Kuakuejkonet tachijchiuj ika oro
Tanojnots 36
Kuakuejkonet tachijchiuj ika oro
¡TONI mochiujtok! ¿Toni axkan kichiujtokej israelitas? ¡Kitataujtijtokej se kuakuejkonet! ¿Keyej kichiujtokej nejin?
Keman Moisés mokauato miak tonalmej itech tepet, israelitas kijtojkej: ‘Amo tikmatij toni ipan mochiuak Moisés. Maj tikchijchiuakan se dios tein techkixtis nikan kampa tiyetokej’.
Aarón, ikniuj Moisés kijtoj: ‘Kuali yetok. Ximokixtilikan namopipiloluan tein tachijchiuj ika oro, uan xinechualkuilikan’. Keman kimakakej, Aarón kiatilij oro uan ika kichijchiuak se kuakuejkonet. Uan israelitas kijtojkej: ‘¡Yejua nejin toDios tein techkixtij Egipto!’ Ompa kichiujkej se ueyi iluit, uan kiueyichiujkej kuakuejkonet tachijchiuj ika oro.
Tel kualanik Jiova keman kiitak tein kichiujtoyaj. Yejika kiiluij Moisés: ‘Niman xitemo. Israelitas kichiujtokej tein tel amo kuali. Kielkaujkej notanauatiluan uan moixpilojtokej iixpan se kuakuejkonet tachijchiuj ika oro’.
Moisés niman temok. Uan keman ajsitiayaya kampa yetoyaj israelitas, ¡kinitak kiyoualojtoyaj kuakuejkonet, mokuikatijtoyaj uan mijtotijtoyaj! Moisés tel kualanik uan kitaltsomotak nejon ome patauak tet tein kipiayaj tanauatilmej uan tatapakakej. Ompa kikuik kuakuejkonet, kiatilij uan kichiuak kemej talnex.
Israelitas kichiujkej tein tel amo kuali. Yejika Moisés kininauatij seki takamej maj kikuinij imin espadas, uan kiniluij: ‘Xikinimiktikan nochin tein amo yolkualmej tein kiueyichiujkej kuakuejkonet’. ¡Yejika takamej kinimiktijkej 3,000 israelitas! ¿Amo technextilia nejin ika moneki timopiaskej maj sayoj tikueyichiuakan Jiova uan amo tiotsitsin?
