Kiskej kampa tsaktoyaj
Tanojnots 106
Kiskej kampa tsaktoyaj
XIKITA ángel tein tatapojtok kampa tsaktoyaj itatitaniluan Jesús. Uan kinkaujtok maj yakan. Maj tikitakan keyej tsaktoyaj.
Panokaya tepitsin tonalmej ijkuak imomachtijkauan Jesús kiselijkaj yektikatsin espíritu. Uan yejua nejin tein mochiuak: se tiotak Pedro uan Juan yajkej templo tein moajsia Jerusalén. Uan kampa kalakiaj yetoya se takat tein amo uelia nejnemia itech nochi inemilis. Taltikpakneminij ompa kiuikayaj mojmostaj maj kintajtaniani tomin tein kalakiaj templo. Keman kinitak Pedro uan Juan, no kintajtanij. ¿Toni kichiuaskiaj yejuan?
Motsakuilijkej uan kiixitakej. Pedro kiiluij: ‘Amo nikpia tomin, sayoj ika nimitsmaka tein nikpia. ¡Itokaykopa Jesús, ximoajokui uan xinejnemi!’ Ompa, Pedro kimakitskij uan yej moajokuik, ajkotsikuinik uan peuak nejnemi. Nejin ueyi mouiskatekit kimojkaitakej taltikpakneminij uan kiniyolpaktij.
Pedro kijtoj: ‘Tikchiujkej nejin mouiskatekit ika ichikaujkauelilis Dios, akin kiajokuik Jesús’. Keman yejua uan Juan tajtojtoyajok, sekin tayekananij itech taneltokalis ajsikej. Kualantoyaj porin Pedro uan Juan kiniluijtoyaj taltikpakneminij ika Jesús moajokuik. Yejika kinkitskijkej uan kintsakkej.
Mostika, tayekananij itech taneltokalis kipiakej se ueyi nechikol. Uan ompa kiniuikakej Pedro, Juan uan takat tein kipajtijkej. Kintajtanijkej: ‘¿Ika akoni ichikaualis nankichiujkej mouiskatekit?’
Pedro kijtoj: ‘Ika ichikaujkauelilis Dios, akin kiajokuik Jesús’. Tiopixkamej amo kimatiaj toni kichiuaskej, porin amo ueliaj kijtouayaj ika nejon ueyi mouiskatekit amo yekmelauj mochiuak. Yejika, kininejmachtijkej tatitanilmej maj amo ika tanojnotsanijok Jesús, uan kinkaujkej maj yakan.
Panok tonalmej, uan tatitanilmej kisentokayaj ika tanojnotsayaj Jesús uan kinpajtiayaj kokoyanij. Nejin mouiskatekimej noyampa momatik. Uan miakej taltikpakneminij tein nemiaj itech altepemej tein kiyoualouaya Jerusalén, kiniuikiliayaj tatitanilmej kokoyanij maj kinpajtikan. Yejika, tayekananij itech taneltokalis kininexikoluijkej tatitanilmej uan kintsakkej. Sayoj ika amo uejkauak ompa yetoyaj.
Itech youak, iángel Dios tatapoj kampa tsaktoyaj, kemej tikita nikan. Ángel kiniluij: ‘Xiyakan templo uan ompa xiksentokakan xitanojnotsakan’. Mostika kualkan, keman tayekananij itech taneltokalis tanauatijkej maj kinkuitij tatitanilmej, amo kinajsikej. Satepan kinajsitoj templo uan kiniuikakej kampa yetoyaj oloch tamelauanij.
Tayekananij itech taneltokalis kiniluijkej: ‘Tamechiluijkaj amo ika xitamachtikanok Jesús. Sayoj ika namejuan nankimoyaujkejya itech nochi Jerusalén namotamachtilis’. Tatitanilmej kijtojkej: ‘Moneki tiktakamatiskej Dios kemej tekiuaj uan amo taltikpakneminij’. Uan yejuan kisentokakej tanojnotskej. ¿Melauj ika nejin se kuali neskayot tein moneki tiktojtokaskej?
