyetok uan timochixtok. ¿Ualaskia tetsaujkakiouit ijkon kemej Dios kijtojka?
