Gabaonitas tein katkaj tamatinij
Tanojnots 48
Gabaonitas tein katkaj tamatinij
MIAKEJ tein nemiaj itech altepemej tein pouiaj Canaán, yaya moteuitij imiuan israelitas. Yejuan moluiayaj ika ueliskiaj tataniskiaj. Sayoj ika taltikpakneminij tein kayomej Gabaón amo ijkon moluiayaj. Yejuan kineltokayaj ika Dios kinpaleuiaya israelitas, uan amo kinekiaj moteuiskej iuan Dios. Yejika, ¿tikmati toni kichiujkej gabaonitas?
Kinemilijkej mochiuaskej kemej eskia uejka kayomej. Yejika sekin motalilijkej soltik taken uan soltik tekakmej. Kinimamaltijkej imin asnos koxtalsolmej uan kikuikej koyotaxkal tein poxkauika. Ompa kiitatoj Josué uan kiiluitoj: ‘Tejuan tiualeujkej semi uejka porin tikakkej tein kichiuak namoueyi Dios, Jiova. Tikakkej nochi tein kichiuak namoka keman nankiskej Egipto. Yejika totayekankauan techiluijkej maj tikchijchiuanij totakual, uan maj timoojketsanij tamechiluikij: “Timochiuaj namotekitikauan. Xitechiluikan ika amo nantechteuitiuij”. Namejuan nantechitaj ika kemej uejka tiojtokakej, soltiak totaken uan tokoyotaxkal poxkauik’.
Josué uan okseki tayekananij kinineltokilijkej gabaonitas. Yejika motenkaujkej ika amo kinteuiskiaj. Sayoj ika eyi tonal satepan kimatkej ika amo melauj uejka ualeujkaj.
Josué kintajtanij: ‘¿Keyej nantechiluijkej ika uejka naualeujkej?’
Gabaonitas tanankilijkej: ‘Porin techiluijkej ika namoDios Jiova motenkaujka namechmakas nejin tal tein poui Canaán, uan timouiaj xitechmiktikan’. Sayoj ika israelitas kichiujkej kemej motenkaujkaj, uan amo kinimiktijkej gabaonitas. Ta okachi kuali, kinchiujkej imin tekitikauan.
Tein tekiuajtia Jerusalén kualanik porin gabaonitas mokuikej imiuan israelitas. Yejika kiniluij okseki naui tekiuanij: ‘Xinechpaleuikij maj tikteuitij Gabaón’. Uan ijkon kichiujkej makuil tekiuanij. Axkan, ika tein kichiujkej gabaonitas, ¿katkaj tamatinij maski nejin tekiuanij yaya kinteuitij? Maj tikitakan.
