Tanojnots 40

Moisés kiuitekik tepejxit

PANOK... ¡10 xiujmej, 20 xiujmej, 30 xiujmej, 39 xiujmej! Uan israelitas kisentokayaj taluakyan. Sayoj ika itech nochi nejon xiujmej Jiova kintekipanoj. Kintamakak ika maná. Tonayan kinojtokaltij ika se ueyi mixti, uan youak ika se ueyi tit. Uan imin taken amo soltiaya niono metsxojxoleuiaj.

Itech yekinika metsti keman ajsitiayaya 40 xiujmej satepan keman kiskej Egipto, israelitas oksepa yetoyaj Qadés. Ompa yetoyaj keman 12 tapijpianij kintitankaj maj kionpijpianij tal tein pouia Canaán kemej 40 xiujmej achtoya. Míriam, ikniuj Moisés momikilij Qadés. Uan kemej ipa, ompa oksepa kipiakej kuejmolmej.

Israelitas amo kiajsiaj at. Uan yejuan amo kiuelitayaj, yejika kiiluijkej Moisés: ‘Okachi kuali maj timikinij. ¿Keyej titechkixtij Egipto uan titechualkuik nikan kampa amo teyi mochiua? Nikan amo teyi tatet, higos, uvas, granadas niono onkak at tein se tayis’.

Keman Moisés uan Aarón kichiuatoj netataujtil itech tabernáculo, Jiova kiiluij Moisés: ‘Xikinsentili israelitas. Satepan, imin ixtenoj xiknojnotsa tepejxit tein ompa yetok. Uan itech kisas miak at tein tayiskej israelitas uan nochin imin tapialuan’.

Yejika Moisés kinsentilij israelitas, uan kiniluij: ‘¡Xikakikan, taltikpakneminij tein amo nantakuaujtamatij iuan Dios! Tamechkixtilitij at itech nejin tepejxit Aarón uan nejua’. Ompa, Moisés kiuitekik tepejxit ika se kuouit uan kisak miak at. Uan israelitas atikej uan nochin tapialmej tein ompa moajsiaj.

Sayoj ika, Moisés uan Aarón kikualantijkej Jiova. ¿Tikmati keyej? Porin Moisés uan Aarón kijtojkej ika yejuan yaya kikixtitij at itech tepejxit. Uan tein melauj, Jiova kichiuak. Uan kemej Moisés uan Aarón amo kijtojkej akoni tein melauak kikixtij at, Jiova Dios kiniluij ika yaya kintatsakuiltiti. Kijtoj: ‘Amo nankinpanoltiskej israelitas Canaán’.

Israelitas niman kiskej Qadés, uan amo uejkauak ajsikej itech tepet Hor. Ompa tepekuapan momikilij Aarón. Kipiaya 123 xiujmej keman momikilij. Israelitas tel tayokoxtoyaj, uan kichokilijkej 30 tonalmej. Eleazar, ikoneuj Aarón, mochiuak satepan imin tayekankatiopixkauj israelitas.

Números 20:1-13, 22-29; Deuteronomio 29:5; Nehemías 9:21.